بھمبر (جیوڈیسک) پاکستانی فوج کے محکمہ تعلقاتِ عامہ آئی ایس پی آر کے مطابق جمعے کے روز پاکستان اور بھارت کے درمیان لائن آف کنٹرول کے بھمبر سیکٹر میں دونوں ممالک کی فوج کے درمیان فائرنگ کا تبادلہ ہوا تاہم کسی جانی نقصان کی اطلاع نہیں ملی۔
اس سے قبل آئی ایس پی آر کا کہنا تھا کہ 14 اگست کو پاکستان کے یومِ آزادی کے موقعے پر بھی بھارتی افواج کی جانب سے رات بھر نیزہ پیر سیکٹر میں فائرنگ کی گئی تھی۔
یاد رہے کہ پانچ ہفتے قبل جولائی کے مہینے میں پاکستان اور بھارت کے سرحدی محافظوں کے شش ماہی مذاکرات پاکستان کے شہر لاہور میں ہوئے تھے۔ ان تین روزہ مذاکرات میں غلطی سے سرحد عبور کرنے والے دونوں ممالک کے شہریوں کی فوری واپسی پر اتفاق کیا گیا تھا اور طے پایا تھا کہ سرحد سے متعلقہ مسائل کو مقامی کمانڈروں کی فلیگ میٹنگز میں حل کرنے کی حوصلہ افزائی کی جائے گی۔
تاہم کئی سالوں سے جاری ان مذاکرات کے باوجود دونوں ممالک کی افواج کے درمیان لائن آف کنٹرول کے قریب فائرنگ کے تبادلے کے واقعات پیش آتے رہتے ہیں۔
اس کے علاوہ دو ہفتے قبل پاکستان نے بھارت کی جانب سے لگائے گئے اس الزام کی شدید تردید کی تھی کہ پاکستان کے لائن آف کنٹرول کے ذریعے بھارت میں دہشت گردی پھیلا رہا ہے۔
دونوں ممالک کے تعلقات حالیہ دنوں میں بھارت کے زیر انتظام کشمیر میں جاری مظاہروں کے بعد مزید تلخ ہو گئے ہیں
پاکستانی دفترِ خارجہ کا کہنا تھا کہ ’ہم بھارت کی جانب سے لائن آف کنٹرول کے ذریعے دراندازی کے دعوے کو سختی سے مسترد کرتے ہیں۔ پاکستان اپنی سرزمین کو کسی بھی ملک کے خلاف دہشت گردی کے لیے استعمال نہ ہونے دینے کی پالیسی پر قائم ہے۔‘
بیان میں مزید کہا گیا ہے کہ انڈین دعوے کی صداقت ثابت کرنے کی ضرورت ہے اور اس ضمن میں معلومات حاصل کی جا رہی ہیں۔
اس سے قبل انڈیا کے دفتر خارجہ کے ترجمان وکاس سوارپ نے اپنے ٹوئٹر پیغام میں بتایا تھا کہ سیکریٹری خارجہ جے شکر نے پاکستانی ہائی کمشنر کو دفتر خارجہ میں طلب کر کے انھیں پاکستان سے سرحد پار ہونے والی دہشت گردی کے حوالے سے احتجاجی مراسلہ ان کے حوالے کیا ہے۔
انڈیا کے دفتر خارجہ کے ترجمان کےمطابق پاکستانی ہائی کمشنر عبدالباسط کے حوالے کیے جانے والے احتجاجی مراسلے میں ایک پاکستانی شہری بہادر علی کا حوالہ دیا گیا ہے جسے مبینہ طور پر انڈین قانون نافذ کرنے والے اداروں نے 25 جولائی کو انڈیا کے زیر انتظام جموں و کشمیر سے گرفتار کیا تھا۔
انڈین دفتر خارجہ کے ترجمان کے مطابق 21 سالہ بہادر علی عرف ابو سیف اللہ لاہور کی تحصیل رائے ونڈ کے گاؤں جیا بگا کا رہائشی ہے۔
انڈین دفتر خارجہ کے ترجمان نے اپنی ٹویٹ میں مزید کہا کہ دوران تحقیق بہادر علی نے اس بات کا اعتراف کیا ہے کہ وہ لشکر طیبہ کے کیمپوں میں تربیت حاصل کرنے کے بعد انڈیا میں داخل ہوا، اور وہ مسلسل لشکر طیبہ کے ’آپریشنز روم‘ سے رابطے میں تھا جہاں سے انڈین سکیورٹی فورسز پر حملوں کی ہدایت ملیں۔
سامعہ قتل کیس : مقامی تھانے کا انچارج گرفتار
تحریک انصاف آج لاہور میں سیاسی قوت کا مظاہرہ کرے گی