قومی یوم فرانس

Posted on July 14, 2017 By Geo Urdu بین الاقوامی خبریں, فرانس

قومی یوم فرانس 14 جولائی 1789ء کو بغاوتِ بیسٹائل کی یاد میں منایا جاتا ہے، جو انقلاب فرانس میں ایک اہم واقعہ تھا۔ اس کے علاوہ یہ Fête de la Fédération کی یاد بھی ہے جو 14 جولائی 1790ء فرانسیسی عوام کے متحد ہونے کی یادگار ہے۔ اس موقع پر فرانس بھر میں جشن منایا جاتا ہے۔ 14 جولائی کی صبح پیرس میں شانزے لیزے پر صدر فرانس کی موجودگی میں یورپ کی قدیم ترین اور عظیم ترین فوجی پریڈ ہوتی ہے، جس میں فرانس کے دیگر عہدیدار اور غیر ملکی مہمانان بھی شرکت کرتے ہیں۔

انقلاب فرانس
فرانس میں جس فساد کا مدت سے خطرہ تھا، وہ 14 جولائی 1789ء کو پیرس میں برپا ہوگیا۔ عوام نے بیتل کے قید خانے پر حملہ کرکے گورنر کو قتل کردیا اور قید خانے کی تاریک کوٹھڑیوں میں جو سات قیدی بند تھے، انہیں رہائی دلادی۔ دراصل عوام سامان جنگ کی تلاش میں تھے، لیکن یہ مقصد بھی ان کے پیش نظر تھا کہ اس پرانے قلعے پر قبضہ جمالیں، جو قید خانے کی صورت میں ظلم واستبداد کا ایک منحوس نشان بن گیا تھا۔ بیتل کا جبراً کھول دیا جانا عوام کے دبے ہوئے جذبات کی بارود کے لیے فتیلہ بن گیا اور اس سے دھماکوں کا وہ وسیع سلسلہ جاری ہوا جسے انقلاب فرانس کہا جاتا ہے۔

بنیادی اسباب پر نظر کی جائے تو یہ انقلاب دراصل صنعتی انقلاب کا شاخسانہ تھا۔ ترقی پذیر متوسط طبقہ سیاسی اور اقتصادی اقتدار حاصل کرنے کا خواہاں تھا۔ فرانسیسی نوابوں نے جاگیرداری کے سلسے میں جو خاص حقوق حاصل کرلیے تھے، اگرچہ وہ فرسودہ ہوچکے تھے تاہم ان کی وجہ سے کسان اور مزدور بھوکوں مررہے تھے اور محاصل کا بوجھ بھی انہی پر پڑا ہوا تھا۔ امراء رنگ رلیاں منارہے تھے اور ان کے سرکاری خزانے کو کوئی رقم نہ ملتی تھی۔ بادشاہ حد درجہ کمزور تھا۔ اس سے یہ امید ہی نہ تھی کہ وہ کسانوں اور مزدوروں کو مطمئن رکھنے کی غرض سے پرانے آئین میں مناسب ردو بدل کرے گا، لہٰذا عوام اٹھے اور انہوں نے معاملات اپنے ہاتھ میں لے لیے۔