گلابوں سے مہکی لڑی ہو گئی ہوں

Posted on March 4, 2012 By Adeel Webmaster ماہ رخ زیدی

گلابوں سے مہکی لڑی ہو گئی ہوں
محبت کی پہلی کڑی ہو گئی ہوں

مجھے تو نے ایسی نگاہوں سے دیکھا
کہ میں ایک پل میں بڑی ہو گئی ہوں

سر شام آنے کا ہے اس کا وعدہ
میں صبح سے در پر کھڑی ہو گئی ہوں

نہ چھڑوا سکو گے کبھی ہاتھ اپنا
محبت بھری ہتھ کڑی ہو گئی ہوں

بہت دور ہے مجھ سے خوشیوں کا موسم
مسلسل غموں کی جھڑی ہو گئی ہوں

جدا کر نہ پائے گا اب کوئی ماہ رخ
وہ خوشبو ہے میں پنکھڑی ہو گئی ہوں

ماہ رخ زیدی