درد بے کیف غم بے مزا ہو گیا

Posted on May 11, 2012 By Adeel Webmaster خمار بارہ بنکوی

درد بے کیف غم بے مزا ہو گیا
ہو نہ ہو کوئی مجھ سے خفا ہو گیا

بعدِ ترکِ تعلق یہ کیا ہو گیا
ربط پہلے سے بھی کچھ سِوا ہو گیا

التفاتِ مسلسل بَلا ہو گیا
خود میں گھبرا کے اُن سے خفا ہو گیا

غم نے اس طرح گِن گِن کے بدلے لئے
مسکرانا بھی اک حادثہ ہو گیا

دل کو ترِکِ محبت پہ کیا کیا ہے ناز
لیکن اُن کا اگر سامنا ہو گیا

زندگی کا یہ عالم ہے تیرے بغیر
شاخ سے پُھول گویا جُدا ہو گیا

اور بھی عشق کی جان پر بن گئی
حُسن جب مبتلائے وفا ہو گیا

دل کچھ اس طرح دھڑکا تری یاد میں
میں یہ سمجھا ترا سامنا ہو گیا

عشق میں جان بھی دے دی میں نے خمار
آج حق زندگی کا ادا ہو گیا

خمار بارہ بنکوی