ڈھونڈتے کیا ہو ان آنکھوں میں کہانی میری

Posted on May 16, 2012 By Adeel Webmaster اعتبار ساجد

ڈھونڈتے کیا ہو ان آنکھوں میں کہانی میری
خود میں گُم رہنا تو عادت ہے پرانی میری

بھیڑ میں بھی تمہیں مل جائوں گا آسانی سے
کھویا کھویا ہوا رہنا ہے نشانی میری

میں نے اک بار کہا تھا کہ بہت پیاسا ہوں
تب سے مشہور ہوئی تشنہ دہانی میری

یہی دیوار و دروبام تھے میرے ہم راز
انہی گلیوں میں بھٹکتی تھی جوانی میری

تو بھی اس شہر کا باسی ہے تو دل سے لگ جا
تجھ سے وابستہ ہے اک یاد پرانی میری

کربلا دشت محبت کو بنا رکھا ہے
کیا غزل گوئی ہے کیا مرثیہ خوانی میری

دھیمے لہجے کا سخنور ہوں نہ صہبا ہوں نہ جوش
میں کہاں اور کہاں شعلہ بیانی میری

اعتبار ساجد