گجرات کی خبریں 26/2/2016

Gujrat

Gujrat

دی ایجوکیٹرز بارہ دری کیمپس 22 کنال پر مشتمل گجرات کا سب سے بڑا پرائیویٹ اداروں میں تعلیمی ادارہ ہے جہاں پر 26 سے زائد طلباء و طالبات زیر تعلیم ہیں
گجرات (جی پی آئی) دی ایجوکیٹرز بارہ دری کیمپس گجرات کے ڈائریکٹر شہزادہ شہزاد شفیق نے کہا ہے کہ دی ایجوکیٹرز بادرہ دری کیمپس ضلع گجرات کا واحد ادارہ ہے جہاں پر2003 ء سے CCTV سکیورٹی اقدامات ، پیرا میڈیکل سٹاف، سائیکالوجسٹ موجود ہیں اور یہاں اساتذہ اور پولیس اہلکاروں کے بچوں کو 50 فیصد ڈسکاؤنٹ دیا جاتا ہے جبکہ پولیس شہداء کے 100 فیصد بچے فری ایجوکیشن حاصل کر رہے ہیں اور بچوں کو وہ تمام سہولیات فراہم کی جاتی ہیں جو کسی بھی بڑے سرکاری، غیر سرکاری ادارے میں نہیں ہیں۔ 2002 ء سے گجرات میں دی ایجوکیٹرز بارہ دری کیمپس کی فرنچائز چلائی جا رہی ہے جو کہ 22 کنال پر مشتمل ہے اور یہاں 2600 سے زائد طلباء و طالبات زیرتعلیم ہیں۔ 82 بچے ، بچیاں 2010 ء سے لے کر آج تک حافظ قرآن بن چکے ہیں۔ چند شرپسند عناصر غلط پراپیگنڈہ کر رہے ہیں کہ دی ایجوکیٹرز بارہ دری کیمپس فرنچائز نہیں ہے ۔ ہر سال اس کی ری نیول کرائی جاتی ہے۔ ان خیالات کا اظہار انہوں نے دی ایجوکیٹرز بارہ دری کیمپس گجرات میں پریس کانفرنس میں کیا۔ شہزادہ شہزاد شفیق نے کہا کہ تعلیمی ادارے پولیس آفیسر، ججز، جرنلسٹ ، وکلاء انجینئر، ڈاکٹرز پیدا کر رہے ہیں مگر یہاں اساتذہ کو حراساں کیوں کیا جا رہا ہے۔ دنیا میں وہی معاشرہ ترقی کی شاہراہ پر گامزن ہوتا ہے جہاں پر اساتذہ کو عزت و احترام دیا جاتا ہے۔ تعلیمی اداروں کو دہشت گردی کے نام پر بلیک میل نہ کیا جائے۔ اگر تعلیمی ادارے تھریڈ ہیں تو حکومت سرکاری اور پرائیویٹ تعلیمی اداروں کو سپورٹ کرے نہ کہ ان پر پریشر بڑھایا جائے۔ انہوں نے کہا کہ موجودہ حالات میں جو اساتذہ کرام بچوں کو تعلیم دے رہے ہیں وہ عبادت کا ایک حصہ ہے اور تعلیم دینا ایک پیغمبری پیشہ ہے۔ انہوں نے کہا کہ گجرات میں دی ایجوکیٹرز بارہ دری واحد کیمپس ہے جہاں پر 150 سے زائد کا اکیڈمک سٹاف ہے۔ بچوں کو واٹر فلٹر کی سہولیات مہیا کی جاتی ہیں۔ 3 سپورٹس ٹیچر اور 3 میوزک ٹیچر اور فائن آرٹس کا کام بھی ہو رہا ہے۔ آئی ٹی کے شعبہ میں وہ تمام سہولیات موجود ہیں جو کسی بھی سکول میں ایسی نہیں ہوں گی۔ 2010 ء سے آج تک 82 بچے ، بچیاں حافظ قرآن بن چکے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) دی ایجوکیٹر بارہ دری کیمپس کے کلاس دہم کے طلباء کی الوداعی تقریب منعقد ہوئی جس کی صدارت ڈائریکٹر دی ایجوکیٹر بارہ دری کیمپس شہزاد شفیق شرقپوری نے کی جبکہ مہمان خصوصی مسز شازیہ شہزاد تھیں۔ اس موقع پر اہم شخصیات نے شرکت کی جن میں سعودی عرب کی ممتاز شخصیت ساجد ڈار، ممتاز صحافی محمود اختر محمود، ڈاکٹر رزاق احمد غفاری، شہباز اے چوہدری، ساجد نذیر، مسز نسرین ساجد، شمائلہ ناز، نجف قریشی، مسز سعدیہ سلیمان، حافظ محمد طاہر، خادم حسین ،انیلہ کرامت، حافظ فیض الاسلام اوردیگر شامل تھے۔ اس موقع پر بچوں نے مختلف خاکے اور نغمے پیش کئے۔ اساتذہ کو خراج تحسین پیش کیا گیا اور کلاس نہم کے طلباء نے کلاس دہم کے طلباء کو خراج تحسین پیش کیا اور اساتذہ کی کاوشوں کو سراہا۔ اس موقع پر خطاب کرتے ہوئے ڈائریکٹر دی ایجوکیٹرز شہزاد شفیق نے کہا کہ آج کا پروگرام دیکھ کر مجھے اپنے بچپن کی یادآگئی ہے کہ ہم کس طرح اپنے اساتذہ کے احترام کا خیال کرتے ہیں ۔ انہوں نے کہا کہ بیٹے اور بیٹی میں بہت فرق ہوتا ہے۔ بیٹے گھر کا سربراہ ہوتے ہیں اور بیٹیاں پرائی امانت ہوتی ہیں۔ آج میں اپنے بیٹوں کو اس دعا کے ساتھ رخصت کر رہا ہوں کہ وہ مستقبل کے تمام چیلنجز کا مقابلہ کر سکیں گے اور ملک وقوم کی ترقی میں اپنا کردار ادا کر سکیں گے۔ انہوں نے کہا کہ نوجوان نسل کی بہترین تربیت ہماری اولین ترجیح ہے اور ہم اپنے اساتذہ کو اس طرح کی ٹریننگ دیتے ہیں کہ وہ نوجوان نسل کو بہترین تربیت دیں۔ اس موقع پر طلباء نے بھی اپنے خیالات کا اظہار کیا اور مہمانوں کو تحائف پیش کئے گئے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) وزیر اعلی پنجاب میاں شہباز شریف کی ہدایت پر ڈی سی او لیاقت علی چٹھہ محلہ بخشو پورہ گئے اورمقامی رہائشی محنت کش کو دودھ میں گر کر جلنے سے فوت ہونیوالے کمسن بچے کے علاج پر ہونیوالے اخراجات پونے 4لاکھ روپے کا چیک دیا ۔ محنت کش محمد کاشف کا بیٹا دو سالہ محمد اسماعیل گذشتہ دنوں گھر میں کھیلتے ہوئے گرم دودھ کے برتن میں جا گرا اور بری طرح جھلس گیا اسے فوری طور پر ہسپتال منتقل کیا گیا تاہم کئی دن زیر علاج رہنے کے باوجود وہ جانبر نہ ہو سکا۔ کاشف نے وزیر اعلی پنجاب میاں شہباز شریف سے اپیل کی تھی کہ اسکی تمام جمع پونجی بیٹے کے علاج پر خرچ ہو چکی ہے اور وہ بری طرح مالی مسائل میں جکڑا جا چکا ہے، فوری نوٹس لیتے ہوئے انہوں نے بچے کے علاج پر آنیوالے تما م اخراجات حکومت کی طرف سے ادا کرنے کی ہدایت کی تھی جس پر گذشتہ روز ڈی سی او لیاقت علی چٹھہ نے کاشف کے گھر گئے، حکومت پنجاب اور ضلعی انتظامیہ کی طرف اس افسوسناک واقعہ پر اظہار افسوس اور تعزیت کا اظہار کیا اور بچے کے علاج پر آنیوالے اخراجات پونے 4لاکھ روپے کا چیک کاشف کے حوالے کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ایگزیکٹو ڈسٹرکٹ آفیسر طاہر کاشف اور ایجوکیشن افسران کی ٹیم نے دوسرے روز بھی ضلع بھر کے مختلف تعلیمی اداروں کا اچانک دورہ کیا اور ڈیوٹی سے غیر حاضر اور تاخیر سے پہنچے والے مزید 15ٹیچرز کو شوکاز نوٹس جاری کر دیے۔ ڈی سی او لیاقت علی چٹھہ کی ہدایت پر سرکاری سکولوں میں اساتذہ اور طلبہ کی حاضری یقینی بنانے اور معیار تعلیم میں بہتری کے لئے اقدامات کے پیش نظر ای ڈی او ایجوکیشن طاہر کاشف، ڈسٹرکٹ ایجوکیشن افسران، ڈپٹی اور اسسٹنٹ ایجوکیشن افسران نے ضلع بھر میں بوائز و گرلز سکولوں کا علی الصبح دورہ کیا اور اساتذہ ، طلبہ کی حاضری چیک کی۔ اس دوران غیر حاضر پائے جانیوالے اور تاخیر سے ڈیوٹی پر پہنچنے والے اساتذہ کو شوکاز نوٹسز جاری کرکے انکے خلاف محکمانہ کاروائی کا آغاز کر دیا گیا ہے۔ ای ڈی او ایجوکیشن طاہر کاشف نے بتایا کہ فرائض میں غفلت کے مرتکب عناصر کے خلاف سخت ترین ایکشن ہوگا اور انہیں ملازمت سے برطرف بھی کیا جا سکتاہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ڈی سی او لیاقت علی چٹھہ کی زیر صدارت سلاٹر ہائوس ، مویشی منڈی اور یونیورسٹی کیلئے جگہ کی خریداری کے حوالہ سے لینڈ ایکوزیشن اور پرائس اسسمنٹ کمیٹی کا اجلاس منعقد ہوا ، جس میں اے ڈی سی عرفان علی کاٹھیا ، اسسٹنٹ کمشنر نور العین ، ٹی ایم او خرم محمود ترہنگی ، نائب تحصیل گلزار احمد ، ارشاد اللہ و دیگر بھی موجود تھے ۔ اے ڈی سی عرفان علی کاٹھیا نے بریفنگ دیتے ہوئے بتایا کہ سلاٹر ہائوس کی تعمیر کے حوالہ سے جگہ کا تعین کیا جا چکا ہے جس کاکل رقبہ 11کنال 8مرلے ہے ۔اس سلسلہ میں زمین کے مالکان کے ساتھ معاملات بہت جلد مکمل طے پا جائیں گے ۔ ڈی سی او لیاقت علی چٹھہ نے ہدایت کی کہ سلاٹر ہائوس کی تعمیر سے متعلق تمام امور کو ترجیحی بنیادوں پر جلد از جلد مکمل کیا جائے ۔ ڈی سی اونے کہا کہ منڈی مویشیاں کے بارے میں بریفنگ دیتے ہوئے بتایا کہ منڈی مویشیاں کے قیام کے سلسلہ میں سرگودھا روڈ پر 5کنال 3مرلے جگہ کا انتخاب کر لیا گیا ہے جسے کمیٹی میں موجود دیگر ممبران سے مشاورت کے بعد حتمی شکل دی جائیگی ۔ ڈی سی او نے اسسٹنٹ کمشنر کو ہدایت کی کہ ممبران کی مشاورت کو لازمی اور ان کی تجاویز کو ترجیح دیتے ہوئے سرکاری شیڈول کے مطابق زمین کی خریداری کے عمل کو جلد مکمل کیا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) اسسٹنٹ کمشنر سرائے عالمگیر شعیب نسوانہ نے صفائی کے ناقص انتظامات اور ملازمین کے ہیلتھ کارڈز نہ بنوانے پر ادریسیہ فوڈ پوائنٹ اور پیزا زون کو سیل کر دیا جبکہ 4ہوٹلز اور 2سپر سٹورز پر مجموعی طور پر 18ہزار روپے جرمانہ عائد کر دیا ہے ۔ ڈی سی او لیاقت علی چٹھہ اور ڈائریکٹر فوڈ اتھارٹی گجرات عرفان علی کاٹھیا کی ہدایت پر اسسٹنٹ کمشنر سرائے عالمگیر شعیب نسوانہ نے ناقص انتظامات اور ملازمین کے ہیلتھ کارڈ نہ بنوانے پر ادریسیہ فوڈ پوائنٹ اور پیزا زون کو سیل کر دیا جبکہ المکہ ہوٹل پر3ہزار، گولڑہ ہوٹل پر3ہزار ، ہجویری ہوٹل پر4ہزار اور منیر ہوٹل پر 4ہزار ، جبکہ بحریہ جنرل سٹورپر 4ہزار اور احمد سپر سٹور پر 4ہزار روپے جرمانہ عائد کر دیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ای ڈی او ایجوکیشن کاشف طاہر نے گورنمنٹ گرلز مڈل سکول چکوڑی بھیلووال کا دورہ کیا اور وہاں کے معززین کی طرف سے اپنی مدد آپ کے تحت بنائے گئے 3 بڑے کمروں کا وزٹ کیا جہاں پر میٹرک کی طالبات تعلیم حاصل کر سکیں گی۔ ای ڈی او ایجوکیشن نے خوبصورت کمرے تعمیر کرنے پر چوہدری محمد افسر چکوڑی بھیلووال، چوہدری اختر نمبردار، چوہدری عبدالرحمٰن چکوڑی اور ان کے ساتھیوں کو زبردست خراج تحسین پیش کیا۔ انہوں نے کہا کہ پہلی فرصت میں ہی گورنمنٹ گرلز مڈل سکول کو ہائی سکول کا درجہ دلانے کے لئے فزیبلٹی رپورٹ بنا کر حکومت پنجاب کو پہنچا دی جائے گی تاکہ انشاء اللہ تعالیٰ اسی سال اس سکول کی اپ گریڈیشن ہو سکے۔ یاد رہے کہ چکوڑی بھیلووال کے گورنمنٹ گرلز مڈل سکول کو ہائی کرانے کے لئے 5 لاکھ روپے ڈی سی او گجرات کے حکم پر جاری کئے گئے جبکہ 5لاکھ سے زائد کا فنڈ چکوڑی بھیلووال کے معززین چوہدری محمد افسر ، چوہدری اختر، چوہدری عبدالرحمٰن اور ان کے دیگر ساتھیوں نے اکٹھے کئے اور اپنی مدد آپ کے تحت بلڈنگ کی تعمیر کیلئے دن رات ایک کیا۔ اہل علاقہ نے ڈی سی او گجرات لیاقت علی چٹھہ اور ای ڈی او ایجوکیشن کاشف طاہر کی ذاتی دلچسپی لینے پر ان کا شکریہ ادا کیا او راپیل کی ہے کہ اسی سال گورنمنٹ گرلز مڈل سکول کی اپ گریڈیشن کی جائے اور اسے ہائی سکول کا درجہ دے کر میٹرک کی کلاسز کا اجراء کیا جائے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات(جی پی آئی ) ایڈیشنل ڈسڑکٹ اینڈ سیشن جج گجرات کی ایک عدالت نے 2012کے مشہور قتل کیس کا فیصلہ سناتے ہوئے ملزم لطیف کو عمر قید اور پانچ لاکھ جرمانہ کی سزا کا حکم دیا ہے یاد رہے کہ ملزم محمد لطیف نے 2012میں اپنی بیوی کو قتل کر دیا تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات(جی پی آئی ) ڈنگہ میں گھریلو ناچاقی کی بنا پر دیور نے اپنی بھابی سمیرا کو گلے میں پھندا ڈال کر موت کے گھاٹ اتار دیا اور فرار ہو گیا پولیس نے مقدمہ درج کر کے نعش پوسٹ مارٹم کے بعد ورثاء کے حوالے کر دی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات(جی پی آئی )ممبر امن کمیٹی گوجرانوالہ لالہ جی سعید اقبال مرزا نے گزشتہ روز ایس پی کامران ممتاز سے ان کے آفس میں ملاقات کی ملاقات کے دوران لالہ جی نے ایس پی گجرات کامران ممتاز کو تھانہ سٹی لالہ موسیٰ و تھانہ صدر لالہ موسیٰ میں معذور افراد کے لیے رینپ بنانے کا مطالبہ کیا جس پر ایس پی کامران ممتاز نے لالہ جی سعید اقبال کے مطالبہ پر تھانہ صدر و سٹی لالہ موسیٰ میں معذور افراد کے آنے جانے کے لیے فوری طور پر رینپ بنوانے کا حکم جاری کر دیا ہے اس موقع پر لالہ جی سعید اقبال مرزا نے ایس پی کامران ممتاز کا شکریہ ادا کیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات(جی پی آئی )مسلم لیگ ن کے راہنما اور فخر اسلام نگر خرم شہزاد بٹ نے گزشتہ روز اپنی رہائش گاہ اسلام نگر میںممتاز عالم دین اور معروف نعت خواں قاری طارق حسین عطاری کے اعزاز میں پر تکلف ظہرانہ دیا اس موقع پر خرم بٹ نے قاری طارق حسین عطاری کی خدمات کو سراہا اور خراج تھسین پیش کیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) گجرات چیمبر کی سالانہ چھٹی صنعتی نمائش کی دو بڑی مارکیاں ظہور الٰہی اسٹیڈیم میں لگا دی گئیں۔ صدر میاں محمد اعجاز، سینئر نائب صدر چوہدری وحید الدین ، نائب صدر ثوبان ظہیر بٹ، چیئرمین صنعتی نمائش کمیٹی احمد حسن مٹو، حاجی عرفان یوسف، راجہ اعجاز، طارق بلال ملک، مہر ندیم عباس، خان شبیر خان، میاں اکمل حسین ، آصف رضا نقوی نے مارکیوں کا وزٹ کیا اور مارکیوں کی تنصیب کو تسلی بخش قرار دیتے ہوئے ٹھیکیدار کو مارکیاں خوبصورت انداز میں تیار کرنے کے احکامات جاری کئے اور انہوں نے سٹیڈیم میں صفائی کے انتظامات کا جائزہ بھی لیا۔ بعد ازاں صنعتی نمائش کمیٹی کے ممبران نے سٹالز کی بکنگ کیلئے صنعتکاروں، تاجروں سے رابطے بھی کئے۔ چیئرمین صنعتی نمائش کمیٹی احمد حسن نے بتایا کہ چند سٹالز رہ چکے ہیں۔ خواہش مند حضرات جلد سے جلد سٹالز کی بکگن کیلئے رابطہ کریں تاکہ انہیں مناسب جگہ دی جا سکے۔ انہوں نے بتایا کہ انشاء اللہ تعالیٰ یکم تاریخ تک سٹالز ہولڈروں کو سٹالز حوالے کر دیئے جائیں گے تاکہ وہ جلد سے جلد اپنے سٹالز سجا سکیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) گجرات چیمبر آف کامرس اینڈ انڈسٹری کی 2 مارچ کو ہونے والی سالانہ چھٹی صنعتی نمائش کا افتتاح FPCCI کے صدر عبدالرؤف عالم اور صدر شاہین گروپ حاجی ناصر محمود اپنے دست مبارک سے کریں گے۔ افتتاح 2 مارچ کو 5بجے ہو گا اور اس سلسلے میں گجرات کے بزنس مینوں، تاجروں کو دعوت نامے بھی جاری کر دیئے گئے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) گجرات کار ڈیلرز ایسوسی ایشن کے انتخابات کے سلسلہ میں ملک مجید صادق نیو ملک موٹرز نے صدر او ر ملک فرخ شہزاد گجرات کار سیلز نے جنرل سیکرٹری کی نشست کیلئے کاغذات الیکشن کمیشن کے پا س جمع کرا دیئے۔ اس موقع پر چوہدری تجمل فردوس نیو ملک موٹرز، حاجی نوید بٹ، راجہ مجید حمزہ موٹرز، چوہدری جاوید المبارک موٹرز، ملک حسنین جاپان موٹرز، شبیر خان VIP موٹرز، اظہر اقبال گجرات کار سیلز، ملک خاور ماشاء اللہ موٹرز، جاوید گجر لجپال حسین موٹرز، قادری شفیق، ملک ساجد، اشفاق موٹرز کی کامیابی کے بعد کار ڈیلرز کے حقوق کا تحفظ کریں گے۔ ممبران کی ترقی اولین ترجیح ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ممتاز صنعتکار چوہدری پرویز اقبال چیف ایگزیکٹو پلاسکو پی وی سی پائپ انڈسٹری کے داماد ڈائریکٹر پلاسکو انڈسٹری چوہدری جمیل افتخار کے صاحبزادے چوہدری واصف جمیل کی دعوت ولیمہ کی تقریب پلاسکو انڈسٹری کے لان میں منعقد ہوئی ۔جس میں مہمانوں کا استقبال چوہدری پرویز اقبال، چوہدری جمیل افتخار، چوہدری جاوید اقبال، دولہا چوہدری واصف جمیل، چوہدری ثاقب جمیل، چوہدری طاہر، انجینئر چوہدری زین پرویز، چوہدری ہاشم پرویز نے کیا۔دعوت ولیمہ کی تقریب میں میجر جنرل ریٹائرڈ چوہدری ارشد محمود ، بریگیڈیئر ریٹائرڈ فہیم احمد، کرنل کاشف، ایڈیشنل وفاقی سیکرٹری راؤ افتخار، وفاقی سیکرٹری چوہدری جاوید، ڈی ایس پی ٹریفک گجرات میں سہیل فاضل،چوہدری عبدالرزاق دبئی،الحاج امجد فاروق، ڈاکٹر محمد امین گل، اشفاق رضی ایڈووکیٹ، میاں محمد شہباز انصاری، قمر زمان گل، الحاج محمد افضل گوندل، چوہدری آصف دھول، چوہدری ذیشان افضل گوندل، زبیر افضل گوندل،شہباز اسلم گوندل، طاہر کریم گجرات ٹریڈرز، احمد ڈار، چوہدری اعجاز احمد، عبداللہ اعجاز، چوہدری سجاد لاہنیکا، عمر رشید، عدیل بٹ، سرمد وقاص، ارسلان حیدر، سہیل ظفر ہنجرا، محمد حسیب، چوہدری عنصر گھمن، سابق ناظم چوہدری پرویز موہلہ سمیت دیگرنے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ڈسٹرکٹ بار ایسوسی ایشن گجرات کے ترجمان خالد مسعود ملک ایڈووکیٹ کے مطابق ”گجرات بار حملہ” کے سلسلہ میں گجرات بار نے جمعرات کو بطور احتجاج مکمل ہڑتال کی اور وکلاء احتجاجاً عدالتوں میں پیش نہ ہوئے۔ یاد رہے کہ 28 جون 2004 ء کو حکمران پارٹی کے کارندوں نے بربریت کا مظاہرہ کرتے ہوئے دوران اجلاس جنرل ہاؤس شدید حملہ کر دیا جس میں وکلاء زخمی ہوئے اور املاک کو زبردست نقصان پہنچایا گیا جس بابت گجرات بار کا استغاثہ عدالت محمد اسلم گوندل ایڈیشن سیشن جج گجرات میں زیرسماعت ہے۔ جس کی آئندہ تاریخ پیشی 5 مارچ مقرر ہے۔ استغاثہ کے الزام علیہان/ ملزمان میں راجہ منور حسین سابق ڈی پی او گجرات، چوہدری محمد عرفان اکبر وڑائچ سابق ناظم منگووال غربی، رانا مقصود احمد سابق ناظم کنجاہ، کاشف رضا حیدری سابق ناظم گجرات، محمد حنیف حیدری، محمد صدیق بٹ، حافظ امجد شاہین، انعام الحق، ملک محمد آصف اعوان اور چوہدری محمد آصف دھاماں شامل ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) تعلیم سماجی ترقی کا اوّلین زینہ اور معاشرتی بیداری کا پیش خیمہ ہے۔ تعلیمی اداروں کی بنیادی ذمہ داری نونہالان قوم کی فکری و علمی تربیت کے ساتھ ساتھ ان کی بہترین کردار سازی ہے تاکہ وہ ملک و قوم کے قابل فخر افراد بنیں۔ جامعہ گجرات کمیونٹی کی ترقی کے حوالہ سے اپنی ذمہ داریوں کو محسوس کرتے ہوئے علاقہ کی سماجی، معاشرتی ، صنعتی اور علمی ترقی کے لیے بیش قیمت خدمات سر انجام دے رہی ہے۔ کسی خاص علاقہ کی سماجی و معاشرتی ترقی اس علاقہ میں قائم ہونے والے تعلیمی اداروں اور معیارِ تعلیم کے ساتھ وابستہ ہوتی ہے۔ ان خیالات کا اظہار مہمان خصوصی وائس چانسلر جامعہ گجرات پروفیسر ضیاء القیوم نے ایجوکیشن ہائوس پسوال کیمپس کی افتتاحی تقریب کے شرکاء سے خطاب کرتے ہوئے کیا۔ انہوں نے کہا کہ کسی علاقہ میں معیاری تعلیمی ادارہ کا قیام ایک صدقہ جاریہ کی حیثیت رکھتا ہے اور دورِ حاضر میں قوموں کی ترقی کا تمام تر دارومدار علمی و تحقیقی ترقی پر ہے۔ ڈی سی او گجرات لیاقت علی چٹھہ نے ایجوکیشن ہائوس کی تقریب افتتاح کے شرکاء سے خطاب کرتے ہوئے کہا کہ حکومت پنجاب صوبہ میں علمی ترقی کے حوالہ سے انقلاب انگیز اقدامات کرتے ہوئے ہر امیر و غریب بچے کو زیورِ تعلیم سے آراستہ کرنے کا تہیہ کیے ہوئے ہے۔ دور دراز علاقوں میں سکولوں کا قیام ایک عوامی خدمت ہے۔ غریب اور نادار بچوں کو تعلیم فراہم کرنا ہماری اجتماعی ذمہ داری ہے۔ عوام اور حکومت مل کر معاشرہ میں تعلیمی حوالہ سے انقلابی تبدیلیاں روشناس کروا سکتے ہیں۔ مخیر حضرات میں عوامی خدمت کے شعور کو اُجاگر کرنا اہم ذمہ داری ہے۔ سابق وفاقی وزیر اطلاعات قمر زمان کائرہ نے کہا کہ نونہالان قوم کی تعلیمی بنیادوں کو اعلیٰ اُصولوں پر استوار کرنا ایک کارنامہ ہے۔ ایجوکیشن ہائوس نے ایک دور دراز علاقہ میں اپنا کیمپس قائم کرتے ہوئے اعلیٰ ظرفی کا ثبوت دیا ہے۔ پاکستان میں آج ہمیں تعلیم کو اپنی ترجیحات میں اوّلیت دینے کی ضرورت ہے۔ پاکستان کے اہم مسئلہ دہشت گردی اور عدم برداشت کو بھی تعلیمی و علمی ترقی کے ذریعے مختلف گروہوں کے مابین مکالمہ کے ذریعے حل کیا جا سکتا ہے۔ ممتاز دینی شخصیت اور راہنما جماعت اسلامی ڈاکٹر طارق سلیم نے کہا کہ ضلع گجرات ایک مردم خیز خطہ ہے۔ یہاں کے لوگ باصلاحیت، بہادر اور ذہین ہیں۔ تعلیم امیر و غریب سبھی کا حق ہے۔ اللہ تعالیٰ نے تمام انسانوں کو برابر اور با صلاحیت پیدا کیا ہے۔ تعلیم کے ذریعے انکی راہنمائی ہماری سماجی و معاشرتی ذمہ داری ہے۔ ایجوکیشن ہائوس کے ڈائریکٹر چوہدری سلیم رضا نے کہا کہ بچوں میں تخلیقی و علمی جذبات کو پروان چڑھانا ہی تعلیم کا حاصل ہے۔ قوموں کی کامیاب زندگی میں علم کو ہمیشہ وجۂ افتخار گردانا جاتا ہے۔ پاکستان علم و عمل کے ذریعے ہی ترقی کی منازل کو چھو سکتا ہے۔ ہمیں طلبہ کی صلاحیتوں کو اُجاگر کرنے کے لیے انکے مزاج کے مطابق انہیں تعلیم فراہم کرنا ہو گی تاکہ وہ معاشرہ کے ذمہ دار اور کامیاب شہری بن سکیں۔ اس علاقہ میں ایجوکیشن ہائوس کا قیام ایک تبدیلی کا پیش خیمہ ہو گا۔ ممبر اسلامی نظریاتی کونسل سید سعید احمد شاہ گجراتی نے اس کیمپس کی ترقی و ترویج کے لیے نیک خواہشات کا اظہار کرتے ہوئے اجتماعی دُعا کروائی۔ تقریب میں عمائدین علاقہ اور معززین نے کثیر تعداد میں شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) پاکستان مسلم لیگ کے مر کزی رہنما چوہدری حسین الٰہی نے کہا ہے کہ آزاد کشمیر الیکشن میں جلد پارٹی امیدوار کا باقاعدہ اعلان کر دیں گے جس کے لئے سب مسلم لیگی تیاری کر لیں اور پارٹی امیدوار کی کامیابی میں عزت ہے رابطے بہتر بنائیں پہلے بھی اپوزیشن میں ہوتے ہوئے بھی ہماری جماعت کے امیدوار جیتے اب بھی عوامی طاقت کے ساتھ ہماری جماعت کا امیدوار انشاء اللہ کامیاب ہو گا چوہدری وجاہت حسین پارٹی اجلاس میں امیدوار کا باقاعدہ اعلان کریں گے وہ گزشتہ روز دولت نگر میں مسلم لیگیوں سے گفتگو کر رہے تھے چوہدری حسین الٰہی نے مزید کہا کہ اس با ر ہمارا امیدوار نیا ہو گا لیکن جوں جماعت کی طرف سے اعلان ہو جائے آپ خود رابطہ کریں اور امیدوار کو ہر جگہ لے کر جائیں اور جماعت کے لئے مل کر سب کام کریں تاکہ مسلم لیگی امیدوار بھاری اکثریت سے کامیاب ہو انھوں نے کہا کہ میں بھی آپ کے پاس ہونگا اور چوہدری وجاہت حسین بھی الیکشن مہم میں موجود ہونگے انشاء اللہ حسب روایت مسلم لیگی امیدوار کامیاب ہو گا چوہدری مظہرجٹ نے شرکاء کو پر تکلف ظہرانہ دیا۔اس موقع پر سابق تحصیل ناظم گجرات چوہدری سعادت نواز اجنالہ۔حاجی نذیر چیئرمین۔چوہدری نواز چیئرمین۔ پرنس رفاقت ۔چوہدری عرفان۔چوہدری قربان ودیگر بھی موجود تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) پاکستان مسلم لیگ کے مرکزی رہنما چوہدری حسین الٰہی گزشتہ روز حاجی ناصر محمود سابق ایم پی اے کے گھر گئے اور ان کی بھاوج اور ایم پی اے حاجی عمران ظفر کی والدہ کی وفات پر افسو س کیا اور فاتحہ خوانی کی انھوں نے حاجی ناصر محمود اور حاجی عمران ظفر سے شہری امور پر بھی تبادلہ خیال کیا ۔چوہدری سعادت نواز اجنالہ۔ میاں اکمل حسین۔چوہدری یوسف ترہینگی۔پرنس رفاقت۔میاں عجازودیگر بھی اس موقع پر موجود تھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) پاکستان مسلم لیگ کے مرکزی رہنما چوہدری حسین الٰہی گزشتہ روزمعروف تاجر رہنما جاوید بٹ کے گھر گئے اور ان کے بیٹے کی وفات پر افسوس کیا اور دعائے معغفرت کی انھوں نے ماسٹر عارف کی اہلیہ کی وفات پر بھی ان کے گھر جا کر فاتحہ خوانی کی چوہدری سعادت نواز اجنالہ۔چوہدری مظہر نت۔چوہدری اصغر۔پرنس رفاقت بھی ان کے ہمراہ تھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ممتاز مسلم لیگی بائو مدد شاہ کی دعوت ولیمہ کی تقریب بخیر و خوبی انجام پا گئی جس میں مسلم لیگ کے مرکزی رہنما چوہدری حسین الٰہی۔سابق تحصیل ناظم چوہدری سعادت نوازاجنالہ۔سابق تحصیل کنوینر گجرات میاں ہارون مسعود ایڈووکیٹ۔ملک مقبول۔سید وقاص جعفری۔پرنس رفاقت۔حامد وڑائچ ودیگر نے بھی شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) مسلم لیگی رہنما و سابق تحصیل ناظم گجرات چوہدری سعادت نواز اجنالہ نے این اے 104 کے ایم این اے کے بیان پر تبصرہ کرتے ہوئے کہا ہے کہ ہماری آنکھیں بھی کھلی ہیں علاج بھی کرایا ہے سرمہ بھی ڈالہ ہے اور آپریشن بھی کرایا ہے جس کی وجہ سے سب کچھ ٹھیک نظر آتا ہے کھاریاں سے اعوان شریف جو چند کلو میٹر سڑک بنی ہے اس میں ناقص میٹریل استعمال ہوا ہے اگر کو ئی نہیں مانتا تو وقت اور ٹائم بتا کر آجائیں میں موقع پر آکر بھی ثابت کرنے کوتیار ہوں اڑھائی سال میں مدینہ تا فتح پور روڈ بن رہی ہے جس کی مدت تکمیل کا تعین کوئی نہیں کر سکتاابھی تک تو چند کلومیٹرہی بن سکی ہے ۔ نوابزادہ مظہر ایم این اے صاحب اب بیانوں سے کام نہیں چلے گا ہماری آنکھیں کام کر رہی ہیں اس لئے بے سروپا بیان بازی سے کوئی ہمیں متاثر نہیں کر سکتا آپ کے روز جھوٹے بیان چھپنے کی وجہ سے لوگوں نے اخباروں میں آپ کا بیان پڑھنے چھوڑ دئیے ہیں کیونکہ ان کی نظریں بھی سب کچھدیکھ رہی ہیں کھاریاں تا اعون شریف۔بوکن موڑ تا ماچھیوال۔لاہوریاں تا ماجرا بننے والی چند کلو میٹر سڑکیں بھی ٹوٹ رہی ہیں اگر وہ نہیں مانتے تو آجائیں میں معیاری تعمیر کے شاہکار دکھا دیتا ہوں چوہدری سعادت نواز اجنالہ نے مزید کہاہے کہ کارپٹ روڈ پنجاب حکومت کی اسکیم ہے جو پورے صوبے میں جاری ہے یہ کسی ایم این اے کا کارنامہ نہیں۔ مخالفین اگر کسی بات کا کریڈت لینا ہی چاہتے ہیں تو اپنے وائسرائے ڈی سی او کے پاس جا کر کسی منصوبے کے لئے فنڈز کی منت سماجت کریں اگر ڈی سی او کو رحم آگیا تو ممکن ہے کچھ فنڈز کی خیرات دے دیں وگرنہ ہمارے حریفوں کو اخباری بیانوں پر ہی گزارہ کرنا پڑے گا اور کام ہونے کی جھوٹی داستانیں سنانے کاکام ہی کرتے رہنا ہو گا انھوں نے کہا کہ روز میگا پراجیکٹ کی کہانیاں سنانے والوں کو فرصت ملے تووہ کئی برس قبل کڑیانوالہ پل کا افتتاح کر کے جو منصوبہ بھول چکے ہیں اسے ہی مکمل کرا دیں میگا ۔پراجیکٹ کسے کہتے ہیں مخالفین کو تو پتہ ہی نہیں ۔بہتر ہے کسی سے پوچھ لیں یا ہم بتا دیتے ہیں ہماری آنکھیں ٹھیک ہیں اس لئے میرا مشورہ ہے بیان دینے والے اپنی نظر کسی ماہر سے چیک کرا لیں تا کہ انھیں اپنی اخباری کا رکردگی کی حقیقت کا پتہ چل سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات(جی پی آئی)گورنرسرحد کا بائیو ڈاٹا۔اقبال ظفر جھگڑا 17 مئی 1947 کو پشاور کے نواحی گاوں جھگڑا میں پیدا ہوئے ـ ان کے دادا ابراھیم خان جھگڑا اور والد ملک مظفر خان جھگڑا تحریک پاکستان کے کارکن تھے ـ 1969 میں پشاور انجنیئرنگ کالج سے سول انجینئرنگ کی ـ 1970 میں ائریگیشن ڈیپارٹمنٹ میں بطور ایس ڈی او فرائض سرانجام دیے اور 1977 میں سعودیہ عربیہ میں ملازمت کی، 1984 میں مسلم لیگ ن میں شمولیت اختیار کی، 1988 میں مسلم لیگ ن پشاور کے صدر، 1996 میں صوبائی سنئیر نائب صدر ،1997 میں پہلی دفعہ سینٹر منتخب ہوئے ـ سینٹ میں ڈیفنس کمیٹی کے چیئرمین اور وزیراعظم کے مشیر 1998 میں صوبائی جنرل سیکرٹری منتخب ہوئےـ اقبال ظفر جھگڑا 12 اکتوبر 1999 کے بعد جمہوریت کے بحالی کیلئے میدان عمل میں نکل آئےـ وہ 3 دسمبر 2000 کو اے آر ڈی کے پہلے سیکرٹری جنرل بنے،بعدازاں 25 دسمبر کو پارٹی کے بھی سیکرٹری جنرل بنے، جبکہ ستمبر 2006 میں اے پی ڈی ایم کے بھی سیکرٹری جنرل رہے۔ وہ دسمبر 2009 میں دوسری مرتبہ سینٹر بنے ـ اقبال ظفر جھگڑا پاکستان کے تاریخ میں کسی بھی جمہوریت کیلئے جدوجہد کی تحریک کے طویل ترین عرصہ سیکرٹری جنرل کے عہدے پر فائز رہنے والے رہنما ہیں، اقبال ظفر جھگڑا پچھلے سال ایک مرتبہ پھر اسلام آباد سے سینٹر منتخب ہوئے، وہ سینٹ میں مسلم لیگ ن کے پارلیمانی لیڈر کیساتھ ساتھ پانی و بجلی کے قائمہ کمیٹی کے چیرمین بھی رہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) سا بق ایم پی اے حا جی نا صر محمو د کی بھا و ج اور ایم پی اے حا جی عمر ان ظفر کی والد ہ کی و فا ت پر مختلف سیا سی شخصیا ت نے ان کی ر ہا ئش گا ہ پر جا کر تعز یت کی ،اس موقع پر وزیر اعلیٰ پنجا ب میا ں شہبا ز شر یف کے معا و ن خصو صی منشا ء اللہ بٹ ،سا بق و فا قی وزیر قمر ز ما ن کا ئر ہ ،ایم پی اے سیا لکو ٹ چو ہدری محمد اخلا ق ،مسلم لیگ ق کے ر ہنما چو ہدری حسین الٰہی ،سعا د ت نو از اجنا لہ سمیت دیگر سیا سی شخصیا ت نے اظہا ر تعز یت کی ، انہو ں نے حا جی عمر ان ظفر سے ان کی والد ہ کی و فا ت پر گہر ے دکھ اور غم کا اظہا ر کیا ، اس موقع پر چیئر مین مسلم لیگ ن حا جی آصف ر ضا ،با سط راٹھو ر،حا جی عر فا ن یو سف ،میا ں اکمل حسین ،حا جی ر حمت اللہ (مینجرفیضا ن عطا ر ٹر یو لز)،احمد حسن مٹو ،طا رق بلا ل ملک سمیت دیگر شخصیا ت مو جو د تھیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) پاکستان تحریک انصاف ضلع گجرات کے سینئر راہنماسابق ٹکٹ ہولڈر حلقہ پی پی 112 نوازش علی شیخ ایڈووکیٹ نے انصاف مرکز سے جاری ایک بیان میں کہاکہ کوٹلی آزاد کشمیر میں کامیاب جلسہ تحریک انصاف کی مقبولیت کا ثبوت ہے انہوں نے کہاکہ آزاد کشمیر کے آئندہ انتخابات میں پاکستان تحریک انصاف بھرپور کامیابی حاصل کرے گی ،آزاد کشمیر کے عوام نے جلسہ میں بھرپور شرکت کر کے تاریخ رقم کر دی ہے ،با شعور عوام ن لیگ اور پیپلز پارٹی کی نورا کشتی کو اچھی طرح سمجھ اور جان چکے ہیںاور اب ان سے چھٹکارا حاصل کرنا چاہتے ہیں انہوں نے کہاکہ عوام نے جلسہ میں بھرپور شرکت کر کے کشمیر میں تبدیلی کی نوید سنا دی ہے اور کشمیر کے عوام تحریک انصاف کو اقتدار میں دیکھنا چاہتے ہیں ،تحریک انصاف کشمیری عوام کی امنگوں کی ترجمان جماعت ہے، پاکستان تحریک انصاف چیئرمین عمران خان کی قیادت میں کشمیر کے عوام کی امیدوں پر پورا اترے گی اور اور اقتدار میں آ کر آزاد کشمیر کی عوام کو بنیادی سہولیات فراہم کرنے اور عوام کی ترقی اور خوشحالی کے لئے بھرپور اقدامات کرے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیرآباد( جی پی آئی)حضورۖ کا ادب اورعشق دنیا وآخرت میںکامیابی کاذریعہ ہے۔امت مسلمہ جن مسائل کاشکارہے ان کاحل حیات طیبہ سے وابستگی سے ہی ممکن ہے۔فروغ اسلا م کے لئے جماعت اسلا می کی جدوجہدتاریخ کاسنہراباب ہے ۔دنیا پرغلبہ اورحکمرانی کانسخہ قرآن کی شکل میںموجود ہے۔مسلمان اللہ کے احکامات سے روگردانی کرکے سابقہ قوموںکی طرح ذلیل وخوارہورہے ہیں۔اقامت دین اورغلبہ اسلا م کے لئے جدوجہدکرنااصل زندگی ہے۔ ان خیالات یونین جماعت اسلا می ضلع گوجرانوالہ کے نائب امیرحافظ غلام مصطفی نے جماعت اسلا می کے زیراہتمام گلی گورو کوٹھا اورریلوے کوارٹرمیںفہم کلاس قرآن کانفرنس سے خطاب کرتے ہوئے کیا۔صدارت صابر حسین بٹ نے کی۔اس موقع پر محمدشاکر بٹ،وسیم شاہد اولکھ ،عنا یت اللہ میتلا،ندیم صادق تارڑ،قیصربٹ،محمدعامر بٹ نے بھی موجودتھے ۔انہوںنے کہ کہا کہ رحمت عالم ۖ نے انسانیت کوحقیقی دستوردیا۔ہمیںسیرت النبیۖ کواپناکرمحبت وامن کے چراغ روشن کرنے چاہئیں۔نبی کریم ۖ کی زندگی تمام کائنات کے لئے رہنمائی ہے۔محبت رسولۖ دلوںسے نفرت اورتعصب خرم کرتی ہے۔دین ودنیا میںکامیابی کے لئے قرآن وسنت پرعمل کرنا ہوگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور ( جی پی آئی) جمعیت علما پاکستان کے مرکزی صدر پیر اعجا ز احمد ہاشمی نے کہا ہے کہ آرمی چیف جنرل راحیل شریف کی قیادت میں فوج نے دہشت گردی کے خاتمے کے لئے بے مثال کارروائیاں کی ہیں، آخری مرحلے کی ہدایت بھی کردی گئی ہے۔ لیکن ان کی مدت ملازمت میں توسیع پر سیاسی مذہبی جماعتیں سیاست بند کریں۔ یہ سیاست کا نہیں، ملکی ضرورت کا معاملا ہے، جس پر وزیر اعظم اور صدر کو آنے والے وقت کے مطابق فیصلہ کرنا چاہیے۔ جنرل راحیل شریف خود کہہ چکے ہیں کہ وہ توسیع نہیں لیں گے۔ یہ ان کی اپنے پیشے سے وابستگی ، میرٹ اور پاکستان سے محبت کا اظہار ہے۔ میڈیا سے گفتگو میں پیر اعجاز ہاشمی نے کہا کہ آئین کے مطابق پاک فوج کا کام سرحدوں کی حفاظت ہے، سیاست نہیں۔ اس حوالے سے جنرل مشرف کے بعد سے واقعی عمل ہورہا ہے، جسے قوم کا ہر فرد سراہتا ہے۔ ان کا کہنا تھا کہ دہشت گردی کے خاتمے کے لئے ضروری ہوتو راحیل شریف کی مدت ملازمت میں توسیع کرنے میں کوئی حرج نہیں لیکن اسے سیاست کا موضوع نہیں بنانا چاہیے۔ معلوم نہیں ایک سال پہلے ہی بحث کیوں چھیڑ دی گئی، اس میں کس کی دلچسپی ہے؟ اب بالغ نظری کا مظاہر ہ کرنا چاہیے۔ نان ایشو ز کو ایشوز بنانا میڈیا اور سیاسی جماعتوںکے لئے مناسب نہیں ۔ پیراعجاز ہاشمی نے کہا کہ جمہوری قوتوں کو ملکی مسائل پر بات کرنی چاہیے، آرمی چیف کی توسیع ملازمت کو موضوع سیاست بنانا افسوسناک ہے، یہ آئینی مسئلہ ہے۔اس پر بیان بازی اور تبصرے بند ہونے چاہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور( جی پی آئی)پاکستان علماء کونسل کے سرپرست اور انٹر نیشنل ختم نبوت موومنٹ ورلڈ کے سیکرٹری جنرل مولانا ڈاکٹر احمد علی سراج سے مدینہ منورہ میں پاکستان علماء کونسل کے مرکزی سیکرٹری جنرل اور ممبر اسلامی نظریاتی کونسل صاحبزادہ زاہد محمود قاسمی ملاقات کی۔مولانا ڈاکٹر احمد علی سراج نے پیغام اسلام کانفرنس کی کامیابی پر پاکستان علماء کونسل کے مرکزی چیئرمین حافظ محمد طاہر محمود اشرفی کو مبارکباد دیتے ہوئے کہا ہے کہ پیغام اسلام کانفرنس کے ذریعے پوری امت مسلمہ تک اسلام کا حقیقی پیغام پہنچا ہے اور اس سے عالم اسلام میں پاکستان اور اسلام کے تشخص میں اضافہ ہوا ہے۔انہوں نے کہا کہ موجودہ حالات اسلام اور امن دشمن قوتوں کے مقابلہ کیلئے اتحاد امت وقت کی ضرورت ہے۔دونوں رہنمائوں نے پاکستان علماء کونسل اور انٹر نیشنل ختم نبوت موومنٹ پاکستان سے منسلک علماء سے اپیل کی ہے کہ وہ 26فروری کو چنیوٹ میں ہونے والی فتح مباہلہ کانفرنس میں کی کامیابی کیلئے بھر پور محنت کریں اور عوام الناس کو فتنہ قادیانیت کی اسلام اور ملک دشمن سرگرمیوں سے آگاہ کرتے ہوئے فتح مباہلہ کانفرنس میں عوام الناس کی شرکت کو یقینی بنانے کیلئے بھر پور کردار اداکریں ۔ اس موقع پر دونوں رہنمائوں نے اکابرین سفیر ختم نبوت مولانا منظور احمد چنیوٹی اور مولانا محمد ضیاء القاسمی کی علمی،دینی اور ملی خدمات کو خراج تحسین پیش کرتے ہوئے ان کے مشن کو عالمی سطح پر جاری رکھنے کا عزم کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور ( جی پی آئی)چیئرمین متروکہ وقف املاک بورڈ صدیق الفاروق نے کہا ہے کہ مسلم لیگ ن اقلیتوں کے حقوق کا تحفظ کر رہی ہے۔ وزیر اعظم میاں محمد نواز شریف اور وزیر اعلی پنجاب میاں محمد شہباز شریف تاریخی ورثے کے تحفظ کے لئے بھی کوشاں ہیں۔ ان خیالات کا اظہار انہوں نے گزشتہ روز والڈ سٹی آف لاہور اتھارٹی اور متروکہ وقف املاک بورڈ کے مابین سیاحت کے فروغ کیلئے باہمی تعاون کے معاہدے کی تقریب سے گفتگوکے دوران کیا۔تقریب میں ڈائریکٹر جنرل والڈ سٹی لاہور اتھارٹی کامران لاشاری، ڈائریکٹر مارکیٹنگ آصف ظہیر، ایڈیشنل سیکرٹری شرائنز خالد علی،ترجمان اتھارٹی تانیہ قریشی ، ڈپٹی ڈائریکٹر ٹورازم عائشہ خان سمیت دیگر افراد نے شرکت کی۔ صدیق الفاروق کا کہنا تھا کہ معاہدے کا مقصد ہاہمی تعاون سے اپنے ورثے کا تحفظ ہے۔ اندرون لاہور تاریخی اہمیت کا حامل ہے جہاں کی تاریخی یادگاریں قدیم روایات کی مظہر ہیں۔ انہوں نے کہا کہ اس معاہدے کے تحت متروکہ وقف املاک بورڈ وطن عزیز میں آنے والے ہندو اور سکھ یاتریوں کو والڈ سٹی اتھارٹی کے تعاون سے یہاں کی سیاحت کے بھرپور مواقع فراہم کرے گا تاکہ اقلیتوں کے تحفظ کے تاثر کو مستحکم کیا جا سکے۔ ان کا کہنا تھا کہ ہم سکھ اور ہندو یاتریوں کی بھرپور مہمان نوازی کرتے ہیں اور اقلیتوں کے تحفظ کے لئے ٹیکسلا کے قریب زمین بھی لے رہے ہیں ۔ جبکہ والڈ سٹی اتھارٹی کے ڈائریکٹر جنرل کامران لاشاری نے چیئرمین صدیق الفاروق کا شکریہ ادا کیا اور کہا کہ مذہبی سیاحت کا فروغ ناگزیر ہے کیونکہ ہمارا خطہ دو بڑے مذاہب کا گہوارہ ہے اور مذہبی ہم آہنگی کے لئے بہت گنجائش موجود ہے۔انہوں نے کہا کہ اندرون لاہور میں مہاراجہ رنجیت سنگھ کی سمادھی کا تحفظ بھی اسی سلسلے کی ایک کڑی ہے۔ایک سوال کے جواب میں ان کا کہنا تھا کہ شاہی حمام کی بحالی کا کام مکمل ہو چکا ہے اور ہر ماہ 5000کے قریب ملکی و غیر ملکی سیاح یہاں کا دورہ بھی کرتے ہیں۔ ہم نے سیاحوں کے لئے مختلف پیکجز بھی متعارف کروائے ہیں۔ اسی قسم کے پرکشش پیکجز یہاں آنے والے ہندو اور سکھ یاتریوں کے لئے بھی متعارف کروائے جائیں گے۔گلی محلوں کی جاذبیت اور خوبصورتی کو بڑھا دیا گیا ہے۔ ان کا کہنا تھا کہ اندرون لاہور کی سیر کے لئے رنگیلے رکشوں کی مقبولیت اور ضرورت بھی بڑھ چکی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور( جی پی آئی)قائد ملت جعفریہ پاکستان اور اسلامی تحریک کے سربراہ علامہ سید ساجد علی نقوی نے کہاہے کہ اہل تشیع نے دہشت گردی اور تکفیریت کا ڈٹ کر مقابلہ کیا۔ شہداکی قربانیاں پیش کیں مگر ملکی اور قومی سلامتی پر کوئی آنچ نہیں آنے دی،اتحاد امت کو مضبوط کیا۔ہم نے ثابت کیا کہ تشیع فرقہ نہیں، دین اسلام کے پیرو کار عاشقان مصطفی اور محبان اہل بیت کا مکتب ہے۔ شیعہ کو دوسرے درجے کا شہری بنانے کے ناپاک خواب دیکھنے اور فتوے لگانے والے گندگی کے ڈھیر پر کھڑے تنہائی کا شکار اور ہم قومی دھارے کا مضبوط حصہ ہیں۔ اسلامی تحریک پنجاب کے سیاسی سیل کے چیرمین میاں فرزند علی چھچھر سے گفتگو کرتے ہوئے علامہ ساجد نقوی نے کہا کہ مفتی جعفرحسین مرحوم اور شہید علامہ عارف حسین الحسینی رحمتہ اللہ علیہ کی میراث تحریک جعفریہ نے تشیع کے حقوق اور جمہوری جدوجہد میں جو کردار ادا کیا، وہ تاریخ کاسنہری باب ہے۔جنرل ضیا الحق کی شخصی آمریت کے خلاف تشکیل پانے والے سیاسی اتحاد تحریک بحالی جمہوریت( ایم آرڈی) میں شمولیت سے تحریک جعفریہ نے عملی سیاست کا آغاز مفتی جعفرحسین مرحوم کے آخری بیانیہ کے مطابق کیا،1987ء کی قرآن وسنت کانفرنس میں شہید الحسینی کا سیاسی اعلان ہمارے لئے مشعل را ہ ہے اور اسی بنیاد پر 1988ء میں باقاعدہ انتخابی سیاست میں عملی طور پر حصہ لیا۔ پھر پیپلز ڈیموکریٹک الائنس اور متحدہ مجلس عمل کے ذریعے انتخابی سیاست میں اپنا کردا رادا کیااور کبھی کسی کی خواہش کی تکمیل یا کسی کو دباو میں لانے کے لئے کوئی ایسا قدم نہیں اٹھایا جس سے قوم کو شرمندگی ہو۔ اس حوالے سے ہماری جدوجہد سب کے سامنے ہے۔ہم نے گلگت بلتستان کے عام انتخابات میں بھی کامیابی حاصل کی۔ اس سے بھی زیادہ بہتر کردار ہم 2018ء کے انتخابات میں ادا کریں گے ۔جس کے لئے تنظیمیں ابھی سے تیاری کرلیں۔ہم سیاسی صف بندی کو دیکھ رہے ہیں اور چاہیں گے کہ متحدہ مجلس عمل کی جماعتیں اکٹھی ہوں ۔یا کوئی نیا پلیٹ فارم بنے اور سمجھتے ہیں کہ مذہبی سیاسی قوتوںکو مضبوط کرنے سے ملکی سیاست پر مثبت اثرات مرتب ہوں گے۔ ان کا کہنا تھاکہ گلگت بلتستان پاکستان کا مضبوط دفاع اور وفادار لوگوںکا خطہ ہے۔ مگر حکمرانوں کی مصلحتوں کے باعث اس علاقے کو سر زمین بے آئین رکھا گیا۔ ہم نے گلگت بلتستا ن میں حکومت تشکیل دی اور اس کے بعد بھی مشکل حالات کے باوجود اپنا کردا راد کیا۔قائد ملت جعفریہ نے کہاکہ ملک میں مذہبی انتہا پسندی اور فرقہ واریت کے نام پر انارکی اور بدامنی پھیلائی گئی، مگرہم نے حالات کا مقابلہ کیا اور آئندہ بھی کریں گے۔ انہوں نے کہا کہ مسلمانوں کے خلاف فتوے بازی کرنے والے بازاری قسم کے لوگ پالے گئے، فتویٰ ساز فیکٹریاں پیدا کی گئیں اور شخصی نظریات کو اسلام بنا کر پیش کرنے کی غلیظ مہم جاری رکھی گئی ۔ اس دوران فرقہ وارانہ ٹارگٹ کلنگ کی گئی جس کا سب سے زیادہ شکار اہل تشیع ہوئے ۔ نفرت کی بنیاد پر سیاست کرنے کی معاشرے اور آئین میں کوئی گنجائش نہیں اور ایسا کرنے والو ں کو اب منہ چھپانے کے لئے جگہ نہیں مل رہی۔وہ اپنی موت آپ مرچکے اور حرف غلط کی طرح مٹ جائیں گے۔انشااللہ ان کا حشرہ بھی تاریخ کے منفی کرداروں جیسا ہوگا۔انہوں نے کہاکہ گلگت بلتستان کو علیحدہ صوبہ بنایا جائے جبکہ فاٹا کے مستقبل کا فیصلہ وہاں کے عوام کی رائے سے ریفرنڈم کے ذریعے کیا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور( جی پی آئی) پاکستان پیپلز پارٹی پنجاب کے صدر میاں منظور احمد وٹو نے کہا ہے کہ کسانوں کے مسائل کے لئے آل پارٹیز کانفرنس نے نہایت موثر حکمت عملی اختیار کی ہے اور پیپلز پارٹی اس کو دل و جان سے سپورٹ کرتی ہے حکومت ملک میں زرعی معیشت کو سنبھالا دینے کے لئے کاشتکاروں کے مسائل پر اے پی سی کی تجاویز پر فوراً عمل درآمد کرے یہ 70 فیصد دیہاتی آبادی کی آواز ہے حکومت اس کے لئے اپنے کان کھولے اور 70 فیصد آبادی کا معاشی قتل بند کرے میاں منظور احمد وٹو نے حکومت سے مطالبہ کیا کہ حکومت زراعت کے شعبے میں ایمرجنسی نافذ کرے بجلی کے ٹیوب ویلوں کے ریٹس مقرر کئے جائیں اجناس کی سپورٹ پرائس مقرر کی جائے زرعی اجناس کی ایکسپورٹ پر سے ہر قسم کی ڈیوٹی ختم کی جائے انہوں نے کہا کہ اس سلسلہ میں تمام پارٹیاں جامع زرعی پالیسی بنا کر دیں اور حکومت اُن تجاویز پر فلفور عملدرآمد کرے۔ زراعت دُشمن پالیسیوں سے ملک کی دو تہائی آبادی متاثر ہوتی ہے کیونکہ دیہی علاقوں میں بڑی اکثریت کا دارومدار زراعت پر ہے۔ اُنہوں نے کہا کہ زراعت ملکی معیشت کی ریڑھ کی ہڈی ہے اگر اِسکو نقصان ہوتا ہے تو ملکی معیشت کو بھی کئی حوالوں سے شدید نقصان ہونا نا گزیر ہے۔ اُنہوں نے مشورہ دیا کہ حکومت کو اپنی ترقیاتی حکمتِ عملی میں زراعت کو اوّلین ترجیح دینی چاہیے کیونکہ اِس میں کم سرمایہ سے جلد اور زبردست معاشی فوائد حاصل ہوتے ہیں جس سے ملک کی معیشت کا پہیہ عوامی فلاح وبہبود کے لیے رواں دواں رہتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور ( جی پی آئی)جمعیت علما پاکستان (نیازی )کے سربراہ قائد اہل سنت پیر سید محمد معصوم حسین نقوی نے کہا ہے کہ مردم شماری کو متنازع بنانے کی غلطی نہیں کرنی چاہیے، سندھ ہو یا بلوچستان سب کے تحفظات دور کرنے ضروری ہیں۔وزیر اعظم ملک کو اتفاق فاونڈری سمجھیں اور نہ ہی اسے تخت لاہور کی جاگیر بنایا جائے، طالبان کے ساتھی دوسروں کو بھی جینے کا موقع دیں۔ کارکنوں سے گفتگو کرتے ہوئے انہوں نے کہا کہ مردم شماری ترقیاتی منصوبہ بندی کے ساتھ آئینی ضرورت بھی ہے۔ اس کے لئے صوبائی نہیں،قومی سوچ کو اپنانا ہوگا۔ جمہوریت کا حسن اور آئینی تقاضا یہی ہے کہ مردم شماری کمشن میں تمام صوبوں کو نمائندگی دینے سے وفاق مضبوط اور مردم شماری متفقہ ہوگی۔جس کے نتائج سب کے لئے قابل قبول ہوں گے۔ ان کا کہنا تھا کہ پاکستان فیڈریشن ہے ، جس میںوفاقی اکائیوں کا اطمینان اور اعتماد حاصل ہونا ضروری ہے، ورنہ سیاسی معاملات عسکریت کا رنگ اختیار کرلیں توبدامنی پیدا ہوتی ہے۔اس لئے بہتر ہوگا کہ تمام معاملات خوش اسلوبی اور کھلے دل سے طے کئے جائیں جیسے نیشنل فنانس کمشن کے مسئلے پر پنجاب نے دوسرے صوبوں کے زیاد ہ حصے کو تسلیم کرکے فراخدلی کا مظاہرہ کیا ۔ اسی طرح کے جذبے کے لئے بین الصوبائی معاملات پر فراخدلی کا مظاہر کیا جانا چاہیے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مٹھی( جی پی آئی) پی ٹی آئی کے انصاف کارواں کی جانب سے کامیابی کے ساتھ ممبر سازی کا عمل جاری ۔ اپنے پہلے مرحلے کی بھرپور کامیابی کے بعد دوسرے مرحلے آغاز ٹنڈوجام ٹنڈوالہیاراورمیر پور خاص ،جھڈو،ڈگری سے کیا اس کے بعد نوکوٹ سے کامیابیاں سمیٹتا ہوا کاروان انصاف مٹھی اور چھاچھرپہنچا۔مٹھی میں عام سندھیوں کی جوق درجوق پی ٹی آئی میں شمولیت چھاچھرو کی عوام بھی مفلسی اور بدحالی کو بدلنے کے لیے عمران خان کا ساتھ دینے کے لیے تیار، عوام نے بھاری تعداد میں پاکستان تحریک انصاف کی ممبر شپ میں حصہ لیا۔حلیم عادل شیخ نے میڈیا اور پارٹی کے حصہ بننے والی عوام سے خطاب میں کہا کہ ١تھر کی عوام کئی دہائیوں سے غربت اور افلاس کی زندگی گزاررہی ے آئے روز غریب سندھی بھائیوں کے بچے بھوک کی تاب نہ لاتے ہوئے اس دنیا سے رخصت ہورہے ہیں ، تھرمیںمیں چار سو آروپلانٹ لگانے کا دعویٰ کرنا جھوٹ کی سیاست ہے ،گندم کی سپلائی من پسند لوگوں کو نوازنے کا بہانہ ہے جبکہ مٹھی ہسپتاک سمیت سندھ کے تمام ڈسٹرکٹ ہسپتالوں میں آئے روز بچے ادویات اور ڈاکٹر اور عملے کی عدم فراہمی کے باعث مررہے ہیں جس کی پروا کرنے والا یہاں کوئی نہیں ہے ،انہوں نے کہا کہ ہمارے قائدعمران خان سندھ کے اس بوسیدہ اور گلے سڑے نظام کو تبدیل کرکے سندھ کے ہسپتالوں اسکولوں اور تعلیمی اداروں کی حالت زار کو بدلنا چاہتے عمران خان سندھ کے ہاریوں کی تقدیر بدلنا چاہتا ہے جس کے لیے ہم اپیل کرتے ہیں کہ وہ زیادہ سے زیادہ تعداد میں پی ٹی آئی کی ممبر سازی میں حصہ لیں تاکہ سندھ میں پی ٹی آئی مظبوط ہوکر موجودہ حکمرانوں سے سندھ کی عوام کی جان چھڑا سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوات( جی پی آئی)پاکستان کی تاریخ میں پہلی مرتبہ لواری سنو جیپ ریلی کے انعقاد کیلئے تیاریاں عروج پر ہیں ۔ یہ ریلی پاک فوج ، حکومت خیبر پختونخوااور ما لاکنڈ ڈویژن کی عوام کے باہمی اشتراک سے 28فروری کو لواری ٹاپ پر منعقد کی جا ری ہے ۔ تاریخ میں پہلی بار برف سے ڈھکی ہوئی لواری ٹاپ پر ایک شاندار اور عظیم وشان جیپ ریلی کا انعقاد کیا جارہا ہے ۔ یہ جیپ ریلی ایسی ٹاپ پر منعقد کی جاری ہے جس کے شمال میں چترال اور جنوب میں اپر دیر کے علاقے آباد ہیں اور یہ علاقے تاریخ میں ہمیشہ شدید برفباری کی وجہ سے موسم سرما میں منقطع رہتے تھے ۔ شدید برفباری کے باعث لوگوں کا لواری ٹاپ سے آنا جانا اور رابطہ منقطع رہتا تھا اور اسی وجہ سے بین الاقوامی میڈیا میں لواری ٹاپ کو ”Hell Road” کے نام سے گردانا جاتا ہے ، لیکن اب پاک فوج ، حکومت خیبر پختونخوااور مالاکنڈ ڈویژن کی عوام کے باہمی اشتراک سے اسی” ”Hell Roadپر ایک سحر انگیز مہم سر کی جاری ہے ۔تاریخ میں اپنی نوعیت کی یہ پہلی جیپ ریلی 28فروری کو منعقد کی جائے گی ۔ یہ ریلی چار حصوں پر مشتمل ہوگی اور اس کا کل فاصلہ 20.9کلومیٹر ہے ۔ ریلی کا یہ ٹریک لواری ٹاپ پر لواری ٹنل کے گردونواح میں منتخب کیا گیا ہے ۔ یہ جیپ ریلی سطح سمندر سے 10,230فٹ کی بلندی پر وقوع پذیر ہو گی ۔ اس سال موسم سرما میں لواری ٹاپ کا آمدروفت کیلئے کھلا رہنا پاک فوج کی انتھک محنت اور جد وجہد کا منہ بولتا ثبوت ہے ۔ جس کے لیے چترا ل اور دیر کی عوام کے ساتھ ساتھ دیگر سیاح بھی پاک فوج کے شکر گزار ہیں۔ اب اس ریلی کے انعقادسے بین الاقوامی سطح پر سیاحوں کیلئے مزید کشش کے مواقع فراہم کیے جارہے ہیں ، جس سے امن وامان کے ساتھ ساتھ سیاحت کو دن دگنی اور رات چوگنی ترقی نصیب ہوگی ۔ جیپ ریلی کا انعقاد اس بات کا منہ بولتا ثبوت ہے کہ اب اس خطے میں مکمل امن وامان بحال ہو چکا ہے قومی اور بین الاقوامی سیاح، سیاحت کیلئے پہلے سے کہیںبڑھ کر اس خطے سے لطف اندوز ہو سکتے ہیں ۔ریلی کے موقع پر دیر اور چترال کے مقامی رقص اور دیگر رنگا رنگ ثقافتی پروگرام بھی منعقد کئے جائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوات( جی پی آئی)معروف قانون دان JUIکے سر گرم کارکن اور ویلج نا ظم اشفاق خان ایڈوکیٹ نے کہا ہے کہ نیک پی خیل نہر کی صفائی کے نام پر ہر سال لا کھوں روپے کے فنڈ خورد برد ہو رہے ہیں نہر میں نہ تو صفائی ہو رہی ہے اور نہ ہی اس کے لئے کوئی عملی اقدامات اُٹھائے جارہے ہیں انہوں نے کہا کہ نہر میں جگہ جگہ کتے ، گدھے اور اس طرح دیگر جانور مردہ پڑے ہیں اور جگہ جگہ گندگی کے ڈھیر پڑی ہے ادھر برہ بانڈئی میں نہر کے مرمت کے نام پر نہر کو بند کر دیا گیا ہے جبکہ اس موقع پر غنیمت جان کر بل صفائی کا کام اور مرمت بھی ہو سکتے ہیں لیکن کوئی توجہ نہیں دے رہے انہوں نے کہا کہ اس وقت پورے نہر میں صفائی کا کام نہ ہونے کے برابر ہے اس طرح کاشت کاروںاور با غا ت کے ما لکان کو پانی بند ہونے کے وجہ سے سخت مشکلا ت کا سامنا کر نا پڑتا ہے تبدیلی کے دعویداروں نے صفائی کے نام پر بھی فنڈ ہضم کی جبکہ برہ بانڈئی کے مقام پر نہر کے معمولی سے مرمت کو بات سے بتھگڈ بنانے کے مقصد سے ایک میگا پراجیکٹ بنا یا گیا ہے جو عوام کے آنکھوں میں دھول جھونک رہے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوات( جی پی آئی)دفتر ریجنل وفاقی محتسب سیدوشریف سوات میں وفاقی حکومت کے زیر انتظام محکموں کے خلاف شکایات کی سماعت بدھ کے روز ڈائریکٹر جنرل جہانزیب عارف نے کی ۔سماعت کے دوران بجلی ،گیس اور دیگر وفاقی محکموں سے متعلق شکایات کا جائزہ لیا گیا اور درخواست دہندگان کی داد رسی کی گئی۔یاد رہے کہ وفاقی محتسب کے ریجنل دفتر نے احاطہ کچہری گل کدہ سوات میں کام شروع کر دیا ہے جس میں ملاکنڈ ڈویژن کے بجلی اور گیس سمیت دیگر وفاقی محکموں کے خلاف عوامی شکایات کی فوری مفت سماعت کی جاتی ہے اور عوام کو ان کی دہلیز پر انصاف فراہم کیا جاتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوات( جی پی آئی)پاکستان مسلم لیگ نواز یونین کونسل ملوک اباد کے صدر و منتخب جنرل کونسلر گل رحمن ،نائب صدر و جنرل کونسلر موسی محمداور یونین کونسل ملوک اباد کے جنرل سیکرٹری ظاہر گل نے ایک مشترکہ اخباری بیان میں کہاہے کہ وفاق میں نواز لیگ کی حکومت ،سوات میں وزیر اعظم کے مشیر انجینئر امیر مقام کی موجودگی اور صوبہ کے پی کے میں پارٹی گورنر کی تعیناتی کے باوجود سوات میں ن لیگ کے کارکنان انتہائی بے چینی اور اضطراب کا شکار ہیں کیونکہ سوات کے ضلع ناظم جو کہ ن لیگ سے تعلق رکھتے ہیں کہ ہوتے ہوئے بھی کسی محکمے میں کارکنوں کی کوئی شنوائی نہیں ہوتی اور جس کی وجہ سے کارکنوں میں مایوسی پھیل رہی ہے ایسی صورتحال میں صدر گل رحمن اور کابینہ کے دیگر افراد انجینئر امیر مقام گورنر کے پی کے اور ضلع ناظم سے ہمدردانہ اپیل کرتے ہیں کہ کارکنوں کی نفس کی بحالی کیلئے متعلقہ محکموں اور تمام سرکاری دفاتر میں ن لیگ کے کارکنوں کے جائز کاموں کا ہونا یقینی بنایا جائے تاکہ پارٹی کارکن بھی سر اٹھا کر کہہ سکیں کہ وفاق میں ہماری حکومت ہے ہمارے سروں پر انجینئر امیرمقام کا دست شفقت اور ضلع ناظم بھی ن لیگ کا ہے۔