اسطرح کرتے ہیں نیکی لوگ مجبوری کیساتھ

Posted on March 2, 2012 By Adeel Webmaster افتخار نسیم

اسطرح کرتے ہیں نیکی لوگ مجبوری کیساتھ
جس طرح مزدور کا رشتہ ہو مزدوری کیساتھ

وصل کی شب ہو کہ خوشبو، دل کو رہتا ہے ملال
جان کا خطرہ بھی تو ہوتا ہے کستوری کیساتھ

سامنے رکھنا اُسے ہر وقت مثلِ آئینہ
ورنہ چہرہ ہی بدل جاتا ہے اِک دوری کیساتھ

آج سورج سے ملا تو اپنا چہرہ ڈھانپ کر
چاند بھی آیا فلک پر کتنی بے نوری کیساتھ

عمر بھی اس کے نہ ملنے کی تلافی ہو گئی
معذرت بھی اس نے کی تو ایسی معزوری کیساتھ

حکم دیتا وہ اگر تو مر بھی جاتا میں نسیم
ہوں اگر زندہ تو ہوں اس کی منظوری کیساتھ

افتخار نسیم