کھنڈر آنکھوں میں غم آباد کرنا

Posted on March 29, 2012 By Adeel Webmaster محسن نقوی

کھنڈر آنکھوں میں غم آباد کرنا
کبھی فُرصت ملے تو یاد کرنا

اذیت کی ہوس بجھنے لگی ہے
کوئی تازہ ستم ایجاد کرنا

کئی صدیاں پگھلنے کا عمل ہے
بدن سے روح کو آزاد کرنا

ابھی کیسی پرستش بجلیوں کی؟
ابھی گھر کس لیے برباد کرنا

تمہارا جھوٹ، سچ سے معتبر ہے
مرے حق میں بھی کچھ ارشاد کرنا

عجب ہے دھوپ چھائوں ہجرتوں کی
کبھی ہنسنا کبھی فریاد کرنا

جہنم جھیلنے سے بھی ۔۔۔۔۔۔۔ کٹھن ہے
اَنا کو خوگرِ بیداد ۔۔۔۔۔۔۔۔۔۔۔۔۔۔۔ کرنا

کبھی پتھر سے سر ٹکرا کے محسن
ادا قرض سرِ فرہاد کرنا

محسن نقوی