گاہے بگاہے بس اب یہی ہو کیا

Posted on March 7, 2012 By Adeel Webmaster جون ایلیا

گاہے بگاہے بس اب یہی ہو کیا
تم سے مل کر بہت خوشی ہو کیا

مل رہی ہو بڑے تپاک کے ساتھ
مجھ کو یکسر بھلا چکی ہو کیا

یاد ہیں اب بھی اپنے خواب تمہیں
مجھ سے مل کر اُداس بھی ہو کیا

اب میری کوئی زندگی ہی نہیں
اب بھی تم میری زندگی ہو کیا

کیا کہا عشق جاودانی ہے!
آخری بار مل رہی ہو کیا

میرے سب طنز بے اثر ہی رہے
تم بہت دور جا چکی ہو کیا

دل میں اب سوزِ انتظار نہیں
شمعِ امید بجھ گئی ہو کیا

جون ایلیا