ایک جریدے میں شائع ہونیوالے سروے کے مطابق خواتین، مردوں سے اپنے بارے میں جو مشکل ترین سوالات پوچھتی ہیں وہ کم و بیش دنیا بھر میں یکساں نوعیت کے ہوتے ہیں۔ ان سوالات کی تعداد پانچ ہے اور وہ کچھ اسطرح ہیں۔
1 ) تم اس وقت کیا سوچ رہے ہو؟
2) کیا تمہیں مجھ سے محبت ہے؟
3)کیا میں موٹی لگتی ہوں؟
4) کیا تمہارے خیال میں ” وہ ” مجھ سے زیادہ خوبصورت ہے؟
5) اگر میں مر گئی تو تم کیا کرو گے؟
ان سوالات کی مشکل یہ ہے کہ اگر کسی مرد نے ان میں سے کسی کا بھی غلط جواب دیدیا یعنی اگر سچ بول دیا تو پھر اسکا خدا ہی حافظ ہے۔ یہی وجہ ہے کہ آج ہم نے مردوں کی فلاح و بہبود کی خاطر ان سوالات کے ممکنہ جوابات تلاش کیے ہیں تاکہ انکا بھلا ہو سکے۔
پہلے سوال ” تم اس وقت کیا سوچ رہے ہو؟ ” کا نہایت سیدھا سادھا اور گھڑا گھڑایا جواب دیں کہ ” ظاہر ہے میں ہر وقت کیطرح اسوقت بھی دنیا کی سب سے وفادار عورت کے بارے میں سوچ رہا ہوں اور وہ تم ہو۔ میری خوش قسمتی ہے کہ تم میری زندگی میں آئیں ورنہ میں کسی آوارہ بھنورے کیطرح بھٹکتا رہتا، وغیرہ۔
دوسرا سوال ” کیا تمہیں مجھ سے محبت ہے؟ کا جواب احتیاط سے دیں، کیونکہ بظاہر آسان لگنے والا یہ سوال کافی خطرناک ہے۔ ممکن ہے بعض لوگ یہ سمجھیں کہ اس قسم کا سوال ” روٹین کی کارروائی ” ہوتا ہے۔ اور اسکا جواب ٹی وی دیکھتے یا اخبار پڑھتے ہوئے محض اثبات میں سر ہلا کر دینا کافی ہے لیکن یہ انکی بھول ہے۔ ایسے مردوں کو اگر میری اس بات سے اختلاف ہے تو وہ بیشک سر ہلا کر اس سوال کا جواب دیکر دیکھ لیں اور پھر نتائج بھگتنے کیلئے تیار رہیں۔
تیسرا سوال ” کیا میں موٹی لگتی ہوں؟” اپنے اندر سوالات کا ایک جہان لیے ہوئے ہے۔ یہ دراصل ایک سوال نہیں بلکہ سوالات اور خدشات کا اظہار ہے۔ کچھ ناعاقبت اندیش مرد اس سوال کے جواب میں خاتون کا موازنہ کسی فربہ اندام عورت کیساتھ شروع کر دیتے ہیں اور پھر اپنے تعئیں تعریفی انداز میں اسے یہ کہہ کر مطمئن کرنے کی کوشش کرتے ہیں کہ اس کے مقابلے میں تو تم کافی حد تک اسمارٹ ہو۔ شاید ایسے مردوں کو اپنی جان پیاری نہیں ہوتی۔
thought provoking questions
چوتھا سوال ” کیا وہ مجھ سے زیادہ خوبصورت ہے؟ بھی ایک نازک سوال ہے۔ جسکا جواب احتیاط سے دینے کی ضرورت ہے۔ ایک ممکنہ جواب یہ ہو سکتا ہے کہ میں نے تمہارے سوا کبھی کسی کو نظر اٹھا کر دیکھا ہی نہیں ” یا یہ کہ ” میں کسی ” وہ ” کو نہیں جانتا ” خیال رہے کہ اس سوال کا جواب دیتے وقت اگر آپ نے بھولے سے بھی اپنے ذہن پر ایسے زور ڈالا جیسے کسی کا سراپا یاد کرنے کی کوشش کر رہے ہوں تو یقین جانئے آپکی آنیوالی نسلیں بھی پچھتائیں گی۔
اب آتے ہیں آخری سوال کیطرف کہ ” اگر میں مر گئی تو تم کیا کرو گے؟ ” یہ سوال اس لحاظ سے سب سے دلچسپ اور مشکل ہے کہ اسکا کوئی بھی جواب خاتون کو مطمئن نہیں کر سکتا۔ مثلاً اگر آپ نے سنجیدگی سے اپنے ان منصوبوں پر روشنی ڈالنی شروع کر دی جنہیں آپ خاتون کی وفات کیبعد پائیہ تکمیل تک پہنچانا چاہتے ہیں تو کوئی بعد نہیں کہ آپکی وفات پہلے ہو جائے۔۔۔۔۔۔۔۔۔۔۔۔۔۔۔ یعنی اس خاتون سے پہلے!
یہاں میرا فرض بنتا ہے کہ عورتوں کو بھی مردوں کی خصلت کے بارے میں آگاہ کر دوں تاکہ وہ آنکھیں بند کر کے ان تمام سوالات کے جوابات پر اعتبار نہ کر لیں۔ مثلا اگر مرد پہلے سوال کا جواب گڑ بڑا کر دے تو سمجھ لیں کہ وہ جھوٹ بول رہا ہے اور اگر وہ پورے اعتماد کیساتھ آپکے سوال کا جواب دے تو جان لیں کہ وہ بہت چالاک ہے۔ ایسے مرد سے ہوشیار رہیں۔
question mark guy
اسی طرح اگر دوسرے سوال کا جواب سپاٹ لہجے میں ملے تو سمجھ جائیں کہ اسے آپ سے کوئی محبت نہیں اور اگر مرد جذباتی انداز میں جواب دے تو سمجھیں کہ اوورایکٹنگ کر رہا ہے۔
موٹاپے سے متعلق سوال کے جواب کو بھی دھیان سے سنیں، اگر مرد کھٹ سے جواب دے کہ بالکل موٹی نہیں لگ رہی تو اسکا مطلب ہے اسکا دماغ کہیں اور ہے اور اس نے آپ کو محض ٹرخا دیا ہے۔ ویسے اپنے سراپے پر خود ایک نظر ڈالنے سے بھی اس سوال کا صحیح جواب مل سکتا ہے۔
چوتھے سوال کا جواب بہت غور سے سنیں، اگر مرد زیادہ حیرت کا اظہار کرتے ہوئے کہے کہ ” کون ” تو کھٹک جائیں اور اگر وہ سنی ان سنی کر دے تو مزید کھٹک جائیں اور اگر وہ یہ جواب دے کہ نہیں،” وہ تم سے زیادہ خوبصورت نہیں ” تو پھر سمجھ جائیں کہ ” وہ ” آپ سے زیادہ ہی خوبصورت ہے۔
آخری سوال کا جواب بھی بڑی اہمیت کا حامل ہے اگر مرد اسکا جواب مذاق میں ٹالنے کی کوشش کرے تو جان لیں کہ اس نے واقعی آپکی وفات کیبعد کوئی پلاننگ کر رکھی ہے اور اگر وہ سنجیدگی سے اسکا جواب دے تو پھر آپکے لیے لمحہ فکریہ ہے۔
گھر بیٹھے عالم بنیے
حج کے 5 دن ( پہلا دن)