فیصل آباد : وزیراعلیٰ پنجاب میاں شہباز شریف کی احسن پالیسیوں سے صوبہ بھر کے سرکاری سکولوں کا معیار بہتر ہوا ہے۔ صوبائی وزیر قانون رانا ثناء اﷲ کی کاوشوں سے پی پی70 میں تعلیمی اداروں کی اپ گریڈیشن کے ساتھ ان کی کارکردگی بھی بہتر ہوئی ہے۔ وہی قومیں ترقی کرتی ہیں جن کا معیار تعلیم بہتر ہو۔ ان خیالات کا اظہار چیئرمین سی سی115 ملک عمران نے گورنمنٹ ایم سی پرائمری سکول اے بلاک سرسید ٹائون میں داخلہ مہم کی تقریب سے خطاب کرتے ہوئے کیا۔ انہوں نے کہا کہ ایم سی سکول کی تعلیمی صورتحال قدرے بہتر ہے جس کا سارا کریڈٹ ہیڈ مسٹریس شبانہ کو جاتا ہے۔ ای ڈی او رافعہ مشتاق نے کہا کہ ہماری کوشش ہے کہ 4سال سے لیکر 9سال تک کے بچے اور بچیوں کو تعلیم کی طرف راغب کرنا ہم سب کی ذمہ داری ہے۔ تعلیم یافتہ معاشرہ ہی ترقی کی راہ پر گامزن ہو سکتا ہے۔ ہیڈمسٹریس شبانہ فاروق نے پہلے سپاس نامہ پیش کیا۔ ملک عمران نے سکول کے مسائل حل کرنے کی یقین دہانی کروائی۔ تقریب میں جنرل کونسلرز غلام مصطفی عرف بابو’ نذیر پہلوان’ سیکرٹری ناصر حسین انصاری’ آصف امین’ میاں شہزاد’ فاروق انصاری’ سید ابن حسن رضوی پی پی رہنما کی خصوصی شرکت کی۔ سکول کی بچیوں اور بچوں نے ٹیبلو پیش کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : میاں ایاز کی نمازجنازہ میں سماجی’ سیاسی اور تاجر برادری کی کثیر تعداد نے شرکت کی۔ میاں ایاز علی اصغر بھولا گجر کے قتل میں مجرم تھے اور جیل کاٹ رہے تھے۔ بیماری کی وجہ سے چند روز قبل ہی ضمانت پر رہائی ملی تھی۔ نمازجنازہ میں ضلعی صدر پاکستان پیپلز پارٹی چوہدری سعید اقبال’ سرپرست قائداعظم ہوزری یونین ڈجکوٹ روڈ رانا خاور جاوید’ چیئرمین سی سی15 ملک عمران’ بانی رہنما ہوزری یونین رانا ارشاد’ صدر ملک مختار’ سینئر نائب صدر میاں آصف ودیگر نے شرکت کی۔ ہوزری یونین قائداعظم مارکیٹ کا تعزیتی اجلاس جس میں مرحوم کی مغفرت کے لیے دعائے خیر کی گئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : پاکستان تحریک انصاف پی پی 65 کے رہنما وریجنل نائب صدر چوہدری ظفر اقبال سندھو نے کہا ہے کہ وزیراعلیٰ پنجاب کا مہنگائی کے خاتمے کا دعویٰ انتہائی غلط اور عوام کیساتھ بھونڈا مذاق ہے۔ آج برائلر مرغی 250 روپے فی کلو فروخت ہو رہی ہے۔ حمزہ شہباز کے کنٹرول شیڈ سے جاری ہونیوالے برائلر سے دوگنا سے بھی زیادہ کمائی کی جا رہی ہے۔ اس طرح سبزیوں کی قیمتیں عام آدمی کے کنٹرول سے باہر نکلتی جا رہی ہیں۔ فروٹ صرف سرمایہ داروں کیلئے نعمت بن چکا ہے جبکہ غریب آدمی تو اپنے بچے کو ایک مالٹا تک لیکر نہیں دے سکتا۔ چینی اور گھی کی قیمتیں صرف 10روز کے دوران 6روپے کلو تک بڑھ چکی ہیں۔ پٹرولیم قیمتوں میں ہونیوالے اضافے نے ہر چیز کو اپنی لپیٹ میں لے لیا ہے اس کے باوجود ”چھوٹے” کا مہنگائی کی کمر توڑنے کا دعویٰ انتہائی فضول ہے۔ انہوں نے کہا کہ سرکاری ہسپتالوں کی حالت زار بدلنے کی شہباز شریف روزانہ تسبیح پڑھتے ہیں مگر ان ہسپتالوں کی حالت یہ ہے کہ چند ایک گولیاں جن کی مالیت ایک سے 3روپے کے درمیان ہے، کے علاوہ کوئی اور دوائی لوگوں کو میسر نہیں تقریباً 19قسم کی بیماریوں کیلئے ایک ہی قسم کی گولی لکھ کر دی جا رہی ہے مگر وزیراعلیٰ فرماتے ہیں کہ اربوں روپے کی ادویات فراہم کی جا رہی ہیں۔ عوام ان سے سوال کرتے ہیں کہ اگر واقعی اتنی ادویات فراہم کی جا رہی ہیں تو وہ جاتی کہاں ہیں؟ عوام کو کیوں نہیں ملتی۔ نام نہاد خادم اعلیٰ دعوئوں کی بجائے کوئی عمل کام کر کے بھی دکھائیں تاکہ وہ لوگ جنہوں نے (ن) لیگ کو ووٹ دیئے تھے وہ آئندہ کیلئے محتاط ہو جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : پاکستان تحریک انصاف سٹی کے صدر ڈاکٹر اسد معظم نے کہا ہے کہ سانحہ پارلیمنٹ ہائوس کی انکوائری کیلئے بنائی گئی پارلیمانی کمیٹی کا فیصلہ انتہائی افسوسناک اور حیرت انگیز ہے۔پتہ نہیں اس کمیٹی نے مراد سعید کو کس طرح قصور وار قرار دیدیا ہے۔پارلیمنٹ ہائوس کے سی سی ٹی وی کیمروں اور موقع پر موجود لوگوں کی جانب سے موبائل فونز کے ذریعے بنائی جانیوالی فلم میں صاف دیکھا جا سکتا ہے کہ مسلم لیگ (ن) کے آخری”شریف”میاں جاوید لطیف نے پاس سے گذرنے والے پی ٹی آئی کے ٹائیگر مراد سعید پر فقرے کسے اور انتہائی واحیات قسم کی زبان استعمال کی جس پر اشتعال میں آکر مراد سعید نے لیگی ایم این اے پر حملہ آور ہوئے تاہم لوگوں کے بیچ بچائو کرنے کی وجہ سے جاوید لطیف کو مکا لگا نہ تھپڑ اس کے باوجود دونوں کو قصوروار قرار دیکر ایک ہی صف میں کھڑا کردینا دراصل انصاف کی موت ہے۔انہوں نے کہا کہ اگر یہ سانحہ کسی باتھ روم میں یا بند کمرے میں پیش آتا اور اس کے گواہ نہ ہوتے تو پارلیمانی کمیٹی کا فیصلہ کچھ سمجھ میں آجاتا مگر گواہوں کے بیانات اور سی سی ٹی وی کیمروں پر بننے والی فلموں کو دیکھ کر بھی کمیٹی نے حقائق سے نظریں چرائیں جس سے موجودہ حکومت کی”میرٹ پالیسی”پوری قوم پر عیاں ہوگئی ہے۔ڈاکٹر اسد معظم کے مزید کہا ہے کہ تحریک انصاف کا صرف ایک مطالبہ ہے وہ یہ کہ سپیکر قومی اسمبلی غیر جانبداری کا مظاہرہ کرتے ہوئے جاوید لطیف کو اسمبلی کی رکنیت سے فی الفور فارغ کریں ورنہ تحریک انصاف انتہائی راست اقدام پر موجود ہو جائیگی۔عمران خان کی جانب سے ن لیگی رکن اسمبلی جاوید لطیف کا سوشل بائیکاٹ جاری رہے گا’آئندہ عام انتخابات جب بھی ہوئے میاں جاوید لطیف جس حلقہ سے بھی الیکشن لڑیں گے تحریک انصاف اور حلقہ کے عوام کی ان کی اس بد زبانی پر انہیں ایسی شکست دیں گے کہ تاریخ اسے ہمیشہ یاد رکھے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : پاکستان مسلم لیگ (ن) کارپوریشن کے جنرل سیکرٹری شاہد محمود بیگ اور جوائنٹ سیکرٹری محمد علی بخاری نے کہا ہے کہ حکومت کو ملنے والی ریکارڈ کامیابیاں شاید مخالفین کو ہضم نہیں ہورہیں اسی لئے یہ لوگ بلا جواز وایلا مچا کر عوام کی توجہ اپنی جانب مبذول کروانے کی ناکام کوششیں کررہے ہیں’پاک چین اقتصادی راہداری یا سی پیک کو اپنا منصوبہ قرار دینے والے کیا عوام کو یہ بتانا پسند کریں گے کہ آپ 5سال تک اقتدار میں رہے ہیں اس دوران آپ اس پر کام کیوں شروع نہیں کرسکے؟انہوں نے کہا ہے کہ سی پیک حقیقی منصوبوں میں مسلم لیگ(ن) کا منصوبہ ہے جس کیلئے میاں شہباز شریف کی کاوشیں باعث تحسین ہیں۔اگر یہ منصوبہ پیپلز پارٹی کے دور میں شروع ہوتا تو تسلیم کیا جاسکتا تھا کہ اسے زرداری یا گیلانی نے شروع کروایا ہے۔انہوں نے کہا ہے کہ ابتداء میں چین نے یہ منصوبہ 47ارب ڈالر سے شروع کیا مگر اب اس میں ترکی بھی شامل ہوگیا ہے جبکہ روس سمیت دیگر کئی ممالک اس میں شمولیت کے خواہاں ہیں’ان تمام ممالک کو معلوم ہے کہ یہ گیم چینجر منصوبہ ہے جو پورے خطے میں ترقی کا باعث بنے گا اس کی تکمیل سے روزگار کے لاکھوں ذرائع پیدا ہونگے۔ابھی یہ تکمیل کے مراحل میں ہے اس کے باوجود 90ہزار سے زائد پاکستانیوں کو اس سے باضابطہ طور پر روزگار مل رہا ہے۔لہٰذا جلنے والے اور اس منصوبے پر اپنا حق جتانے والے زمینی حقائق کو مدنظر رکھیں’عوام بیوقوف نہیں جو ان لوگوں کی باتوں میں آجائیں سچ آخر سچ ہی ہوتا ہے اور سچ کو چھپانے والے احمق کہلاتے ہیں’انشاء اللہ پاک فوج کی زیر نگرانی اور میاں نواز شریف کی زیر قیادت سی پیک ہر صورت مکمل ہوگا جس کے بعد نہ صرف پاکستان بلکہ پاکستانیوں کا معیار زندگی ہمالیہ جتنا بلند ہو جائیگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : انجمن تاجران فیصل آباد (فیڈریشن)کے صدر رانا تجمل وحید، جنرل سیکرٹری شاہد احمد وہرہ، سینئر نائب صدر محمد اشرف چوہدری ودیگر عہدیداران نے کہا ہے کہ ٹریفک وارڈنز کی عدم توجہی اور اپنی تمام تر توجہ چالانوں پر مرکوز کرنے کی وجہ سے شہر بھر میں ٹریفک جام رہنا معمول بن چکاہے ‘شہرکی کوئی بھی سٹرک ایسی نہیں جہاں ماسوائے چھٹی کے دن کے معمول کے مطابق ٹریفک رواں دواں ہو، تجاوزات کی بھرمار اورتمام سٹرکوں کو پارکنگ کیلئے مختص کرنے کے نتیجہ میں اہل فیصل آباد بدترین مشکلات اور کرب میں مبتلا ہوچکے ہیں ‘اُنہوںنے کہاکہ پڑھے لکھے ٹریفک وارڈنز کو پرانی ٹریفک پولیس کی جگہ پر تعینات کرکے اُمیدیں وابستہ کی گئی تھیں کہ یہ لوگ نظام کو بہتر کرنے میں کامیاب ہوجائیںگے مگر افسوس کہ یہ لوگ بھی زنگ آلود ثابت ہوئے ‘موبائل فونز پر فیس بک میں مصروف رہنے والے یہ وارڈنز عوام کی اُمیدوں پر پورا اُترتے کامیاب ہوتے نظر نہیں آرہے’ اُنہوںنے کہا کہ سابق سی ٹی او سردار آصف نے نظام کو کچھ بہتر کیا تھا مگر ان کے تبادلے کے بعد حالات ایسے خراب ہونا شروع ہوئے کہ آج تک ٹھیک نہ ہوسکے ان کے بعد آنے والے سی ٹی او عارف شہباز خان وزیر کو ایک وقت میں دو محکمے دے دیئے گئے اسلئے وہ کسی ایک جانب توجہ مرکوز نہ رکھ سکے ‘ضرورت اس امر کی ہے کہ شہر میں بگڑے ٹریفک مسائل پر قابو پانے کیلئے کسی نڈر،بہادر اور کام کرنے والے افسر کو سی ٹی او لگایا جائے ‘ایک مرتبہ پھر ٹریفک وارڈنز کو رانا معصوم کے انڈر کردیا گیا ہے تاہم رانا معصوم کی بطور سی ٹی او کارکردگی سے پورا شہر واقف ہے اس لئے پنجاب حکومت فیصل آباد یوں کے حال پر رحم کھاتے ہوئے کسی قابل افسر کو تعینات کرے تاکہ شہریوں کو سکھ کا سانس آسکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فیصل آباد : میونسپل کارپوریشن میں مسلم لیگ (ن)کے پارلیمانی لیڈر شیراز کاہلوں نے کہا ہے کہ شہر بھر میں تمام اہم سڑکوں کو پارکنگ کیلئے مختص کرنا شہر کی خوبصورتی کو داغدارکرنے کے مترادف ہے ‘خصوصی طور پر چوک چنیوٹ بازار سے گمٹی چوک تک سڑکوں کے دوران اطراف کا ر پارکنگ ہونے کی وجہ سے ٹریفک کا نظام درہم برہم ہوکر رہ گیا ہے ‘آٹھوں بازاروں میں بھی پرانا بوسیدہ پارکنگ نظام شہر بھر کی صورتحال کو خراب کررہا ہے ‘کچہری بازار میں ایک سائڈ پر پارکنگ کمپنی جبکہ دوسری سائڈ پر دکانداروں نے قبضہ کررکھا ہے جس کے باعث پیدل چلنا بھی دشوار ہوچکا ہے ‘انہوں نے کہا کہ شہر میں 3اہم مقامات ایسے ہیں جن کو پارکنگ پلازہ میں تبدیل کرنے کا پلان بنایا گیا تھا جن میں سے ایک مقام سابق میئر ہائوس بیرون چنیوٹ بازار پر پارکنگ پلازہ کی تعمیر ایک سال سے بھی زائد عرصہ قبل شروع کی گئی مگر معاملہ تاحال کھدائی تک پہنچ کررکاہواہے اسی طرح امین پور بازار اور بیرون کا رخانہ بازار پارکنگ پلازہ بنانے کی منصوبہ بندی کی گئی تھی مگر تاحال یہاں کوئی کام شروع نہیں کیا گیا اگر ان تینوں جگہات پر پارکنگ پلازہ جلد تعمیر نہ کئے گئے تو پھر شہر کی کسی بھی سڑک سے گزرنا ممکن نہیں رہے گا جس کے نتیجہ میں یہاں کاروبار زندگی مفلوج ہوجائے گا ‘وقت آگیا ہے کہ شہریوں کی فلاح و بہبودکی جانب بھر پور توجہ دی جائے ،اگرہم شہریوں کو آسانیاں فراہم نہ کرسکے تو وقت اور تاریخ انہیں کبھی معاف نہیں کرے گی ضرورت اس امر کی ہے کہ تینوں جگہات پر جتنی جلد ممکن ہو پارکنگ پلازوں کی تعمیر شروع کردی جائے کیونکہ یہی وقت کی آواز ہے۔
پیرمحل کی خبریں 15/3/2017
غزالی ایجوکیشن ٹرسٹ کی قومی خطاطی نمائش کے دوسرے روز خواتین گیلری کا افتتاح