جبیں عشق میں آسرا دینے والے

Posted on May 15, 2012 By Adeel Webmaster خمار بارہ بنکوی

جبیں عشق میں آسرا دینے والے
مجھے بھیڑ میں راستہ دینے والے

کرم جبرِ حالات کا ہے یہ ورنہ
بڑے باوفا تھے دغا دینے والے

مری طرح دو دن تو جی کے دکھائیں
مری مے کشی کو ہوا دینے والے

اب اک اک سے خود ہی دوا پوچھتے ہیں
مجھے دردِ دل کی دوا دینے والے

بشر تھا میں کیسے نہ کرتا خطائیں
سنبھل کے سزا و جزا دینے والے

محبت نہیں یہ تو پھر اور کیا ہے
خفا ہو کے او مسکرا دینے والے

مروں اور در پر تو بدظن نہ ہونا
مجھے اپنے در سے اُٹھا دینے والے

مری زندگی ہی تو میرا فرض ہے
مجھے زہر دے دے دوا دینے والے

کبھی رِند تھے، اب فرشتے ہیں یا رب تیری
رحمتوں کو بُھلا دینے والے

خمار اور ترکِ مے نام توبہ!
سلامت رہیں مشورہ دینے والے

خمار بارہ بنکوی