وزیرآباد (نامہ نگار) بااثر ملزمان کا گینگ کئی ماہ تک غریب لڑکی کو زیادتی کا نشانہ بناتا رہا۔ ہسپتال میں علاج کی غرض سے داخل ہونے والی لڑکی کو ورغلا کر ہسپتال میںکام دلوانے کے بہانے جنسی زیادتی کا نشانہ بنانے والے سول ہسپتال کے ملازم نے بعدازاں ملزم طارق چیمہ اور اس کے ساتھیوں نے مبینہ طور پر پہلے خود لڑکی کو زیادتی کا نشانہ بنایا وقوعہ کی ویڈیو بنا کر بلیک میل کرتے رہے بعدازاں متاثرہ لڑکی کوملک ارشد نامی شخص کے ہاتھ50ہزار روپے میں فروخت کر دیا۔
تھانہ میں درخواست لیکر آنے والی متاثرہ لڑکی کو ایس ایچ او تھانہ سٹی نے دھکے دیئے اور برے الفاظ سے پکارا۔تھانہ سٹی میں گزاری گئی درخواست میں مہوش دختر اقبال بھٹی ساکن گھکا میتر وزیرآباد نے موقف اختیار کیا ہے کہ قریب ڈیڑھ دو سال قبل سائلہ اپینڈکس کے آپریشن کی غرض سے تحصیل ہیڈ کوارٹر ہسپتال میں زیر علاج رہی جہاں سول ہسپتال کی لیبارٹری میں کام کرنے والے طارق چیمہ نے جس کا ہسپتال کے سامنے ذاتی میڈیکل سٹور ” علی میڈیکل سٹور ”بھی ہے نے دوران علاج سائلہ کے والدین کو اپنے میڈیکل سٹورسے ادویات خریدنے کیلئے قائل کرلیا اور ہسپتال سے فارغ ہونے کے بعد بھی ہم اسی میڈیکل سٹور سے ادویات خریدتے رہے۔ ہسپتال میں وقتاََ فوقتاََ چیک اپ کیلئے آتے جاتے طارق چیمہ نے سائلہ سے انسانی ہمدردی جتاتے ہوئے سائلہ کو اپنے ساتھ سرکاری لیبار ٹری میں کام پر راضی کرلیا۔اور یہاں لیبارٹری میں کام کے دوران طارق چیمہ نے سائلہ پر بری نگاہ رکھنا شروع کر دی۔
سائلہ کی کم عمری نادانی کا فائدہ اٹھا کر ایک روز کسی مریضہ کو اس کے گھر ڈرپ لگانے کے بہانے کسی گھر میں لے گیا جہاں پہلے ہی اس کے ساتھی ریاض عرف سائیں،ذیشان عرف تایا اور شاہد عرف شاہدی موجود تھے ۔ ان کی موجودگی میںملزم طارق چیمہ نے سائلہ کیساتھ زبردستی ریپ کیا اور ملزمان نے اپنے موبائلز پر اس زیادتی کی ویڈیو بنا لی سائلہ انہیں اﷲ رسول کے واسطے دیتی رہی مگر درندہ صفت ملزمان کو ذرا ترس نہ آیا۔نہتی سائلہ اس زیادتی اور بے بسی پر روتی رہی اور کہا کہ وہ اس بارے میں گھر والوں کو بتائے گی اور آئندہ کام پر بھی نہیں آئے گی تو ملزمان ویڈیو فلم نیٹ پر چڑھانے کی دھمکیاں دیکر سائلہ کو بلیک میل کرتے رہے کہ اگر اس کی ویڈیو نیٹ پر آگئی یا مارکیٹ میں فروخت کردی گئی تو وہ اس معاشرے میں کسی کو منہ دکھانے کے بھی قابل نہیں رہے گی۔
اس ویڈیو کے نام پر بعد میںذیشان عرف تایا اور ریاض نے اپنے ایک نامعلوم ساتھی کے ہمراہ سائلہ کو جنسی درندگی ہوس کا نشانہ بنایا جبکہ شاہد عرف شاہدی نے بھی سائلہ کیساتھ زیادتی کی کوشش کی۔بعدازاں طارق چیمہ نے انسانیت کی پامالی کی حدیں کراس کرتے ہوئے سائلہ کو ایک اورشخص جو کہ اسی کا جاننے والا اور ساتھی ہے ملک ارشد عرف نوشی ساکن پرانی سراںکے ہاتھ50ہزار روپے کے عوض فروخت کردیا اورکہا کہ سائلہ اس کیساتھ نکاح کرلے اور اگر طارق چیمہ اور اس کے ساتھیوں کی زیادتی کے متعلق کبھی شور مچایا تو وہ ویڈیو سامنے لے آئیں گے جس سے اس کی اپنی زندگی جہنم بن جائے گی اور کسی کے بھی قابل نہیں رہے گی۔ ملزم ملک ارشد نوشی سائلہ کو شہر میں ہی واقع اپنے ایک مکان میں لے گیا اور کہا کہ تم نے اب یہیں رہنا ہے میں تمہارے ساتھ نکاح کروں گا۔ سائلہ کا اپنے گھر والوں سے رابطہ منقطع ہونے کی وجہ سے انہوں نے سائلہ سے قطع تعلقی اختیار کرلی۔
ملزم ارشد نوشی نے سائلہ کیساتھ نکاح نہ کیا بلکہ سائلہ کو ایک بند کمرے میں جہاں اکثر کئی کئی گھنٹے بجلی بندرہتی اور سائلہ کو ایک گھونٹ پانی تک بھی میسر نہ ہوتا رکھ کر سائلہ کو 27رمضان المبارک2015سے مسلسل جنسی زیادتی،تشدد کا نشانہ بناتا رہا اس جگہ پر سائلہ کی صدا اور شور سننے والا کوئی نہیں تھا طارق چیمہ کے دوسرے ساتھی ریاض وغیرہ بھی اکثر یہاں آتے جاتے ،ملزم ملک نوشی کی مسلسل زیادتی کے نتیجہ میں سائلہ بیمار ہوگئی تو ملزم نے قریب پانچ روز قبل سائلہ کے پائوں پکڑ کر ڈرامہ رچایا کہ وہ سائلہ کو چیک کروانے لیکر جارہا ہے اسے سائلہ کیساتھ بہت محبت اور ہمدردی ہوچکی ہے اور وہ ایک دوروز میں نکاح کرکے اسے اپنے گھر لے جائے گا اس سلسلہ میں اس نے اپنے گھر والوں کو بھی راضی کرلیا ہے اور یہ کہ سائلہ کسی کو ملزم ارشد نوشی کی طرف سے قید کرکے زیادتی کا نشانہ بنانے کی بابت نہ بتائے اور کہیں بھی شور نہ مچائے اور اب سائلہ کیساتھ پہلے جیسا سلوک نہیں ہوگا اس لئے وہ اسے دل سے معاف کر دے۔
ملزم نے لیبارٹری سے چیک کروانے کے بعد واپس مجھے اگلے دن آکر بتایا کہ سائلہ کو حمل ٹھہر چکا ہے جس کو اب ضائع کروانے کے بارے میں وہ ابھی سے ذہن بنا لے ،سائلہ ملزم کے رویے سے سائلہ کو ملزم ملک ارشد اور ریاض کی گفتگو سے پتہ چلا کہ وہ اب سائلہ کو قتل کرکے ٹھکانے لگا دیں گے اس سلسلہ میں طارق چیمہ سے بھی بات ہوچکی ہے۔ سائلہ درندہ صفت ملزمان کے خوف سے بار بار روتی تو ملزم ارشد اسے گالیاں دیتے ہوئے خاموش رہنے کو کہتا گزشتہ روز مورخہ24اگست2015 کو بوقت قریب ساڑھے10بجے صبح ریاض کمرے کی بجلی درست کرنے آیا تو دروازہ کھلا پاکر سائلہ وہاں سے بھاگ نکلی اور نالہ پلکھو کے قریب سے ایک رکشہ والا کیساتھ غریبی کا واسطہ دیکر گجرات سماں کے قریب ایک دربار شریف پر پہنچ گئی جہاں اﷲ کا خوف رکھنے والے بزرگوں نے خدا ترسی کرکے سائلہ کو پناہ دی ۔درندہ صفت بھیڑیوں طارق چیمہ،ریاض، ذیشان،شاہد اورملک ارشد نوشی نے ورغلاء کر ،بلیک میل کرکے اور زبردستی ریپ کا نشانہ بنا کر سخت زیادتی کی اور انسانیت کے وقار کو پامال کرکے رکھ دیا ہے۔
ملزمان نے سائلہ کی زندگی تباہ وبرباد کردی ہے۔ سائلہ انصاف کیلئے تھانہ میں حاضر آئی ہے کہ ملزمان کیخلاف مقدمہ درج کرکے ان درندہ صفت بھیڑیوں کو قرار واقعی سزا دلوائی جائے اور سائلہ کو جانی تحفظ فراہم کیا جائے۔متاثرہ لڑکی تھانہ سٹی میں درخواست لیکر پہنچی تو ایس ایچ او محمد نواز گجرنے اسے برے رویے کا نشانہ بنانا شروع کردیا اور دھکے دیتے ہوئے گاڑی میں بیٹھنے کا کہا موقعہ پر موجود میڈیاکے نمائندوں کی طرف سے ایس ایچ او کے اس رویہ پر افسوس کا اظہار کرنے پر ایس ایچ او گاڑی میں بیٹھ کر اے ایس پی آفس روانہ ہوگیا۔ اے ایس پی وزیرآباد غلام مرتضیٰ نے متاثرہ لڑکی کے ملزمان کیخلاف کاروائی کی یقین دہانی کرواتے ہوئے ایس ایچ او کو مقدمہ درج کرنے کا حکم دے دیا جس پر پولیس تھانہ سٹی نے ملزم طارق چیمہ کو حراست میں لیکر مزید کاروائی شروع کردی ہے۔متاثرہ لڑکی نے وزیر اعلیٰ پنجاب،آئی جی پنجاب اور دیگر ارباب اختیار سے فوری انصاف کا مطالبہ کیا ہے۔
بھمبر کی خبریں عاطف اکرم سے 25/08/2015
مصطفی آباد/للیانی کی خبریں 25/08/2015