وزیرآباد کی خبریں 6/9/2016

Abida Toosi

Abida Toosi

وزیرآباد (نامہ نگار) محکمہ پوسٹ آفس سے بروقت پینشن کی ادائیگی نہ ہونے اور سہولیات کے فقدان پر بزرگ پینشنروں نے شدید احتجاج کیا۔ مظاہرین نے بتایا کہ محکمہ کی طرف سے بروقت پینشن نہ ملنے کی وجہ سے ان کے گھریلو معاملات بری طرح متاثر ہوتے ہیں۔ ڈاکخانے میں لمبی قطاریں لگی رہتی ہیں جبکہ بزرگ مرد وخواتین پینشنرز کے بیٹھنے کا بھی مناسب بندوبست نہیں ٹھنڈے صاف پانی اور ہوا کا انتظام نہ ہونے کی وجہ سے اکثر ضعیف پینشرز بے ہوش ہو جاتے ہیں، انہوں نے بتایا کہ ابھی تک پینشن میں سالانہ انکریمنٹ نہیں لگائی گئیںنئے نئے فارم دیکر ذلیل وخوار کیا جاتا ہے ۔ پینشنرز نے مطالبہ کیا ہے کہ ان کی پیشنز کو کمپیوٹر ائزڈ کرتے ہوئے انہیں کارڈ جاری کئے جائیں تا کہ انہیں ہر ماہ پریشانی کا سامنا نہ کرنا پڑے۔دوسری جانب ہیڈ پوسٹ ماسٹر محمد رضوان نے بتایا کہ پینشن لینے کیلئے آنے والے افراد پینشن فارم پُر کر کے نہیں لاتے جس کی وجہ سے وقت کا ضیاع ہوتا ہے۔انہوں نے کہا کہ محکمہ کی جانب سے ملنے والی ہدایات پر عملدرآمد کیا جاتا ہے اور ہر ممکن حد تک پیشنرز کو سہولیات دی جاتی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیرآباد(نامہ نگار)ستمبر1965ء کی صبح سویرے مکار بھارت کی افواج نے پاکستان کے علاقہ لاہور کے محاذ پر حملہ کیا۔ انہوں نے بزدلانہ طریقہ سے وزیر آباد کے نزدیکی ریلوے اسٹیشن پر ٹھہری ہوئی مسافر گاڑی پر گولیاں برسائیں، وزیر آباد سے لاہور جانے والی بابو ٹرین جس میں مزدور’ سرکاری ملازم اور طالب علم سفر کرتے ہیں اور ابھی یہ گاڑی چند کلومیٹر کا سفر طے کرکے دھونکل ریلوے اسٹیشن پہنچی تھی کہ بھارتی فضائیہ کے جنگی طیاروں میں نصب مشین گنوں نے مسافر ٹرین پر آگ اور بارود کی بارش برسا دی۔ طیاروں سے اگلتی گولیوں کی زد میں آکر متعدد معصوم مسافر شدید زخمی جبکہ میڈیکل کی طالب علم عابدہ طوسی وطن پر قربان ہو کر جنگ ستمبر 65ء کی پہلی شہید ہونے کا اعزاز پا گئیں۔ عابدہ طوسی نے یکم جنوری 1945ئ کو وزیر آباد کے ایک معزز علمی گھرانے میں آنکھ کھو لی۔ آپ کے والد محمد شریف طوسی ماہر تعلیم’ ادیب اور بانی پاکستان کے پولیٹیکل سیکرٹری تھے۔ شہید وطن عابدہ طوسی اپنے پانچ بھائیوں ڈاکٹر ہمایوں طوسی’ ہارون طوسی’ اختر طوسی’ انور طوسی’ ناصر طوسی اور ایک بہن زاہدہ طوسی میں دوسرے نمبر پر تھیں۔ طوسی خاندان قدیم و جدید علوم میں غیر معمولی دسترس کا حامل ہے۔ شہید عابدہ طوسی کے چچا خواجہ حفیظ طوسی مغربی پاکستان کے گورنر ملک امیر محمد خان کے ذاتی معالج اور سیکرٹری صحت پنجاب رہ چکے ہیں۔ جنگ 6 ستمبر کی پہلی شہید عابدہ طوسی بہت ہونہار طالبہ تھیں۔ شہید عابدہ طوسی کو وزیر آباد کے تاریخی پیر مٹھا قبرستان میں مدفون ہیں۔ شہریوں کی بڑی تعداد آج پیر مٹھا قبرستان میں حاضر ہو کرشہید کیلئے فاتحہ خوانی کرے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیرآباد(نامہ نگار)گیپکوکی پریس ریلیز کے مطابق کھمبوں کی تنصیب و دیگر ضروری ترقیاتی کاموں کے سلسلہ میں24,20,17,10,06اور 27ستمبر کو 132کے وزیر آباد گرڈاسٹیشن کے پولو کے،ہےڈ خانکی،پی این پی،کولار،حاجی پورہ،مردیکے،فتح گڑھ فیڈروں پرصبح 08بجے سے03بجے تک،اسی طرح اور2821,07ستمبر کو 132کے وی فتح پورگرڈاسٹیشن علی پور، کلانیاں والا، رسول نگر، مدن چک، مانسر،لدھے والا، ورپال،بومہ باتھ، چناب بورڈ فیڈروںجبکہ26,22,19,15,08اور 29ستمبر کو 132کے وی کینٹ گرڈ اسٹیشن کے گارڈن ٹائون،راہوالی،علامہ اقبال،ڈیفنس،ڈی سی کالونی،شریف فارم،فوریسٹ کالونی اورانکم ٹیکس فیڈروں اور09اور16ستمبر کو 132کے وی نیو ڈسکہ ،انڈسٹریل گرڈاسٹیشن کے وی کالج روڈ،ڈسکہ ٹو،پسرور روڈ،ڈسکہ تھری،اپالو فیڈروں پر صبح 09 بجے سے سہ پہر03بجے تک بجلی کی سپلائی معطل رہے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیرآباد: شہریوں کے جان ومال کے محافظ ادارے پولیس کی ترجیحات بدل گئیں۔شہری جرائم پیشہ افراد کے رحم وکرم پر۔ عید الاضحی کی آمد کے پیش نظر نوسر بازوں ، ڈکیتوں کی سرگرمیاں بڑھ گئیں، شہری جگہ جگہ لٹنے لگے۔ بینکوں سے رقوم نکلوا کر خیریت سے گھروں تک پہنچنا مشکل ہو گیا۔ شہریوں کا اعلیٰ حکام سے فوری اصلاح احوال کا مطالبہ۔وزیرآباد شہرمیں ایک عرصہ سے چوری ڈکیتی کی وارداتوں میں اضافہ ہو چکا ہے۔ڈاکواور نوسرباز مختلف مقامات پر شہریوں کو روک کر آسانی سے لوٹ لیتے ہیں مگر پولیس کی مدد کا کہیں نام و نشان نظر نہیں آتا ۔شہر کے اہم ترین چوک کچہری کے اطراف میں بیشتر مالیاتی ادارے موجود ہیں جہاں روزانہ ہزاروں شہری رقوم جمع کروانے اور نکلوانے کی غرض سے آتے ہیں پولیس تھانہ سٹی کی طرف سے کاغذوں میں جن شیر جوانوں کی ڈیوٹیاں لگائی جاتی ہیں وہ مختلف مقامات پر خوش گپیوں میں وقت گزاری سے کام لیتے ہیں جبکہ ڈکیت آسانی سے اپنا ہدف پورا کرلیتے ہیں۔چند دنوں میں ڈکیتی کی متعدد وارداتوں میں شہری لاکھوں روپے نقدی اور قیمتی اشیاء سے محروم ہوچکے ہیں۔بعض اہلکار مقررہ مقامات پر ڈیوٹیوں کی بجائے مرضی کے مقامات پر قومی رضا کاروں کے ہمراہ خود ساختہ ناکے لگا کر شریف شہریوں ، نوجوانوں کی موٹر سائیکلوں کو روک کر ان کی نہ صرف جامع تلاشی لیتے بلکہ ان کے منہ بھی سونگھتے ہیں اکثر و بیشتر موٹر سائیکل یا گاڑی کے کاغذات وقتی طور پر پاس نہ ہونے پر گاڑی زیر دفعہ 550ت پ تھانے بند کرنے کی دھمکی دیکر سوار سے مال پانی بٹور کر چھوڑتے ہیں جبکہ مال پانی لینے کے لیے بیشتر ناکوں پر رضا کاروں کو ہی آگے کیا جاتا ہے اور کسی شہری کے استفسار پر اسکی موقع پر درگت بناتے ہوئے مشکوک ملزم کے پکڑے جانے کی وائرلیس کال چلادی جاتی ہے۔شہریوں کا کہنا ہے کہ پولیس اہلکاروں کی ترجیحات بدل گئی ہیںشہریوں کے جان ومال کے تحفظ،چو ر ڈاکوؤں اور دہشت گردوں کو پکڑنے کی بجائے شرفاء کو تنگ کرنے کا فریضہ سرانجام دے رہی ہے ۔عید کی شاپنگ کے دوران کاروباری مراکز کے باہر لٹنے کا خوف رہتا ہے۔ پولیس کے اہلکاروں سے رابطہ کیا تو انہوں نے کہا کہ ہم پولیس کے اعلیٰ حکام کے حکم پر ڈکیتی ،راہ زانی،چوری کی روک تھام کرنے کیلئے کام کر رہے ہیں۔ شہریوں نے،آئی جی پنجاب پولیس ،وزیر اعلیٰ پنجاب محمد شہباز شریف سے فوری اصلاح احوال کا مطالبہ کیا ہے۔