شہرِ لاہور کی شہزادی تھی

minar-e-pakistan

minar-e-pakistan

شہرِ لاہور کی شہزادی تھی
اس کی چاہت بھلے میعادی تھی

دام بکھرتے تھے کنول آنکھوں کے
اوج پر عادتِ صیادی تھی

کس قیامت کا چلن تھا اس کا
خوش خرامی ستم ایجادی تھی

کتنے عشاق تھے عاجز اس سے
ایک آبادی کی بربادی تھی

ابتری، اشک، جلاپے، نالے
اس کی شادی تھی کہ ناشادی تھی

میں بھی رویا تھا کسی گوشے میں
اپنے حجلے میں وہ فریادی تھی

اس کو مشروط محبت کا خیال
مجھ کو پیاری مری آزادی تھی

اس کے نزدیک بتائوں کس کو
میری لغزش تھی کہ بنیادی تھی

میں رہا کرتا تھا گر اس کے قریں
وہ بھی سانسوں کی مرے عادی تھی

وہ مری دوست تھی اور دشمن بھی
یعنی پُرکار تھی اور سادی تھی

ڈاکٹر سعادت سعید