کون پہنچا وہاں جہاں ہیں آپ ۖ

Posted on March 6, 2012 By Adeel Webmaster ڈاکٹر سعادت سعید

کون پہنچا وہاں جہاں ہیں آپ ۖ
کہکشائوں کی کہکشاں ہیں آپ ۖ

آپ ۖ محبوبِِ کبریا لاریب
باعثِ خلقِ ہر جہاں ہیں آپ ۖ

جس جہاں میں ہے انبیاء کا قیام
بے گماں اس کا آسماں ہیں آپ ۖ

آپ کے دَم سے کُل بہاریں ہیں
باغِ جنت کے باغباں ہیں آپ ۖ

چشمِ آئینئہ الست کی ضو
عقلِ اولیٰ کے ترجمان ہیں آپ ۖ

دشتِ وحشت ہے اور زبوں حالی
واقفِ حالِ عاشقاں ہیں آپ ۖ

طالبِ رحمتِ خدا ہم سب
نطقِ فریادِ بندگاں ہیں آپ ۖ

ڈاکٹر سعادت سعید