مہک اٹھا ہے آنگن اس خبر سے

Posted on March 8, 2012 By Adeel Webmaster جون ایلیا

مہک اٹھا ہے آنگن اس خبر سے
وہ خوشبو لوٹ آئی ہے سفر سے

جدائی نے اسے دیکھا سرِ بام
دریچے پر شفق کے رنگ برسے

میں اس دیوار پر چڑھ تو گیا تھا
اتارے کون اب دیوار پر سے

گلہ ہے اک گلی سے شہرِ دل کی
میں لڑتا پھر رہا ہوں شہر بھر سے

اسے دیکھے زمانے بھر کا یہ چاند
ہماری چاندنی سائے کو ترسے

مری مانند گزرا کر مری جاں
کبھی تو خود بھی اپنی راہگزر سے

جون ایلیا