خودکش حملوں کیخلاف ملک بھر میں یوم مذمت منایا گیا

Hazrat Pir Muhammad Afzal Qadri

Hazrat Pir Muhammad Afzal Qadri

لاہور : دہشت گردی اور خودکش حملوں کیخلاف تحریک لبیک یارسول اللہ کی اپیل پر ملک بھر میں یوم مذمت منایا گیا۔ اجتماعات جمعہ کے موقع پر مذمتی قرار دادیں منظور کی گئیں۔

خطباء اسلام نے ”انسداد دہشت گردی” کے موضوع پر خطابات کئے اور سیہون شریف میں سید سخی عثمان المعروف لعل شہباز قلندر کے مزار پر حملے اور دیگر حالیہ خودکش حملوں کی شدید مذمت کی۔

جبکہ مفتی اعظم پیشوائے اہلسنت حضرت پیر محمد افضل قادری کی سربراہی میں سینکڑوں مفتیان کرام نے دہشت گردی اور خودکش حملوں کیخلاف فتویٰ جاری کردیا ہے۔ جس میں کہا گیا کہ خود کش حملے ناجائز، حرام وممنوع ہیں۔

ناحق قتل کرنے والوں کیلئے دنیا وآخرت میں سخت سزائیں اور عذاب کی وعیدیں ہیں۔ فتویٰ میں مزید کہا گیا کہ وطن عزیز کیخلاف اندرونی وبیرونی سازشوں کے خاتمہ کیلئے قوم متحد ہوجائے اور ذمہ دارن وطن ملکی پالیسیوں کی اصلاح کریں۔

اس موقع پر ملک بھر میں خود کش حملوں کے نتیجے میں شہید ہونیوالوں کے درجات کی بلندی اور زخمیوں کی جلد صحت یابی کیلئے دعائیں کی گئیں۔ اور حکومت سے مطالبہ کیا کہ وہ ان دھماکوں کے ذمہ داروں اور سہولت کاروں کو کیفر کردار تک پہنچائیں۔
شبیر ساہی