جرمنی میں حملہ آور نے گاڑی ہجوم پر چڑھا دی، 4 افراد ہلاک

Germoney Attack

Germoney Attack

برلن (جیوڈیسک) جرمنی کے شہر مونسٹر میں ایک وین ڈرائیور نے ہجوم پر گاڑی چڑھا دی جس کے نتیجے میں کم از کم 4 افراد ہلاک اور متعدد زخمی ہو گئے۔

بین الاقوامی میڈیا رپورٹس کے مطابق واقعہ مونسٹر کے گنجان آبادی والے علاقے میں پیش آیا جہاں ایک وین ڈرائیور نے راہ گیروں پر گاڑی چڑھادی۔ اس واقعے میں پولیس نے وین ڈرائیور کے ہلاک ہونے کی بھی تصدیق کی ہے۔

جرمن میڈیا کا کہنا ہے کہ ابتدائی رپورٹس کے مطابق وین ڈرائیور جرمن شہری تھا جو ’نفسیاتی مسائل‘ کا شکار تھا۔ فوری طور پر اس واقعے کی وجوہات معلوم نہیں ہوسکیں تاہم پولیس کا کہنا ہے کہ یہ ایک حملہ ہے۔

پولیس نے واقعے کی جگہ کو لوگوں سے خالی کراکر اسے سیل کردیا ہے اور ابتدائی شواہد اکٹھے کیے جارہے ہیں۔ حکام کا کہنا ہے کہ واقعے میں 20 افراد زخمی بھی ہوئے ہیں جن میں بعض کی حالت تشویش ناک ہے۔