فیصل آباد : پاکستان پیپلز پارٹی پی پی 67کے رہنما چوہدری نجف ضیاء وڑائچ نے کہا ہے کہ سیاست میں بداخلاقی اور بدمعاشی جیسے لوازمات شامل ہوجائیں تو پھر یہ شریفوں کا کام نہیں رہے گا ،بلکہ قاتلوں اور غنڈوں کا محبوب مشغلہ کہلوائے گا اور 80فیصد لوگ جیلوں میں بند ہوکر الیکشن میں حصہ لیا کریں گے ،سیاست دراصل حکومت کا دوسرا نام ہے ،سیاست تو پیغمبر وں نے بھی کی تھی ،کبھی کسی کو اوئے توئے نہیں کہا تھا مگر آج کی ملکی سیاست انتہائی غلط راستے پر چل پڑی ہے بڑے چھوٹے کو اوئے توئے کرنا تو معمول بن چکا ہے ،سیاسی مخالف کو جھوٹے مقدمات میں پھنسانا اور ان پر قاتلانہ حملے کروا کر ہسپتال پہنچانا بھی سیاست کا حصہ بن چکا صرف زخمی کرنے کی حد تک بات رہے تو الگ چیز ہے مگر اب تو مخالفین کو قتل کروانا بھی ایک سیاسی کھیل بن چکا ہے ،انہوںنے کہاکہ محترمہ بے نظیر بھٹو شہید ایک بین القوامی شخصیت تھیں اور دو مرتبہ وزیر اعظم بنیں مگر انہوںنے اپنی زندگی میں بھی شائستگی کا دامن نہیں چھوڑا تھا جبکہ آصف علی زرداری نے بھی بطور صدر 5سال تک مفاہمانہ پالیسی اختیار کی اور ان کے دور میں ایک بھی سیاسی قیدی نہیں تھا ،ہم تمام سیاسی جماعتوں تک قائد ین کو مشورہ دینا چاہتے ہیں کہ وہ سیاست کے ” گر ” پیپلز پارٹی بالخصوص آصف علی زرداری سے سیکھ لیں تاکہ انہیں پتہ چل سکے کہ سیاست کس چیز کا نام ہے اور یہ کیسے کی جاسکتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : پاکستان تحریک انصاف کے سٹی صدر ڈاکٹر اسد معظم نے کہا ہے کہ پاکستان کو درپیش مسائل کا حل صرف تحریک انصاف اور عمران خان کے پاس ہے کیونکہ موجودہ حکمران ماسوائے کمیشن بنانے اور سرمایہ بیر ون ممالک منتقل کرنے کے اور کچھ نہیں کررہے اس کے برعکس عمران خان جن کے کل اثاثے پاکستان میں ہیں اور پاکستانیت ان میں کوٹ کوٹ کر بھر ی ہوئی ہے وہ صرف اور صرف ملک و قوم کے بارے میں سوچتے ہیں وہ وزیر اعظم بننے کے بعد شریفوں ،زرداریوں اور پرویز یوں کے ڈالے گئے گند کو صاف کرکے پاکستان کو پاک و صاف بنادیں گے جس کے بعد کسی کو اس ارض پاک کی جانب انگلی اٹھانے کی جرات نہیں ہوگی ،انہوںنے کہا کہ پلے سے پیسے خرچ کرکے غیر ملکی ایجنسیوں سے سروے کروا کر قوم کو خوش فہمی میں مبتلا کر نے والے جعلسازوں کے اب دن گنے جاچکے ہیں اور بہت جلد ان سے ملک وقوم کی جان چھوٹنے والی ہے ،ہم یہ بات دعوے سے کہہ سکتے ہیں کہ صرف آئندہ الیکشن میں ہی نہیں بلکہ اگلی دو چارصدیوں تک بھی ان نام نہاد شریفوں کیلئے ملکی سیاست میں کوئی جگہ نہیں بن پائے گی کیونکہ وقت گزرنے کیساتھ ساتھ ان کی بہت سی چوریاں اورخصوصی طور پر رہزنیاں سامنے آتی جارہی ہیں ،ڈاکٹر اسد معظم نے مزید کہا کہ وطن عزیز کو بھنور میں پھنسا کر ان شریفوں نے تو خود کنارہ کر جانا ہے مگر تحریک انصاف اور اس کے عہدیداروں کا جینا مرنا صرف اور صرف ارض پاک کیساتھ ہے اور یہی پاکستان کو بھنور سے نکال کر کنارے لگائے گی جس کے بعد یہ ملک ایسی ترقی کرے گا کہ تمام ترقی یافتہ ممالک انگشت بدنداں رہ جائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : پاکستان مسلم لیگ ن کارپوریشن کے جنرل سیکرٹری شاہد محمود بیگ اور جوائنٹ سیکرٹری محمد علی بخاری نے کہا ہے کہ وہ لوگ جنہیں ملکی ترقی ہضم نہیں ہورہی صرف ان لوگوں کے پیٹ میں وزیر اعظم کی جانب سے ترقیاتی کاموں کے فیتے کا ٹنے پر مروڑ اٹھ رہے ہیں تاریخ شاہد ہے کہ آج تک اتنے ترقیاتی کام کسی دور میں نہیں ہوئے جتنے صرف ساڑھے 3برسوں میں ہوئے ہیں اور آج تک اتنے میگا پراجیکٹس کے اتنے فیتے نہیں کٹے جتنے میگا پراجیکٹس میاں نوازشریف نے ملک کے کونے کونے میں شروع بھی کروائے اور مکمل بھی ،انہوںنے کہا کہ فیصل آباد سے ملتان تک موٹر وے 4حصوں میں تعمیر ہورہی ہے اس طرح ملتان تا کراچی موٹروے تین حصوں میں تعمیر ہورہی ہے جیسے ہی کوئی حصہ تعمیر ہوجاتا ہے تو وزیر اعظم اس کا افتتاح کرکے اسے عوام کیلئے کھول دیتے ہیں تو فیتہ پھر کاٹنا پڑتا ہے اس لئے مخالفین رونے دھونے اور تنقید کرنے کی بجائے اس نیک کام میں حکومت کے دست و بازو بنیں اور کوشش کریں کہ فیتے روزانہ کی بنیاد پر کٹیں ،انہوںنے کہا کہ یہ فیتے کاٹنے کا ہی کمال ہے کہ وطن عزیز میں لوڈشیڈنگ اب صرف مہمان بن کر رہ گئی ہے ،22گھنٹوں کی بجائے محض دو یا 3گھنٹے بجلی بند ہوتی ہے ،کیا یہ کامیابی نہیں ؟تنقید برائے تنقید کی سیاست کرنے والے اپنی اصلاح کرلیں تو عوام انہیں آئندہ انتخابات میں تھوڑا بہت منہ لگالیں گے ورنہ یہ لوگ یاد رکھیں ووٹ ہمیشہ کارکردگی کی بنیاد پر ملتے ہیں ،سڑکوں کی خاک چھاننے یا پھانکنے سے کسی کو ووٹ نہیں ملتے۔
حضور کی بعثت تمام جہانوں کے لئے رحمت بن کر آئی، اللہ نواز
پاکستان کا اسٹریٹیجک پروگرام خاص خطرات سے نمٹنے کیلئے ہے: آرمی چیف