ویسٹ انڈین کرکٹ بورڈ کی ڈیرن سیمی کو مبارکباد کے بجائے وارننگ

Darren Sammy

Darren Sammy

جمیکا (جیوڈیسک) ٹی ٹوینٹی ورلڈ کپ کے فاتح اسکواڈ کے کپتان ڈیرن سیمی کو ویسٹ انڈین کرکٹ بورڈ نے شاندار فتح پر مبارکباد دینے کے بجائے وارننگ جاری کرتے ہوئے کہا ہے کہ کپتان کرکٹ بورڈ کی عزت خراب کرنے کا باعث بنے۔ویسٹ انڈین کرکٹ بورڈ کے صدر نے ٹی ٹوینٹی ورلڈ چیمپئینز کے کپتان ڈیرن سیمی پر برہمی کا اظہار کرتے ہوئے کہا ہے کہ عالمی کپ کے بعد کپتان ڈیرن سیمی نے غیر مناسب گفتگو کی، وہ کرکٹ بورڈ اور کھلاڑیوں کے درمیان ہونے والے اندرونی مسائل کو دنیا کے سامنے پیش کرکے کرکٹ بورڈ کی عزت خراب کرنے کا باعث بنے ہیں ۔ بورڈ کی جانب سے کپتان ڈیرن سیمی متنبہ کیا گیا ہے کہ آئندہ ایسے بیانات سے اجتناب کریں ورنہ سخت کارروائی کی جائے گی۔

کریبئین کرکٹ بورڈ کے صدر نے ڈیرن سیمی کے الفاظ کو مایوس کن قرار دیتے ہوئے کہا کہ رواں سال مئی میں بورڈ سالانہ جائزہ لے گا اور مالی تنازع کے حوالے سے کھلاڑیوں کے ساتھ مل کر کوئی بھی درمیانہ راستہ نکالا جائے گا ۔واضح رہے کہ ورلڈ ٹی ٹوینٹی کے فائنل میچ کے بعد ڈیرن سیمی نے ویسٹ انڈین کرکٹ بورڈ کی کی جانب سے کھلاڑیوں کے ساتھ ہتک آمیز رویئے کا پول کھول دیا تھا۔ ان کا کہنا تھا کہ انہیں کرکٹ بورڈ کے علاوہ کربیئن کمیونٹی کے سربراہوں کی جانب سے بھرپور حمایت حاصل تھی اور گریناڈا کے وزیر اعظم کیتھ مچل کی جانب سے ٹیم کے نام ای میل بھی موصول ہوئی اور فون بھی آیا جب کہ ورلڈ کپ میں شمولیت سے قبل ہمارے پاس یونیفارم تک نہیں تھے۔ ہمارے منیجر نے ہم سے پہلے کولکتہ پہنچ کر ہماری تمام ضروریات کا انتظام کیا۔