لاہور (جیوڈیسک) قومی کرکٹرز کے سینٹرل کنٹریکٹ کا فیصلہ زمبابوے کے خلاف سیریز ختم ہونے کے بعد کیا جائے، پی سی بی کے چیف آپریٹنگ آفیسر سبحان احمد نے کہا ہے کہ فی الحال مہمان ٹیم کے لیے سیکیورٹی سمیت انتظامات پر توجہ مرکوز ہے، دیگر امور پر بعد میں غور کریں گے۔
تفصیلات کے مطابق اطلاعات گردش میں تھیں کہ قومی ٹیم کے سینئر کھلاڑیوں اور پاکستان کرکٹ بورڈ کے درمیان سینٹرل کنٹریکٹ پر تنازع پیدا ہوگیا ہے، کرکٹرز کا موقف ہے کہ معاہدوں سے وننگ بونس کی شق ختم نہ کی جائے۔
دوسری جانب پی سی بی کا کہنا ہے کہ سینٹرل کنٹریکٹ میں ادا کی جانے والی رقم بڑھادی گئی ہے، اس لیے میچ وننگ بونس کی شق کی ضرورت ہی نہیں ہے۔ رپورٹ کے مطابق اگر کھلاڑیوں اور پی سی بی کے درمیان تنازع طے پاگیا تو دورہ زمبابوے کے دوران کھلاڑیوں کو سینٹرل کنٹریکٹ دیدیا جائے گا۔
اس حوالے سے بات کرتے ہوئے بورڈ کے چیف آپریٹنگ آفیسر سبحان احمد نے کہا ہے کہ فی الحال ہماری پوری توجہ مہمان ٹیم کی سیکیورٹی اور دیگر انتظامات پر مرکوز ہے، اس وقت دیگر امور کے بارے میں غور کرنے کا وقت ہی نہیں ہے، پولیس حکام کے ہمراہ سیکیورٹی کا جائزہ لینے کے بعد میڈیا سے بات کرتے ہوئے انھوں نے کہا کہ زمبابوے کا دورہ ہمارے لیے خاص اہمیت کا حامل ہے۔
اعتماد کی بحالی کا سفر شروع ہونے کے بعد سری لنکااور دیگر ٹیموں کو بھی پاکستان بلانے کا موقع ملے گا، اس لیے ہر ممکن کوشش کررہے ہیں کہ سیریز انتہائی خوشگوار انداز میں تکمیل کو پہنچے، باقی تمام معاملات بعد میں دیکھے جائیں گے۔ ایک سوال کے جواب میں سبحان نے کہا کہ ہیڈکوچ وقار یونس پہلے کی طرح اپنی ذمہ داریاں نبھا رہے ہیں، ان کے مستقبل کے بارے میں کوئی بات زیر غور نہیں ہے۔
اٹلی : رانا نیاز احمد کا اپنے دوست کے ساتھ ایک خوبصورت انداز
پاکستانیوں ہم آ رہے ہیں، زمبابوے کھلاڑیوں کی ٹوئٹ