بدلی بدلی سی فضا لگتی ہے

badli badli si faza

badli badli si faza

بدلی بدلی سی فضا لگتی ہے
ساری دنیا ہی خفا لگتی ہے

دل کا دروازہ کھلا چھوڑ دیا
تیرے قدموں کی صدا لگتی ہے

سینکڑوں چھید ہیں اس میں لیکن
کتنی اچھی یہ ردا لگتی ہے

چاند ہو جیسے ستاروں سے الگ
ایسے نینوں میں حیا لگتی ہے

تیری قربت میں جھکی سی یہ نظر
ایک معصوم دعا لگتی ہے

مرحلہ موت کا مشکل ہے مگر
زندگی اس سے سوا لگتی ہے

اب کے روٹھے، نہ منایا تم نے
یہ بچھڑنے کی ادا لگتی ہے

کس کی آنکھوں کا اثر ہے یہ بتول
کالی کالی سی گھٹا لگتی ہے

فاخرہ بتول