لاہور(جیوڈیسک) پاکستان کرکٹ بورڈ نے سابق کپتان انضمام الحق کو قومی ٹیم کا چیف سلیکٹر اور مشتاق احمد کو نیشنل اکیڈمی کے ہیڈکوچ کے عہدے پر تعینات کردیا۔
چیئرمین پی سی بی شہریارخان نے انضمام الحق کے ہمراہ نیوز کانفرنس کرتے ہوئے انہیں قومی کرکٹ ٹیم کا چیف سلیکٹر اور مشتاق احمد کو نیشنل کرکٹ اکیڈمی کا ہیڈ کوچ بنانے کا اعلان کیا۔ اس موقع پر شہریار خان کا کہنا تھا کہ مجھے بہت خوشی ہے کہ انضمام الحق اب ہمارے ساتھ کام کریں گے اور وہ نئی سلیکشن کمیٹی کا اعلان خود کریں گے، کچھ مشہور کوچزپاکستان آنے کو تیار ہیں لیکن ہیڈ کوچ کے لئے ملکی یا غیر ملکی ہونا ضروری نہیں تاہم ہیڈ کوچ کا اعلان آئندہ چند روز میں کردیا جائے گا جب کہ محمد اکرم کی جگہ مشتاق احمد نیشنل اکیڈمی کے ہیڈکوچ ہوں گے، نیشنل اکیڈمی آزادانہ طریقے سے کام کرے گی۔
چیئرمین پی سی بی شہریار خان نے کہا کہ پاکستان کپ کے بعد ایبٹ آباد میں بوٹ کیمپ کوچنگ سیشن کروائیں گے اور یہ کیمپ 3 ہفتے تک جاری رہے گا، کرکٹ کی بہتری کے لئے اسکول کرکٹ کو پروموٹ کرنے کے لئے بھی کام کررہے ہیں جب کہ 8 سال سے بند بائیو مکینیکل لیب بھی فعال کردی گئی ہے۔
سابق کپتان انضمام الحق کا کہنا تھا کہ پاکستان کے لئے کسی بھی طرزکی خدمت میرے لیے بہت خوشی کی بات ہے، میں قومی ذمے داری کی ادائیگی کے لئے آیا ہوں اور کوشش کروں گا کہ اپنی ذمے داری سےانصاف کرسکوں، سلیکشن پینل کے لئے میرے دیے گئے نام بورڈ نے قبول کرلیے جس پران کا شکر گزار ہوں، میری ٹیم میں توصیف احمد، وجاہت اللہ واسطی اور وسیم حیدر سلیکٹرز ہونگے۔ انہوں نے کہا کہ میں بطور کپتان اپنی بات سلیکٹرز سے منوا تا تھا، سلیکٹرز اور کپتان کی رائے ماننی چاہیے، میں قومی ذمے داری کی ادائیگی کے لئے آیا ہوں جسے چھوڑ کرنہیں جاؤں گا۔
پاکستان کرکٹ کپ کا رنگا رنگ آغاز کل سے ہوگا
پی سی بی کی نااہلی؛ پاکستان کپ کیلئے بلوچستان میں شامل رمیز راجہ ’جونیئرز‘ فٹبال بن گئے