کرپشن سے پاک، صحت مند معاشرہ

Corruption

Corruption

تحریر: امتیاز علی شاکر
9 دسمبر گزشتہ 12 برس سے پوری دنیا میں کرپشن کے خلاف عالمی دن منایا جاتا ہے دنیا میں بڑھتی ہوئی کرپشن اور اس کے مضراثرات کے پیش نظر دسمبر 2003ء میں اقوامِ متحدہ کی جنرل اسمبلی نے 9 دسمبر کو اینٹی کرپشن ڈے قرار دیا تاکہ اس دن لوگوں میں کرپشن جیسی لعنت کے خاتمے کیلئے شعور بیدار کیا جائے۔

کرپشن وہ ناسور ہے جو بنیادی انسانی حقوق ،معاشرتی ترقی وخوشحالی،عدل وانصاف،عام آدمی تک صحت وتعلیم کی سہولیات کی فراہمی اوردیگر جمہوری اقدار کی راہ میں بڑی رکاوٹ ہے اب تک َ150سے زائدممالک اقوامِ متحدہ کے اس کنونشن پر دستخط کرچکے ہیں۔ پوری دنیاہرسال 9دسمبر کو انسدادبدعنوانی کے عالمی دن کے طورپر مناتی ہے۔

ہمارے لئے مثبت بات یہ ہے کہ آج کل ملک کے اہم ترین اداروں میںکرپشن (بدعنوانی)کاناسوراہم ترین موضوع بنا ہوا ہے ۔عزیزہم وطنوںجب ہم یہ بات سمجھتے ہیں کہ بیمارہونے کی صورت میں اچھے ڈاکٹریا حکیم سے علاج کروانا ضروری ہوتا ہے تاکہ بیماری کی حالت میں کمزورسے کمزورترہونے سے پہلے بیماری سے نجات حاصل کرکے صحت مندزندگی بسر کی جاسکے۔اپنی ،اپنے بچوں اور خاندان کے دیگرافراد کی صحت کے متعلق تو ہم بہت فکرمند ہوجاتے ہیں پرملک کی رگوں میں مسلسل گردش کرتے کرپشن کے کینسر کا علاج کرنے کی ہمیں کوئی پروا نہیں۔

ذرہ سوچیں کہ کرپشن زدہ ملک میں ہم کس طرح صحت مند زندگی بسرکرسکتے ہیں؟ہماری آئندہ نسلیں اس بیماری کی زد میں آنے سے کیسے بچ سکیں گی؟ہم اپنے بچوں کو کرپشن سے پاک صحت مند معاشرہ دینا چاہتے ہیں تو پھر آج کرپشن جیسی لعنت کے خاتمے کیلئے سنجیدگی کیساتھ سچی لگن سے محنت کرنا ہوگی ۔یہ مسئلہ کوئی آج کی بات نہیں بلکہ صدیوں سے معاشرے کی جڑیں کاٹ رہا ہے۔ سوال یہ پیداہوتاہے کہ کیا کرپشن گزشتہ چند سالوں میں پیدا ہونے والی بیماری ہے؟ حقیقت تویہ ہے کہ کرپشن کوئی نئی اور انوکھی چیز نہیںبلکہ کرپشن ہر دور موجود رہی ہے۔

دنیا کاکوئی معاشرہ نہیں جو یہ دعویٰ کر سکے کہ وہ کرپشن کے ناسور سے مکمل پاک اور محفوظ ہے یا تھا۔ یہ بات تو کسی حدتک ممکن ہے کہ پہلے اس کا دائرہ محدود ہواکرتاہوجبکہ تیزترین ترقی کے حساب سے اس زہرنے اپنی سپیڈ میں اضافہ کردیاہے ۔کرپشن کا مسئلہ کسی ایک ملک ،ریاست ،شہریاکسی خاص ادارے کا نہیں ہے۔ایسا بھی نہیں کہ کرپشن کا ناسور صرف کم ترقی یافتہ ملکوںہی کو دیمک کی طرح چاٹ رہاہے بلکہ یہ مسئلہ ترقی یافتہ ملکوں میں بھی عروج حاصل کرچکا ہے۔

International Anti Corruption Day

International Anti Corruption Day

انتہائی دکھ کی بات ہے کہ پاکستان میں تو کرپشن کی انتہاء یہاں تک پہنچ چکی ہے کہ انتہائی بااختیارادارے بھی اس لعنت کے سامنے کمزور نظر آتے ہیں۔ابھی چندروزقبل ہی قومی احتساب بیورو کے چیئرمین قمر زمان چوہدری نے اپنے ایک بیان میں تسلیم کیاکہ دہشت گردی کے بعد کرپشن دوسرا بڑا ناسور ہے ۔اُن کے خیال میںکرپشن کیخلاف سب کو مل کرجہاد کرنا ہو گا ، کرپشن اور بد عنوانی کے خلاف کسی ہتھیار سے کام نہیں لیا جا سکتابلکہ اس کے لئے آگاہی مہم چلانے کی ضرورت ہے ،پیار،محبت اور دلجوئی سے معاشرہ سے کرپشن کا خاتمہ کیا جا سکتا ہے جس کیلئے نوجوان نسل ہی اپنا اہم کردار ادا کر سکتی ہے،انہوں نے درست کہا کہ کرپشن جیسی لعنت کے کاتمے کیلئے پوری قوم کو متحد ہوکرمحنت کرناہوگی،جس طرح دہشت گردوں کے خلاف افواج پاکستان سمیت دوسرے سکیورٹی ادارے اور سول سوسائٹی فرائض سرانجام دے رہی ہے۔

جہاں تک بات ہے متحد ہوکرلڑنے کی تواس سے بڑی حقیقت اورکوئی نہیں ہے۔پرراقم قمر زمان چوہدری کا ہم خیال نہیں اس لئے دہشتگردی کونہیں بلکہ کرپشن اورحق تلفی کوپہلا ناسور خیال کرتاہے ۔ اقوام متحدہ کے منشور میں تین بنیادی ستون بیان کئے گئے ہیں۔جن میں امن وسلامتی، انسانی حقوق اورترقی شامل ہیں۔ انسانی بنیادی حقوق کی فراہمی کے بغیر نہ امن و سلامتی قائم رہ سکتی اور نہ کوئی ملک یاریاست ترقی کی منازل طے کرسکتاہے۔جب انسان کو بنیادی حقوق حاصل نہیں ہونگے جن میں غذا،تعلیم اورصحت اہم ترین ہیں تواس کاشہر،ملک یاریاست کس طرح امن وسلامتی اورترقی کانمونہ بن سکتاہے۔ معاشرے سے حق تلفی کا عنصر ختم کردیا جائے تودہشتگری کے جن کوقابوکیاجاسکتاہے اورکرپشن کے خاتمے سے قبل حق تلفی کا خاتمہ ناممکن ہے۔

بد عنوانی ہمارے ملک کی ترقی و خوشحالی میں بہت بڑی رکاوٹ ہے’ کرپشن اور بدعنوانی کی وجہ سے تعلیم ‘ صحت اور ریونیو کے معاملات جو کہ ہر شہری کی بنیادی سہولیات ہیں۔ نیب لاہور نے 2015ء میں کل 4244درخواستیں وصول کیں۔ اس بڑی تعداد کا موصول ہونا لوگوں کے اس ادارے پر اعتماد کی دلیل ہے۔ نیب اب تک 264بلین روپے نہ صرف وصول کر چکا ہے بلکہ ڈبل شاہ سکینڈل ‘ ہائوسنگ سوسائٹیز اور فاریکس کمپنیوں کے متاثرین اور قومی اداروں کو بھی ان کی امانتیںلوٹا چکا ہے۔سربراہان نیب کی طرح ہی ملکی اداروں میں کرپشن کی موجودگی کو تسلیم کرتے ہوئے لاہور ہائیکورٹ بار کی جانب سے دیئے گئے عشائیہ کی تقریب سے خطاب کرتے ہوئے چیف جسٹس آف پاکستان جسٹس انور ظہیر جمالی کا کہنا تھاکہ بد انتظامی اور کرپشن کے باعث ملک تباہی کے دھانے پر پہنچ چکا ہے۔

ان کایہ کہنا بالکل حقیقت ہے کہ ملکی مسائل حل کرنے کے لیے آسمان سے کوئی نہیں اترے گا۔ہم اپنے قومی وسائل ضائع کررہے ہیں، لوگ بجلی پانی اور گیس چوری کے نت نئے طریقے ایجادکرتے ہیں۔ عام آدمی کو انصاف فراہم کرنے والے دو اہم ترین اداروں کے سربراہان کے کرپشن کیخلاف بیانات سامنے آنے کے بعد عوام کیا سوچتے ہوں گے؟چیف جسٹس آف پاکستان بے بس ہیں،قومی احتساب بیورو کے چیئرمین بھی لاچار ہیں توپھرعام آدمی کیا کرسکتاہے؟عام عوام کو انصاف فراہم کرنے والے بااختیارادارے کرپشن کے گریبان میں ہاتھ ڈالنے سے قاصر ہیں توکیا اس بات کی امیدکی جاسکتی ہے کہ ملک سے کبھی کرپشن اوربدانتظامی کا خاتمہ ممکن ہوسکے گا؟ کرپشن ایسا قاتل مرض ہے جو چھوت کی طرح پھیلتا جا رہا ہے۔

آپ جانتے ہیں کہ اس موذی مرض نے ہماری معاشرتی، سیاسی اور روحانی زندگی کو برباد کر کے رکھ دیا ہے۔بین الاقوامی غیر سرکاری تنظیم ٹرانسپرنسی انٹرنیشنل کے مطابق پاکستان میں ہر سال کرپشن میں اضافہ جبکہ قانون کی پاسداری میں کمی ہورہی ہے۔ ملک میں بڑھتی ہوئی کرپشن کی لہر کی بڑی وجہ ملک میں موثر اور سخت احتساب کے قانون کی عدم موجودگی اورموجود قوانین پرعمل درآمد نہ ہونا ہے۔پاکستان کا ہمسایہ ملک چین قیام پاکستان کے دوبرس بعد آزاد ہوا۔اس حساب سے چین پاکستان سے دو سال چھوٹا ہے۔ جب ترقی کے حساب سے دیکھاجائے تو پاکستان کئی صدیاں چین سے پیچھے ہے ۔کسی کے وہم وگمان میں بھی نہ تھا کہ 1949ء کو آزاد ہونے والا چین نئی صدی میں دنیا کی سب سے بڑی معاشی و اقتصادی طاقت بن کر ابھرے گا۔راقم کے خیال میںچین کی ترقی کا راز مشکل اور بڑے فیصلے اور ان پر سختی سے عمل درآمد ہے۔

چین میں نگرانی کا نظام موثر بنا کرکرپشن کی سزا موت مقرر کردی گئی۔شفافیت کی حوصلہ افزائی کی گئی اور ان تمام حکمت عملیوں کے نتائج اور ثمرات سے عوام کو اچھی طرح آگاہ کیا گیا۔انتہائی مشکل اور سخت فیصلوں پر بین الاقوامی دبائو کے باوجودسختی سے عملدرآمد کیا گیا۔کرپشن کی سزاموت اور باقی جرائم کی سخت ترین سزائوں کے قانون پرسختی سے عملدرآمد کی وجہ سے ملک کالی بھیڑوں سے پاک ہوگیا۔چین کے وسائل اور قومی خزانے پر بری نظر رکھنے والے چور،ڈاکوسمجھ گئے کہ وہاں اب دال نہیں گھلنے والی اور وہاں سے غائب ہوگئے۔

Corruption in Pakistan

Corruption in Pakistan

اس طرح محب وطن ،محنت کش ،فرض شناص،جفاکش اور وفادار طبقے کی حوصلہ افزائی ہوئی ،ملک کے اہم ترین انتظامی عہدوں پرایمان داراور محب وطن لوگوں کو اپنا حقیقی کردار ادا کرنے کا موقع ملاجس کی بدولت ایک لاغر اور کمزور قوم نے ایسی ترقی کی کہ دنیا کو حیران کردیا۔آج چین کا سکہ دنیا میں ہر جگہ چلتا ہے۔معاشی لحاظ سے چیں جاپان کو بھی پیچھے چھوڑ چکا ہے ۔دنیا کی بہترین کمپنیوں میں امریکا کے بعد چین کا نام آتا ہے۔میری نظر میں چین کی ترقی کا راز کرپشن کی سزا موت طے کر کے اس پر سختی سے عملدرآمد کرنے میں ہے ۔کیونکہ کرپشن ایسا درخت ہے جس کی ،رشوت ،سفارش ،اقربا پروری شاخیں ہیں ۔چین نے اس کرپشن کے پودے کودرخت کو بنے سے پہلے ہی کاٹ دیا جس کی وجہ سے آج چینی قوم باوقار زندگی بسر کر رہی ہے۔

پاکستانی قوم نے شروع سے ہی کرپٹ لوگوں کو سزا دینے کی بجائے ملک کے اعلیٰ ترین ایوانوں میںبیٹھا دیاجس کی وجہ سے محب وطن طبقہ ذلیل ورسوا ہوکرخاموشی کی زندگی بسر کرنے پر مجبور ہے۔آج پاکستان میںکرپشن کا درخت اتنا تناور ہوچکا ہے کہ اس کی شاخوں پررشوت ،سفارش ، اقرباپروری ،بے روز گاری ،لوڈشیڈنگ ،دہشتگردی ،مہنگائی،بدامنی،ٹارگٹ کلنگ،ناانصافی،کی شکل میں پھول اور پھل نکل آئیں ہیں ،یہ درخت بہت سایہ دار ہوچکا ہے جس پرہزاروں خون خوار پرندوں نے کنکریٹ سے اپنے گھونسلے بنا لیے ہیں ۔اور بہت سے خون خوار جانور وں نے اس کی گہری چھائوں میں اپنے محلات تعمیرکرلیے ہیں۔یہ خون خوار پرندے اور جانور جن کا اوڑھنا بچھونا کرپشن ہے یوم پیدائش سے ہی پاکستان کے وسائل اور قومی خزانے کوگدھوں کی طرح نوچ نوچ کر کھا رہے ہیں، جس کی وجہ سے ملک میں کاروبار ختم ،معیشت برباداور امن وامان تباہ ہوچکا ہے۔

آج پاکستانی قوم بد ترین بدحالی کے عالم میں خودکشیاں کرنے پر مجبور ہے ۔پاکستان جیسے غریب ملک کے تمام حکمران ہی نہیں بلکہ ہم سب مل کر کرپشن کی بہتی گنگامیں صرف ہاتھ ہی نہیں دھورہے بلکہ ننگے نہارہے ہیں۔پاکستانیوں کی کیلئے خوشی کی بات یہ ہے کہ آج کل نیب کرپٹ افراد کیخلاف کارروائی کررہاہے۔جنہوں نے ملکی دولت،وسائل کو بے دردی سے لوٹایااپنے عہدے اوراختیارات کوغلط استعمال کرتے ہوئے حرام مال ودولت کمائی،نیب کی کارروائیاں حوصلہ افزاء تو ہیں پرابھی بہت کام باقی ہے کیونکہ چھوٹے چھوٹے چوروں کے ساتھ بڑے مگرمچھوں کے گریبان میں ہاتھ نہ ڈالاگیا توپھرکوئی فائدہ نہیں ہوگا۔

پاکستانی قوم چاہتی ہے کہ اب بلاامتیازاحتساب کیا جائے ،سیاست میں کرپٹ لوگ موجود ہیںتوکیاہوا کوئی بھی پاکستان سے زیادہ اہم نہیں۔ بلاتفریق سب کا احتساب ہونا چاہیے۔ سیاستدانوں ،سول و ملٹری بیورو کریسی کسی کیلئے بھی دوہرا معیار نہ بنایا جائے۔اللہ تعالیٰ سے دُعاہے کہ ہمیں مل کرسودی نظام،کرپشن،بدامنی ،بے روزگاری سمیت تمام مشکلات کا سامناکرنے اورپاکستان کو ترقی کے راستے پرگامزن کرنے کی توفیق وطاقت عطاہو،اے اللہ ہمارے پیارے پاکستان اوردنیا میں بسنے والے انسانوں پر رحمت فرما۔

Imtiaz Ali Shakir

Imtiaz Ali Shakir

تحریر: امتیاز علی شاکر