یوم مئی الکاسب حبیب اللہ

1st May Day

1st May Day

تحریر : انجینئر افتخار چودھری
جنگ خندق گئو زمانہ تھئومدینہ گا مسلماناں ناں پتا لگئو جئے مکہ گا کافر بدر گی شکست کھایاگئے بعد بہئوں غصہ وچ ایں قریش گئے سرداراں نے فیصلو کیتو کہ سارا مل گئے مدینے پر حمل کراں تئے مسلماناں ناں تباہ کراں ۔اللہ گا نبی گا علم وچ جد ایہ گل آئی تئے پیار نبی نان پتو لگو تئے اونہاں نے فیصلو کیتو کہ مدینہ گئے بار نکل گئے ہک ڈونگی جئی خندق کھناں تا کہ کافر مارا پر حملہ نہ کر سکیں۔ یا تجویز ہک صحابی حضرت سلمان فارسی نے دتی ،سارا لوگ اس کم پر لگ گیا ہک دن صحابی اللہ گا پیارا نبیۖ گا کول آیا تے اپنا پیٹ پروں پلو چایو تئے آکھیو اللہ گا رسول بھک نیں تنگ کیتو ائے یا تکو میرا پیٹ پر پتھر بدو ائے ۔ اپنا صحابی گا ٹڈ پور بدیا پتھر تک کے مارا پیارا رسولۖ گی اکھاں وچ اتھرو آیا تئے نال ای اپنا پیٹ پروں پلا چایو تے ہت دو پتھر بندا اویا تھا۔

میں ایہ مث ال اج اس ماریوں دتی ائے کہ ہن ایناں دیاڑیاں وچ مزدوراں گئو عالمی دن منایا جئے گئو شکاگوگا مزدوراں ناں سلام عقیدت پیش کیتو جئے گئو میں ایس گل گئے قطعا مخالف نئیں کہ یا دن نا منایا جئے پر سچی گل دسوں اے ہم سارایں گلاں گئے باوجود چنگیاں گلاں لوڑن واسطے غیر مسلماناں گئی طرف تکناں شروع کردیاں مارا اپنا دین مکمل ائے مارا کول ایہا جئی مثال موجود ایں جیڑی دنیا گا لوگ اپنیاں لوکاں ناں دسیں۔ ہک ہور گل وی دسوں ایں مارا نبیۖ نے یا گل وی کیتی ائے کیہ مزدور گی مزدوری اس گا پسینہ خشک ہویا تئوں پیلیوں دینی چائی گی اے۔

شکاگو کا مزدور کیہ منگے تھاں سو ڈیڑھ سو سال پیلوئوں اونہاں نے سرکار کولوں مطالبو کیتو تھو کہ ہمناں اٹھ گھنٹہ مزدوری گی اجازت دیتی جئے ہمناں ہفتہ وچ ہک چھٹی دتی جئے ہویو کئے کہ ظالماں نے اونہاں گا حق دیا گی بجائے اونہاں پر گولی چلا چھوڑی تئے فیر رولو بنیو۔

مزدور گی زندی شکاگو گئے مزدوراں گی ہس جدوجہد گئے بعد وی کوئی سوکھی تئے نئی ہوئی ہن وی تم تک لیو مزدوراں نا ویلا پر پیسہ نئیں ملتا اخباراں گا مزدور اینہاں گی حالت میرو خیال ایئے ساریاں کولہوں ماڑی اے مالکان اپنی دکانداری چمکا کئے مزہ پیا کریں تئے دوئی طرف ایہ بیچارہ کئیاں مہینیاں ناں ترسیں۔

مظہر اللہ نال اوس دیہاڑے گوجری کالم گئو ذکر کیتو آکھن لگو چودھری صاحب تھارو ہک ا ای کالم آیو میں آکھیا دو لکھیاں تھا۔

اس گا بار بار آکھنو تئے میں تری وار لکھنو شروع کیتو۔ کالم گئو عنوان بھی اوسے گئو ائے کہ یوم مئی آیو تئے تم اپنی طرفوں ہک ہور گجوری کالم لکھو۔سچ پوچھو تئے اقبال نے سچ ای آکھیو تھو تو قادر و عادل ہے مگر تیرے جہاں میں ہیں تلخ بہت بندہ ء مزدور کے اوقات اقبال نے سو سال پیلیوں لکھیو تئے اج وی گل سچی اے کہ مزدوراں گا کوئی حال نئیں۔دیہاڑ دار تئے مولوں ای گیا گزریاں ایں۔یورپ نے البتو صنعتی مزدوراں گا خیال رکھیو وئے اونہاں ناں چنگ معاوضو دتو وئے کم گا دوران سستا کھانو یا مفت روٹی علاج معلجہ گی سہولت ریاء واسطے جا تئے ہور بہنو ساری سہولت دتی ایں جیہڑی کمپنی اپنا مال بائر بھیجیں اونہاں ناں وی مجبورا اپنیاں مزدوراں گا خیلا کرنو پیو ورنہ عام کمپنی ہلیا نئیں تئے سلیا نئیں گئے برابر کنوں پکڑ کئے مزدوراں ناں باہر کڈیں کوئی علاج معالجو گئی سہولت بچیاں گئی تعلیم معذوری کی صورت وچ فارغ۔حکومت گا قانون چنگا ایں اولڈ ایج بینفیٹ فنڈز گا پیسہ موجود ایں بڈی بڈی بلڈنگ تئے بن گئی ایں پر مزدور اوتھے گا اوتھے ای پکھ ننگ گئو شکار ائے۔میں اپنیاں وزیر بھراواں کولوں بنتی کروں کئے اللہ گا ایناں بندیاں گئو وی خیال کریں۔

روٹ ٹکڑو تئے کتا ناں وی لبھ جئے انسان اشرفالمخلوقات ائے ایس ناں جیناں گا حق دئیو۔انگریز تئے ایس ملک وچوں چلو گیو پر کالا انگریز جدوں اقتتدار گئو گھوڑا چڑھیو تئے اوس نے ظلم جبر گئی او انت پائی ائے کہ الحفیظ الاماں آکھیوں بغیر نئی ریو جا سکتو۔

ہن گرمی شروع ہوئی ایں اللہ نے بہنو ساریاں ناں ہمت دتی ائے کے او لوگگ اپنیاں گھراں گئے بار ٹھنڈہ پانی گی سبیل لائیں مزدوراں ناں مزدوری دیتا وقت متھو پر کروٹھ ناں پائیں ۔جیہڑی طے کیتی ائے اوس کولوں اگر پجا بد چا دئیو تو گھمتا نئیں۔میں تمناں ہک مثال دیوں گئے میرو پتر ڈاکٹر ایئے میں پچھلے دیہاڑیاں اوس کول گجرانوالہ گیو تک تکیو کہ نوکرانی ناں قرآن پڑھایا آلی کول بٹھا کے اللہ گی کتاب پڑھاوے۔اج چھیواں مہینو وئے وا کڑی اپنی ماں کول پنڈی نئیں آئی یا اک چھوٹی جئی مثال ائے۔سنگیو تئے دوستو!کسے ہک شخص کی جان سوکھی کرکے اللہ گئی رضا حاصل کریا واسطے اج ای وعدہ کراں۔

یوم مئی گا ہس موقع پر تھارا اگے ہک ای درخواست ائے کہ اپنے سجے کھبے کسے مزدور نہ تکئو تو کول کھل کے اس کا دکھ سنو ہک گلاس ٹھنڈہ پانی گئو ہو سکے ہس اس گا منہ پر خوشی لئے آوے۔شکاگو گئے مزدورو تھارو وی شکریہ اور صدقے ہس کالی کملی پر جس کا پیٹ پر پتھر وی تھا اور ہونٹاں پر مسکراہٹ یوم مئی مبارک وئے

Engineer Iftikhar Chaudhry

Engineer Iftikhar Chaudhry

تحریر : انجینئر افتخار چودھری