بلوچستان: تشدد کے واقعات میں دو افراد ہلاک، چھ زخمی

Posted on August 6, 2016 By Majid Khan دوسرے شہروں سے, مقامی خبریں

کوئٹہ (جیوڈیسک) بلوچستان کے دارالحکومت کوئٹہ اور آواران میں تشدد کے دو مختلف واقعات میں کم از کم ایک بچی سمیت دو افراد ہلاک اور چھ زخمی ہو گئے۔

کوئٹہ میں فائرنگ کا واقعہ جمعے کی شب ایک دکان پر پیش آیا۔

سٹی پولیس سٹیشن کے ایک اہلکار نے بتایا کہ مسجد روڈ پر نامعلوم موٹر سائیکل سواروں نے ایک دکان پر فائرنگ کر دی جس کے نتیجے میں تین افراد زخمی ہوئے۔

زخمیوں کو فوری طور پر طبی امداد کے لیے سول ہسپتال کوئٹہ منتقل کیا گیا جہاں ان میں سے ایک شخص زخموں کی تاب نہ لاکر چل بسا۔

پولیس اہلکار کے مطابق جس دکان پر فائرنگ کی گئی وہ پلاسٹ کی تھیلیاں فروخت کرنے والی دکان تھی لیکن اس وقت اس پر پرچم بھی فروخت کیے جارہے تھے۔

ادھر ضلع آواران میں لیویز فورس کے ایک اہلکار کے گھر پر نامعلوم مسلح افراد نے حملہ کیا۔

آواران میں انتطامیہ کے ذرائع کے مطابق یہ حملہ ضلع کے علاقے جھاؤ میں کیا گیا۔ حملے کے نتیجے میں ایک بچی ہلاک اور چار افراد زخمی ہوئے۔

کوئٹہ اور آواران میں ہونے والے ان حملوں کے محرکات تاحال معلوم نہیں ہو سکے۔

آواران کے علاقے مشکے میں گذشتہ روز فائرنگ کے دو مختلف واقعات میں دو افراد ہلاک ہوئے تھے۔

دو روز قبل بھی اسی ضلع کے دو مختلف علاقوں میں فائرنگ کے واقعات محکمہ تعلیم کا ایک افسر اور ایک ریٹائرڈ ٹیچر ہلاک ہوئے تھے۔