جہلم کی خبریں 21/2/2016

Jhelum

Jhelum

جہلم (ڈاکٹر مظہر مشر) سول کلب جہلم عدم ادائیگی بل پر واپڈا نے بجلی کا کنکشن منقطع کر دی، ضلعی افسران پریشانی کے عالم میں مبتلا۔ تفصیلات کے مطابق سول لائن پر واقع سول کلب جہلم جہاں مختلف ضلعی افسران قیام کرتے ہیں، واپڈا کی طرف سے اس ماہ 53 ہزار روپے بجلی کابل بھیجا جو کہ ادا نہ ہو سکا، جس کی وجہ سے واپڈا نے سول کلب کی بجلی کا کنکشن منقطع کر دیا ہے، بجلی نہ ہونے سے افسران شدید پریشانی کے عالم میں مبتلا ہوگئے ہیں، عوامی حلقوں نے سول کلب انتظامیہ کی طرف سے عدم ادائیگی بل پر حیرانگی کا اظہار کرتے ہوئے نااہلی قرار دیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جہلم (ڈاکٹر مظہر مشر) یونین کونسل کوٹلہ فقیر مسائلستان بن گیا ، راستوں کے بغیر بنیادی مرکز صحت اور یونین کونسل جیسے سرکاری ادارے قائم ۔بارش کے موسم میں پہنچنا محال ،عوامی حلقوں نے ڈی سی او جہلم سے توجہ کی اپیل کر دی۔ تفصیلات کے مطابق یونین کونسل کوٹلہ فقیر جو کہ ہزاروں نفوس آبادی پر مشتمل ہونے کے ساتھ ساتھ جہلم کی سب سے بڑی یونین کونسل میں شمار ہوتی ہے ، بہت سے مسائل درپیش ہیں ، سب سے بڑے مسائل دو سرکاری ادارے جن میں یونین کونسل کوٹلہ فقیر اور بنیادی مرکز صحت کو جانے والے راستے ہیں ، جو کہ سرکاری طور پر ابھی تک نقشہ میں موجود نہیں ہیں ، دونوں دفاتر زمینوں کے عین وسط میں ہونے کی وجہ سے راستوں سے محروم ہیں ، جب بارش ہوتی ہے تو راستے کیچڑ آلود ہونے کی وجہ سے گذرنا محال ہوجاتا ہے ، متعدد بار ایمر جنسی ہونے کی صورت میں مریض ہسپتال میں نہیں پہنچ سکتے ، جس کی وجہ سے انہیں دوردراز کے ہسپتالوں میں لے جانا پڑتا ہے ، عوامی حلقوں نے ڈی سی او جہلم اقبال حسین خان سے اپیل کی ہے کہ وہ ان دونوں سرکاری اداروں کے راستوں کا تعین کرتے ہوئے پختہ کروائیں تا کہ لوگوں کیلئے آسانی ہوسکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جہلم (ڈاکٹر مظہر مشر/چوہدری غلام مرتضے) ڈسٹرکٹ بار جہلم میں سیرت النبیۖ کانفرنس کا انعقاد ، معروف سکالر عرفان الحق کا خطاب۔ تفصیلات کے مطابق ڈسٹرکٹ بار ایسوسی ایشن جہلم میں گزشتہ روز سالانہ” سیرت النبی کانفرنس ” کا انعقاد ہوا ، جس میں وکلاء کے علاوہ ڈسٹرکٹ سیشن جج ملک محمد رفیق ، ایڈیشنل ججز صاحبان و سول ججز صاحبان کے علاوہ اسسٹنٹ کمشنر جہلم اور بار سٹاف ممبران نے شرکت کی ، کانفرنس کا آغاز حافظ سمیع کھوکھر ایڈووکیٹ نے تلاوت کلام پاک سے کیا ، نعت رسول پاکۖ کی سعادت سید ثاقب علی ایڈووکیٹ ، عابد حسین عابد ایڈووکیٹ ، ملک ریاض انور ایڈووکیٹ ، مرزا عبدالغفور ایڈووکیٹ اور مش ندا سجاد ایڈووکیٹ نے حاصل کی ، کانفرنس میں صدارت کے فرائض صدر ڈسٹرکٹ بار ملک عبدالغفور ایڈووکیٹ نے سر انجام دیئے جبکہ نقابت کے فرائض جنرل سیکرٹری میاں نصیب احمد ایڈووکیٹ نے ادا کئے ، سالانہ ”سیرت النبیۖ کانفرنس” میں ملک کے معروف سکالر پیر عرفان الحق نے نبی آخر الزمان ۖ کی حیات طیبہ پر تفصیلی روشنی ڈالتے ہوئے زندگی کو گذارنے کی کامیابی قرار دیا ، انہوں نے کہا کہ در اصل رسول پاکۖ کی زندگی کا طریقہ ہی ہمارے لئے مشعل راہ ہے ، جس پر چل کر دونوں جہانوں میں کامیاب ہوسکتے ہیں ،اس موقع پر درود و سلام بھی پیش کیا گیا، آخر میں حافظ سمیع کھوکھر ایڈووکیٹ نے اجتماعی دعا کی جس میں انہوں نے ملکی سلامتی کیلئے خصوصی دعا فرمائی۔