nawaz sharif

مسلم لیگ ن کے صدر میاں نواز شریف کی بلوچستان کے مسئلے پر بلائی گئی آل پارٹیز کانفرنس میں شرکت، نواب بگٹی کے قاتلوں کی گرفتاری اور لاپتہ افراد کی بازیابی سے مشروط شرائط عائد کردی ہیں۔

اپنے ایک بیان میں میاں نواز شریف نے کہا کہ پہلے نواب اکبر بگٹی کے قاتلوں کو گرفتار اور لاپتا افراد کو بازیاب کروایا جائے، اس کے بعد آل پارٹیز کانفرنس بلائی جائے تو وہ موثر ہوگی۔

نواز شریف نے کہا کہ حکومت ان شرائط پر عمل درآمد نہیں کرتی تو اس آل پارٹیز کانفرنس کے نتائج بھی پہلے جیسی کانفرنس سے مختلف نہیں ہوں گے۔ انھوں نے کہا کہ حکومت مسائل کو حل کرنے میں سنجیدہ ہے تو پہلے وہ معاملات حل کئے جائیں جن کی وجہ سے بلوچ بھائی ناراض ہیں۔

ijaz

میمواسکینڈل کے مرکزی کردار منصور اعجاز میموکمیشن میں اپنا ویڈیو لنک پر بیان ریکارڈ کرانے کیلئے لندن میں پاکستان ہائی کمیشن پہنچ گئے۔ ان کا کہنا تھا کہ وہ بیان جمع کرانے کیلئے بہت دن سے بے چین تھے۔ انہوں نے کہا کہ وہ گھبرائے ہوئے نہیں ہیں۔

منصور اعجاز پاکستان وقت کے مطابق ایک بجکر پچاس منٹ پر لندن میں پاکستانی ہائی کمیشن پہنچے۔سیکرٹری میمو کمیشن راجہ جواد ہائی کمیشن میں موجود ہیں جبکہ نوازشریف کے وکیل رشید اے رضوی بھی جرح کیلئے موجود ہیں۔ پاکستان سے نوازشریف کے وکیل رشید اے رضوی بھی لندن پہنچے ہیں۔

میمو کمیشن کے سربراہ جسٹس فائز عیسی نے منصور اعجاز سے حلف لیا۔ کمیشن کے سوال ایک پر منصور کا کہنا تھا کہ وہ اردو نہیں بول سکتے۔ایک اور موقع پر انہوں نے کہا کہ وہ امریکی شہری ہیں۔ پہلی وفا داری امریکا کے ساتھ ہے۔

ادھر پاکستان میں میمو کیس میں حسین حقانی کے وکیل زاہد بخاری کا کہنا ہے کہ کمیشن سے درخواست کروں گا کہ جرح کے لئے مناسب موقع دیا جائے۔ اسلام آباد میں میڈیا سے گفتگو میں ان کا کہنا تھا کہ ویزا دیر سے ملا اس لئے لندن نہیں گیا، جاتا بھی تو دونوں طرف کی کارروائی کا حصہ نہیں بن سکتا تھا۔

kasab

بھارتی سپریم کورٹ میں محمد اجمل امیر قصاب کے مقدمہ میں حملے کے دوران حملہ آوروں اور پاکستان میں ان کے ہینڈلرز کے درمیان ہوئی بات چیت کی خفیہ ریکارڈنگ جمعرات کو سنی جائیگی۔حملے کے دوران فون پر ہوئی بات چیت کی خفیہ ریکارڈنگ کو ججوں اور فریقین کے وکلا کے سامنے سناجائے گا۔وکیلِ استغاثہ کا کہنا ہے کہ ممبئی پر حملہ پہلے سے طے شدہ منصوبہ کے تحت کیا گیا تھا اور حملے کے دوران فون پر ہوئی بات چیت اس کا واضح ثبوت ہے۔

ممبئی پر حملہ کرنے والوں میں سے واحد زندہ بچ جانے والے حملہ آوراجمل امیر قصاب نے اپنی موت کی سزا کے خلاف سپریم کورٹ میں اپیل دائر کی ہے۔انہیں حملے کے جرم میں ممبئی کی سیشن کورٹ اور ہائی کورٹ نے موت کی سزا سنائی تھی۔اسی پر سماعت کے دوران عدالت نے کہا کہ جمعرات کو دوپہر بعد دو بجے اس ریکارڈنگ کو سب کے سامنے سنا جائے گا۔مہاراشٹر حکومت کے وکیل گوپال سبرامنیم نے عدالت سے کہا تھا کہ حملے کے دوان ہینڈلرز سے جو بات چیت ہوئی ہے وہ اس بات کا پختہ ثبوت ہے کہ ممبئی پر حملہ ایک سوچی سمجھی سازش کے تحت کیا گیا تھا۔

انہوں نے عدالت سے کہا کہ حملہ آوروں نے ممبئی آنے کے لیے جس کوبیر نامی کشتی کا استعمال کیا تھا اس سے دستیاب ہوئی ڈائری سے صاف ظاہر ہے کہ تمام حملہ آور ایک ساتھ آئے تھے اور منصوبے کے تحت پہنچنے پر اپنے طے شدہ ہدف کے مطابق پانچ مختلف گروپوں میں تقسیم ہوگئے تھے۔گوپال سبرام منیم نے کہا کہ اس ریکارڈنگ کے سنے جانے میں کوئی مشکل نہیں ہے اور اس کے لیے عدالت میں تمام مناسب انتظامات کیے جائیں گے۔قصاب کے وکیل کا کہنا ہے کہ استغاثہ نے بھرپور انداز میں ان کے خلاف الزامات ثابت نہیں کیے اور یہ کہ ذیلی عدالتوں میں سماعت کے دوران انہیں ایک اچھے وکیل کے ذریعہ اپنا دفاع کرنے کا موقع نہیں دیا گیا تھا۔
اپنی پٹیشن میں قصاب نے کہا تھا انہیں اس جرم پر مائل کرنے کے لیے ایک روبوٹ کی طرح برین واش کیا گیا تھا اور ان کی کم عمری کو دیکھتے ہوئے انہیں سزائے موت نہیں دی جانی چاہیے۔
نومبر سنہ دو ہزار آٹھ میں دس شدت پسندوں نے ممبئی پر حملہ کیا تھا اور تقریبا تین دن جاری رہنے والی اس کارروائی میں ڈیڑھ سو سے زیادہ افراد ہلاک ہوئے تھے۔
حملہ آوروں میں سے اجمل امیر قصاب ہی زندہ پکڑے گئے جبکہ باقی سب مقابلے میں مارے گئے تھے۔ اجمل امیر قصاب اس وقت سے ممبئی کی آرتھر روڈ جیل میں قید ہیں۔

gas

گیس تقسیم کار کمپنیوں نے گیس کی فی یونٹ قیمت میں کمی کیلئے اوگرا کو درخواست دے دی۔ ذرائع کے مطابق سوئی ناردن کمپنی نے سات روپے بیس پیسے فی ایم ایم بی ٹی یو جبکہ سوئی سدرن کمپنی نے آٹھ روپے اٹھاسی پیسے فی ایم ایم بی ٹی یو گیس کی قیمت میں کمی کی درخواست کی ہے۔

ذرائع کے مطابق سوئی ناردن اور سوئی سدرن کمپنی نے قیمتوں میں کمی یکم جولائی سے نافذ العمل کرنے کی درخواست کی ہے۔

salim raza

سابق گورنر اسٹیٹ بینک سلیم رضا نے کہا ہے کہ حکومت غیر منافع بخش منصوبوں پر کام نہ کرے،پاکستانی معیشت کو تقویت دینے کے لیے معاشی ماہرین اہم کردار ادا کرسکتے ہیں۔ قائداعظم یونیورسٹی کے پاکستان انسٹیٹیوٹ آف اکنامک میں ایک لیکچر کے دوران سابق گورنر اسٹیٹ بینک نے کہا کہ حکومت اگر چاہتی ہے کہ ملک کی معیشت بہتر ہو تو امن وامان کی صورتحال کو بہتر بنایا جائے۔ انہوں نے کہا کہ یہ ایک بڑی غلطی ہوگی کہ حکومت ایسے منصوبوں پر کام کرے جو غیر منافع بخش ہو۔

libya

لیبیا کے شہر الکفرا میں عرب اور افریقی نسل گروہوں میں گزشتہ دس دنوں سے جاری لڑائی میں بڑی تعداد میں افراد ہلاک ہو چکے ہیں۔دارالحکومت طرابلس سے بارہ سو میل فاصلے پر واقع الکفرا میں عرب قبیلے زاوی اور افریقی قبیلے تیبو میں گزشتہ دس روز سیلڑائی جاری ہے۔کرنل قذافی کی حکومت کے خاتمے کے بعد لیبیا کی عبوری حکومت کو مسلح گروہوں کو کنٹرول کرنے میں دشواری پیش آ رہی ہے اور مختلف گروہ ملک کے مختلف حصوں پر اپنے تسلط قائم کرنے کی کوشش میں مصروف ہیں۔

اطلاعات کے مطابق الکفرا میں عرب قبیلہ زاوی افریقی قبیلے تبیو سے لڑ رہا ہے۔ تیبو قبیلے کو شکوہ ہے کہ معمر قذافی کے دور میں ان سے ناروا سلوک روا رکھا گیا تھا۔
لیبیا کے فوجی سربراہ یوسف المنگوش نے خبر رساں ادارے کو بتایا کہ الکفرا میں دور روز پہلے جنگ بندی کروا دی گئی تھی لیکن پیر کے روز نسلی تشدد پھر پھوٹ پڑا۔انہوں نے کہا کہ اگر الکفرا میں لڑائی بند نہیں ہوتی ہے تو پھر سرکاری افواج کو بھیجا جائے گا۔
گزشتہ ہفتے انسانی حقوق کے ادارے ایمنسٹی انٹرنیشنل کی مسلح ملیشیا ملک کے استحکام کے لیے خطرہ ہیں۔

khyber agency

پشاور : خیبر ایجنسی کی تحصیل باڑہ میں سڑک کنارے نصب بم دھماکے میں تین افراد جاں بحق اور دو زخمی ہو گئے۔ سیکیورٹی ذرائع کے مطابق دھماکا باڑہ کے علاقے جھانسی میں ہوا جہاں تین راہ گیر جاں بحق ار دو زخمی ہوگئے۔ زخمیوں کو قریبی اسپتال منتقل کر دیا گیا۔ واقع کے بعد سیکورٹی فورسز نے علاقہ کو گھیرے میں لے کر سیکیورٹی مزید سخت کر کے چیکنگ کا سلسلہ بڑھا دیا ہے۔

Rehman

کراچی : دارالعلوم حقانیہ اکوڑہ خٹک کے ترجمان نے وزیر داخلہ رحمان ملک کے الزامات کی تردید کردی، مولانا یوسف شاہ کہتے ہیں طلبا کا تمام ریکارڈ فراہم کر چکے ہیں۔ ذرائع سے بات کرتے ہوئے مولانا یوسف شاہ نے کہا کہ مدرسہ حقانیہ سے کئی افراد نے پڑھا ہے فارغ التحصیل ہو کر جانے والوں کا دارالعلوم حقانیہ سے کوئی تعلق نہیں رہتا۔ انہوں نے بتایا کہ بے نظیر بھٹو کے قتل میں جن پانچ افراد کے نام لیے جا رہے تھے ان میں دو افراد ایسے ہیں جنہوں نے مدرسہ حقانیہ سے پڑھا ان طالبعلموں کا ریکارڈ حکومت کو فراہم کر چکے ہیں۔

ترجمان دارالعلوم حقانیہ اکوڑہ خٹک نے کہا کہ وفاقی وزیر داخلہ رحمان ملک گرفتار افراد کو مدارس کے ساتھ نتھی کر کے مدارس کو بدنام کرنے کی کوشش کر رہے ہیں۔ انہوں نے کہا کہ بے نظیر بھٹو کے اصل قاتلوں کو بچانے کے لیے نیا ڈراما رچایا جا رہا ہے۔ مولانا یوسف شاہ نے کہا کہ رحمان ملک کو الزام لگانے سے پہلے حقائق کو مدنظر رکھنا چاہئے۔

italian ship

بھارتی ماہی گیروں کی ہلاکت کے ذمہ دار ٹھہرائیگئے اطالوی جہاز کے عملے کے دو ارکان کو عدالت نے چودہ روز کے لیے پولیس کی تحویل میں دے دیا ہے۔
اتوار کو انہیں اٹلی کے جہاز سے حراست میں لیا گیا تھا اور پیر کے روز ان دونوں ملزمان کو مجسٹریٹ کے سامنے پیش کیا گیا تھا۔دونوں افراد سے پہلے جہاز پر ہی پوچھ گچھ کی گئی تھی لیکن عدالت میں پیشی کے بعد کیرالا کی ایک ذیلی عدالت انہیں دو ہفتے کی پولیس ریمانڈ میں بھیجا ہے۔

گزشتہ بدھ کے روز ریاست کیرالا کے ساحل سمندر پر دو بھارتی ماہی گیروں کو گولی مار دی گئی تھی۔ اس واقعے میں پچیس سالہ آجیش بنکی اور پینتالیس سال کے جلاسٹین ہلاک ہوگئے تھے۔فائرنگ اطالوی جہاز سے ہوئی تھی جو سنگا پور سے مصر کی طرف جا رہا تھا۔ اطلاعات ہیں کہ اطالوی جہاز کے محافظوں نے بحری قزاقوں کے خطرے کے پیش نظر یہ سمجھ کرگولی چلائی تھی کہ شاید وہ لٹیرے ہیں۔اٹلی کا کہنا ہے کہ اس کے جہاز کے عملے نے اپنے تحفظ کے لیے ایسے اقدامات کیے تھے لیکن بھارت نے اس واقعے کو بہت افسوس ناک قرار دیا تھا۔

اسی مسئلے پر بھارت نے دلی میں اطالوی سفیر کو بھی طلب کیا تھا۔ ادھر اٹلی کے ایک سینیئر وزیر بھارتی حکام سے بات چیت کے لیے اتوار کو ہی دلی پہنچ گئے تھے۔
اٹلی کا موقف ہے کہ اس کے شہریوں پر بھارت میں بھارتی قانون کے مطابق مقدمہ نہیں چلا یا جا سکتا کیونکہ جہاز سمندر میں بین الاقوامی خطے میں تھا۔ لیکن بھارت ان پر مقامی قانون کے مطابق کارروائی کرنا چاہتا ہے۔اٹلی نے اس کے خلاف کیرالا ہائی کورٹ میں اپیل کرنے کا فیصلہ کیا ہے۔ اطلاعات کے مطابق اس مسئلے پر بھارت اور اٹلی کے درمیان شدید اختلافات سامنے آئے ہیں اور سفارتی سطح پر دونوں کے درمیان یہ ایک تنازعہ پیدا ہو گیا ہے۔

Nadra

حافظ آباد : پنجاب کے مختلف شہروں میں نادرا کے کنٹریکٹ ملازمین کا مستقل نہ کئے جانے کے خلاف تیسرے روز بھی احتجاج جاری ہے، دفاتر کی تالہ بندی سے شہریوں کو شدید دشواریوں کا سامنا کرنا پڑ رہا ہے۔ حافظ آباد میں نادرا کے کنٹریکٹ ملازمین نے مستقل نہ کئے جانے پر تیسرے روز بھی قلم چھوڑ ہڑتال کرتے ہوئے دفاتر کی تالہ بندی کی اور ضلعی دفتر کے باہر احتجاجی مظاہرہ کیا،مظاہرین نے اپنے مطالبات کے حق میں بینر اور پلے کارڈ اٹھا رکھے تھے،مظاہرین کا کہنا تھا کہ ریگولر لیٹرز نہ ملنے تک دفاتر کی تالہ بندی اور مظاہروں کا سلسلہ جاری رہے گا۔

نادرا ملازمین کا کہنا تھا کہ بہتر خدمات دینے کے باوجود انہیں نوکری سے برخاست کرنا نا انصافی ہے۔ لاہور، فیصل آباد، گوجرانوالہ، ڈسکہ، ملتان، میانوالی، منڈی بہاالدین، حافظ آباد، چنیوٹ سمیت دوسرے شہروں میں بھی نادرا ملازمین کی جانب سے احتجاج کا سلسلہ جاری ہے،جس کی وجہ سے شہریوں کو مشکلات کا سامنا ہے۔