لاہور (جیوڈیسک) دورہ زمبابوے کے لئے ٹی ٹوئنٹی اور ون ڈے جب کہ انگلینڈ کے خلاف ٹیسٹ سیریز کے لئے قومی ٹیم کا اعلان کر دیا گیا تاہم تجربہ کار بلے باز یونس خان ایک بار پھر ون ڈے اسکواڈ میں جگہ نہیں بنا سکے جب کہ سعید اجمل کسی بھی ٹیم کا حصہ نہیں ہیں۔
پی سی بی نے دورہ زمبابوے اور متحدہ عرب امارات میں انگلینڈ کے خلاف ٹیسٹ سیریز کے لئے قومی ٹیم کا اعلان کر دیا ہے۔ ٹی ٹوئنٹی اور ون ڈے کے لئے اظہر علی اور شاہد آفریدی جب کہ ٹیسٹ میں مصباح الحق کپتان ہوں گے۔
قومی ٹی ٹوئنٹی ٹیم میں شاہد آفریدی، احمد شہزاد، عمر اکمل، محمد رضوان، شعیب ملک، محمد عرفان، وہاب ریاض، مختار احمد، محمد حفیظ، عامر یامین، بلال آصف، عماد وسیم، سہیل تنویر اور عمران خان جونیئر شامل ہیں۔
زمبابوے کے خلاف قومی ون ڈے ٹیم میں اظہر علی، محمد حفیظ، احمد شہزاد، صہیب مقصود، شعیب ملک، بابر اعظم، سرفراز احمد، محمد رضوان، وہاب ریاض، انور علی، یاسر شاہ، راحت علی، عماد وسیم اور اسد شفیق کو شامل کیا گیا ہے۔
یاد رہے کہ قومی ٹیم زمبابوے کے خلاف 27 اور دوسرا 29 ستمبر کو 2 ٹی ٹوئنٹی میچز کھیلے گی جب کہ دونوں ٹیموں کے درمیان یکم اکتوبر سے ون ڈے سیریز کا آغاز ہوگا، دوسرا ایک روزہ میچ 3 اور تیسرا 5 اکتوبر کو ہرارے میں کھلا جائے گا۔
پی سی بی نے انگلینڈ کے خلاف 13 اکتوبر سے یو اے ای میں شروع ہونے والی ٹیسٹ سیریز کے لئے بھی ابتدائی کھلاڑیوں کے ناموں کا اعلان کردیا ہے۔ ٹیسٹ اسکواڈ کے لئے مصباح الحق کو ہی کپتان برقرار رکھا گیا ہے جب کہ دیگر کھلاڑیوں میں یونس خان، شاد مسعود، اسد شفیق، وہاب ریاض، راحت علی، یاسر شاہ، محمد حفیظ، فواد عالم، سرفراز احمد، بابر اعظم، عمران خان اور جنید خان شامل ہیں۔
انگلینڈ کے خلاف پریکٹس میچز کے لئے بھی ٹیم کا اعلان کیا گیا ہے جس میں سمیع اسلم، خرم منظور، فواد عالم، عمر امین، علی اسد، افتخار احمد، عثمان صلاح الدین، عدنان اکمل، محمد اصغر، ظفر گوہر، جنید خان، احسان عادل، ضیاء الحق اور امیر حمزہ کو شامل کیا گیا ہے۔
واضح رہے کہ پی سی بی کے سنٹرل کنٹریکٹ میں بی کیٹیگری حاصل کرنے والے جادو گر اسپنر سعید اجمل کسی بھی ٹیم میں شامل نہیں ہیں جب کہ ملتان ریجن سے تعلق رکھنے والے آل راؤنڈر عامر یامین اور پشاور کی ٹیم سے تعلق رکھنے والے مختار احمد کو ٹیم کا حصہ بنایا گیا ہے۔
سرفراز احمد اور انور علی فریضہ حج کی ادائیگی کی وجہ سے زمبابوے کے خلاف ٹی ٹوئنٹی ٹیم کا حصہ نہیں ہوں گے۔ سرفراز احمد کی جگہ محمد رضوان یا عمر اکمل وکٹ کیپنگ کے فرائض انجام دین گے جب کہ انور علی کی جگہ عمران خان جونیئر کو ٹی ئنٹی میں شامل کیا گیا ہے۔ عمران خان جونیئر نے حال ہی میں ہونے والے قومی ٹی ٹوئنٹی ٹورنامنٹ میں 16 وکٹیں حاصل کر کے سب سے بہترین بالر کا اعزاز حاصل کیا ہے۔
سیاسی پارٹیوں کو ملک میں آئین و قانون اور میرٹ کی بالا دستی کیلئے کام کرنا چاہئے، راشد نسیم
نیو کریم بلاک روڈ پر سٹیٹس کالج کے طلبہ کا روڈ بلاک کر کے احتجاج