روزوشب کا یہ سلسلہ ہے کیا

Posted on March 2, 2012 By Adeel Webmaster افتخار نسیم

روزوشب کا یہ سلسلہ ہے کیا
تجھ سے ملنا بھی حادثہ ہے کیا

عکس کیوں ایک سا نہیں رہتا
وقت کیا اور آئینہ ہے کیا

دیکھتا ہوں جب اپنی تحریریں
سوچتا ہوں کہ یہ لکھا ہے کیا

بے طرح یاد آ رہا ہوں کیوں
اس نے مجھ کو بھلا دیا ہے کیا

زندگی موت کا سوال ہے اب
دیکھیے اس کا مشورہ ہے کیا

کتنے رنگوں کے پھول کھلتے ہیں
زرد مٹی میں یہ ملا ہے کیا

آئیے ہم بھی آج کھو جائیں
دیکھیے وہ بھی ڈھونڈتا ہے کیا

افتخار نسیم