الٰہی ترک محبت نہ راس آئے مجھے

Posted on May 13, 2012 By Adeel Webmaster خمار بارہ بنکوی

الٰہی ترک محبت نہ راس آئے مجھے
غریب دل سے بغاوت نہ راس آئے مجھے

کہیں اُنہیں بھی تڑپنا پڑے نہ میرے لیے
خدا کرے کہ محبت نہ راس آئے مجھے

گِری جو برقِ مسرت تو غم کی قدر ہوئی
میں کہہ اُٹھا کہ مسرت نہ راس آئے مجھے

تڑپ تڑپ کے بمشکل اُنہیں بھلایا ہے
مزا تو جب ہے یہ زحمت نہ راس آئے مجھے

تری نگاہِ عنایت کے میں نثار مگر
تری نگاہِ عنایت نہ راس آئے مجھے

سہے نہ جائیں گے اُن کی ندامتوں کے ستم
الٰہی! جرمِ شکایت نہ راس آئے مجھے

جو دوسروں کے غموں سے بنا دے بیگانہ
خمار ایسی مسرت نہ راس آئے مجھے

خمار بارہ بنکوی