گجرات (جی پی آئی) پاکستان سے محبت کا سبق دی ایجوکیٹرز بارہ دری کیمپس کی اولین ترجیح ہے۔ بچوں میں حب الوطنی اور اپنی ثقافت سے پیار کرنا سکھانے کے لئے دی ایجوکیٹرز بارہ دری کیمپس کی انتظامیہ مختلف پروگرام منعقد کر رہی ہے۔ ان خیالات کا اظہار ڈائریکٹر دی ایجوکیٹرز بارہ دری کیمپس شہزاد شفیق شرقپوری نے کیا۔ انہوں نے کہا کہ ہم چاہتے ہیں کہ ہمارے طلباء بہترین انسان بنیں اور اپنی ثقافت سے پیار کریں۔ ایڈمنسٹریٹر حافظ محمد طاہر نے کہا کہ دی ایجوکیٹرز بارہ دری کیمپس نے ہمیشہ منفرد کام کیا ہے اور کلچرل ڈے اسی سلسلہ کی ایک کڑی ہے۔ پری سکول کے تینوں درجنوں پری نرسری، نرسری اور کے جی کے بچوں نے صوبہ پنجاب، سندھ، کے پی کے اور بلوچستان کی ثقافت کے حوالے سے رنگا رنگ پروگرام کئے اور مختلف ماڈلز اور نقشہ جات کے ذریعے بچوں کو معلومات فراہم کیں۔ مس مہوش کی نگرانی میں بچوں نے خصوصی پروگرام پیش کئے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) دی ایجوکیٹرز بارہ دری کیمپس گجرات کے ڈائریکٹر شہزادہ شہزاد شفیق نے کہا ہے کہ دی ایجوکیٹر سکول بارہ دری کیمپس کے بارے میں جو لوگ افواہیں پھیلا رہے ہیں کہ اب یہ برانچ ایجوکیٹرز کی نہیں رہی وہ غلط پراپیگنڈہ کر رہے ہیں۔ ہر سال دی ایجوکیٹرز سکول سسٹم سے فرنچائز کی رجسٹریشن کرائی جاتی ہے اور اس سال بھی دی ایجوکیٹرز سکول سسٹم بارہ دری کیمپس کی رجسٹریشن کروائی گئی ہے۔ مخالفین ہماری مقبولیت سے خائف ہیں کیونکہ یہاں پر 2600 سے زائد بچے تعلیم حاصل کر رہے ہیں اور 2010 ء سے لے کر آج تک 82 بچے، بچیاں قرآن حافظ کر چکے ہیں اور بچوں کو ظہر کی نماز بھی پڑھائی جاتی ہے۔انہوں نے کہا کہ دی ایجوکیٹرز بارہ دری کیمپس گجرات کا واحد سکول ہے جہاں پر 150 سے زائد اکیڈمک سٹاف موجود ہے۔ خصوصی انٹرویو میں شہزادہ شہزاد شفیق نے کہا کہ ہمارے ہاں سکیورٹی کے اقدامات سخت ہیں۔ حکومت ایسا ماحول پید اکرے کہ تعلیمی اداروں میں بچے بغیر خوف کے اعلیٰ تعلیم حاصل کر سکیں۔ شہزادہ شہزاد شفیق نے اعلان کیا کہ گجرات پریس کلب کے ممبران کو بھی 50 فیصد ڈسکاؤنٹ دیا جائے گا جو صحافی گجرات پریس کلب کے ممبر ہوں گے ان کے بچوں کو ایڈمیشن فیس اور دیگر فیس میں 50 فیصد رعایت دی جائے گی۔ دی ایجوکیٹر بارہ دری کیمپس میں پولیس کے شہداء کے بچوں کو 100 فیصد فری ایجوکیشن دی جا رہی ہے۔ انہوں نے کہا کہ حکومت کا کہنا ہے کہ پرائیویٹ سکول 10 فیصد بچوں کو فری تعلیم دے۔ میرے سکول میں 37 فیصد بچے فری تعلیم حاصل کر رہے ہیں۔ کوئی این جی او ، پرائیویٹ سکول 37 فیصد بچے فری نہیں پڑھا رہی۔ انہوں نے کہا کہ دی ایجوکیٹر بارہ دری کیمپس میں 1026 بچے فری تعلیم حاصل کر رہے ہیں اور 150 بچوں کو سکول اپنی طرف سے کھانا کھلاتا ہے اور کتابیں بھی فری دی جاتی ہیں۔ شعبہ حفظ بالکل فری ہے۔ اگر ہم ایجوکیشن کی خدمت نہیں کر رہے تو پھر کیا کر رہے ہیں۔ انہوں نے کہا کہ مختلف ادارے ہمیں سکیورٹی کے نام پر ، ٹیکسز کے نام پر تنگ کرتے رہتے ہیں۔ ہم بچوں کو تعلیم دے رہے ہیں ان کی تربیت کر رہے ہیں۔ انہوں نے کہا کہ دی ایجوکیٹرز کے جتنے بھی گجرات میں کیمپس ہیں ان کے بچے میرے کیمپس میں مائی گریشن کرا کر آسکتے ہیں۔ میں ان کو 50 فیصد فیس میں رعایت دے کر تعلیم دینے کیلئے تیار ہوں۔ انہوں نے کہا کہ میں کوئی کاروبار نہیں کر رہا ہے گجرات کے جتنے بھی انگلش میڈیم سکول میں پڑھ رہے ہیں وہ اگر دی ایجوکیٹر سکول میں پڑھنا چاہتے ہیں تو ہم انہیں 25 فیصد رعایت دینے کیلئے تیارہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) گجرات میں سنگت ڈویلپمنٹ فا و نڈیشن اورفافن کے اشتراک سے کمیونٹی انٹر فیس میٹنگ منعقد کروائی گئی جسِ میں میڈم نزہت ضلعی صدرپاکستان مسلم لیگ (ن)، ر خسانہ الہی ضلعی کوآرڈینیٹر پاکستان مسلم لیگ(ق)، ربیعہ شاہین ضلعی صدر (پی ٹی آئی) نے شرکت کی۔ رخسانہ الہی ( ضلعی کوآرڈینیٹر پاکستان مسلم لیگ(ق) اظہارِ خیال کرتے ہوئے کہا انتخابی عمل میں انتخابی اصطلاحات انتہائی نا گزیر ہیں ۔ ووٹر رجسٹریشن کے حوالے سے بات کرتے ہوئے اُنھوں نے کہا کہ ان کی پارٹی ووٹر رجسٹریشن کے حوالے سے کافی متحرک ہے اس بات سے اتفاق کیا کہ شناختی کارڈ بننے کے ساتھ ہی ووٹ رجسٹریشن بھی ہو جانی چاہیے۔ میڈم ربیعہ ضلعی صدر (پی ٹی آئی)نے اظہارِ خیال کرتے ہوئے کہ کہنے کو تو الیکشن کمشن آزاد ہے مگر وہ اتنا آزاد بھی نہیں ہے ابھی بھی الیکشن کمشن پر سیاسی اثرات ہیں۔ جسِ کی وجہ سے بہت سے انتخابی مسائل پیدا ہوتے ہیں ۔ سلیم قاسم (ایڈووکیٹ ) نے حلقہ بندی پر بات کرتے ہوئے کہا حلقہ بندی اُس وقت تک ٹھیک نہیں ہو سکتی جب تک مردم شماری نہیں ہو جاتی ۔ اور مردم شما ری کے بعد ووٹر لسٹیں دوبارہ بنیں گی ۔ پھر مسئلہ حل ہوگا۔ اس کے علاوہ شہناز رفیق ڈسٹرکٹ کو آرڈینیٹر نے کہا پاکستان میں شہریوں کے تحرک برائے جمہوری حکمرانی کا پروگرام (CADGP کا مقصد ر محروم طبقات غریب ، مذہبی اقلییتں ، خواتین اور نوجوانوں کی نمائندگی کرنا ہے ۔ جواب دہی اور شفافیت کو فروغ دینے کا ساتھ ساتھ توجہ حقوق کے حامل اور ذمہ دار ان عہدیداروں کے درمیان نئے تعلقات بنانے اور موجودہ تعلقات کو مضبوط بنانا ہے تاکہ شہریوں کی آواز کو انتظامی ، ریگولیٹری اور قانون سازی میں اصطلاحات کے لئے ذریعہ بنا کر انتخابی ، قانون سازی اور مقامی گورننس میں بہتری لائی جاسکے۔ اس میں فوکس کیا گیا کہ ان محروم طبقات جن میں اقلیتیں بھی شامل ہیں کی ووٹ رجسٹرشن پر خصوصی توجہ دی جائے ۔ اور اس سلسلے میں سیاسی جماعتوں کا کردار بڑا اہم ہونا چاہے ۔ تا کہ وہ بھی اپنا حقِ رائے دہی استعمال کر کے گورننس کو بہتر بنانے میں اہم کردار ادا کر سکیں ۔ افتخار بھٹہ ممبر ڈسٹرکٹ گورننس سپورٹ گروپ نے کہا سیاسی جماعتوں کو چاہیے کی اپنے آپ کو یونین کونسل کی سطح پر منظم کریں اور لوگوں میں خاص طور پر خواتین میں ووٹ کی اہمیت کے بارے میں شعور اُجاگر کریں ۔ اور الیکشن سے پہلے اپنے اپنے حلقوں میں ووٹرز کی ٹریننگ کروائیں ۔ تا کہ خواتین انتخابی عمل میں حصہ لے کر گورننس کو فروغ دیں ۔ اس انٹر فیس میٹنگ میں خرم صد یق ا یڈووکیٹ ، ڈاکڑ شکیل، رزاق غفاری عنصر پروین ، نسیم رفیق، سعید ملک، فرح دیبا، خرم شہزاد، عنبرین کنول ڈسٹرکٹ کوآرڈینیٹر سنگت ڈویلمپنٹ نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ٹی ایم اے گجرات کی غفلت اور ناقص کارکردگی چوک صدیق اکبر محلہ نور پور شرقی کی سیوریج لائن بند گلیوں اور محلے میں گندھے پانی کا راج ، علاقہ کے مکین شدید مشکلات کا شکار اہلیان علاقہ نے میڈیا کے نمائندوں سے گفتگو کرتے ہوئے بتایا کہ محلہ نور پور شرقی کی سیوریج لائن آئے روز بند رہتی ہے جس کی وجہ سے چوک صدیق اکبر اور اس کے ملحقہ گلیوں اور محلوں میں کئی کئی فٹ گندا پانی کھڑا ہوجاتا ہے جس کی وجہ سے علاقہ میں ڈینگی مچھر اور بدبو و تعفن پھیلا رہتا ہے ، گذشتہ دو تین دن سے سیوریج لائن بند ہے کئی بار کمپلین درج کروا چکے ہیں لیکن ٹی ایم اے کی ارباب اختیار لمبی تان کرسوئے ہوئے ہیں اور ادھر ہمارے محلے میں کئی کئی فٹ گندا پانی کھڑا ہے اہل محلہ کا ایک وفد سی او عظمت فرید کو بھی ملا جنہوں نے مسئلے کو حل کرانے کی یقین دہانی کروائی مگر وہ یقین دہانی بھی صرف زبانی جمع خرچ ہی رہی ،ہم ڈی سی او لیاقت علی چٹھہ ، ایڈمنسٹر عرفان علی کاٹھیا ، چیئرمین حاجی ناصر محمود ، سے پر زور الفاظ میں اپیل کرتے ہیں کہ وہ خود علاقہ کا وزٹ کریں اور ٹی ایم اے کے غفلت میں سوئے ملازمین کو جگائے اور ہمارے علاقے کی آئیے روز سیوریج کی بندش کے مسئلے کو مستقل بنیادی پر حل کروایا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) دی گجرات ینگ فیلوز لائنز کلب کا اجلاس صدر شیخ عدنان پرویز کی صدارت میں فیصل ہوٹل میں ہوا جس میں دی گجرات ینگ فیلوز لائنز کلب کے شادی پراجیکٹس اور دیگر پراجیکٹس زیر بحث آئے۔ اجلاس میں سابق صدر ینگ فیلوز لائنز کلب حاجی ناصر محمود کی بھاوج اور حاجی عمران ظفر ، عدنان مکی کی والدہ، جاوید بٹ کے صاحبزادے، شیخ محمد اسلام کی وفات پر دعائے مغفرت کی گئی۔ اجلاس میں خطاب کرتے ہوئے شیخ عدنان پرویز نے کہا کہ دی گجرات ینگ فیلوز لائنز کلب دکھی انسانیت کی خدمت میں مصروف ہے اور دکھی انسانیت کی خدمت کرنا ہے اصل عبادت ہے۔ انہوں نے کہا کہ دی گجرات ینگ فیلوز لائنز کلب گجرات کی واحد این جی او ہے جو کہ فلاحی کاموں میں بڑھ چڑھ کر حصہ لیتی ہے۔اس موقع پر سیکرٹری کاشف ندیم ، شیخ عابد قمر، ماجد ربانی، عامر نعمان، فرقان ایوب، ندیم چیمہ، نعیم امتیاز گوندل، ناصر چوہدری، سیٹھ قمر خورشید، مہر عامر، شیخ عرفان شفیع اور دیگر نے بھی خطاب کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) سابق صدر گجرات چیمبر آف کامرس اینڈ انڈسٹری طارق بلال ملک، چیئرمین صنعتی نمائش کمیٹی احمد حسن مٹو نے سوڈان کے سفیر سے ملاقات کی اور انہیں صنعتی نمائش کی دعوت بھی دی جو سوڈان کے سفیر نے قبول کر لی۔ 4 مارچ کو سوڈان کے سفیر گجرات کی صنعتی نمائش کا وزٹ کریں گے اور بزنس مینو ں سے ملاقات بھی کریں گے۔ یاد رہے کہ گجرات سے سوڈان میں پنکھے ایکسپورٹ ہو رہے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) گجرات چیمبر کی سالانہ صنعتی نمائش کا افتتاح 2مارچ کو FPCCI کے صدر عبدالرؤف عالم ، افتخار علی ملک نائب صدر سارک چیمبر آف کامرس اینڈ انڈسٹری اور صدر شاہین گروپ حاجی ناصر محمود اپنے دست مبارک سے کریں گے۔ صنعتی نمائش کیلئے ظہور الٰہی اسٹیڈیم میں مارکیاں نصب کر دی گئی ہیں۔ آج سٹالز کی فٹنگ کی جائے گی جبکہ جھولے اور فوڈ کورٹ سجانے والوں کو جگہ بھی الاٹ کی جائے گی۔ جمعہ کے روز صدر میاں محمد اعجاز ، احمد حسن مٹو، وحید الدین چوہدری، ثوبان بٹ، خان شبیر خان، میاں اکمل حسین، آصف رضا نقوی، مہر ندیم عباس او ر دیگر ممبران نے صنعتی نمائش کے انتظامات کا جائزہ لیا اور انہیں تسلی بخش قرار دیا گیا۔ احمد حسن مٹو نے میڈیا کو بتایا کہ چند سٹالز رہ چکے ہیں۔ سٹالز لگانے کے خواہشمند بزنس مین ، تاجر گجرات چیمبر رابطہ کریں تاکہ انہیں سٹالز فراہم کئے جا سکیں۔ احمد حسن مٹو نے کہا کہ اس سال سیالکوٹ، گوجرانوالہ، ملتان اور دیگر علاقوں سے بھی سٹالز ہولڈر آرہے ہیں۔ ملک کی ملٹی نیشنل کمپنیاں بھی اپنے سٹالز لگا رہی ہیں۔ گجرات میں فین،فرنیچر، سرامکس، پی وی سی پائپ، کارپٹ او ر دیگر مصنوعات کے سٹالز بک ہو چکے ہیں۔ انشاء اللہ تعالیٰ اس نمائش کی کامیابی سے گجرات کے کاروباری لوگوں کو بھرپور فائدہ حاصل ہو گا اور اس میگا ایونٹ سے گجرات کی مصنوعات کی ایکسپورٹ میں بھی اضافہ ہو گا۔ مختلف ممالک کے سفیر بھی اس نمائش میں شرکت کر رہے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) دی ایجوکیٹر بارہ دری کیمپس کے کلاس دہم کے طلباء کی الوداعی تقریب منعقد ہوئی جس کی صدارت ڈائریکٹر دی ایجوکیٹر بارہ دری کیمپس شہزاد شفیق شرقپوری نے کی جبکہ مہمان خصوصی مسز شازیہ شہزاد تھیں۔ اس موقع پر اہم شخصیات نے شرکت کی جن میں سعودی عرب کی ممتاز شخصیت ساجد ڈار، ممتاز صحافی محمود اختر محمود، ڈاکٹر رزاق احمد غفاری، شہباز اے چوہدری، ساجد نذیر، مسز نسرین ساجد، شمائلہ ناز، نجف قریشی، مسز سعدیہ سلیمان، حافظ محمد طاہر، خادم حسین ،انیلہ کرامت، حافظ فیض الاسلام اوردیگر شامل تھے۔ اس موقع پر بچوں نے مختلف خاکے اور نغمے پیش کئے۔ اساتذہ کو خراج تحسین پیش کیا گیا اور کلاس نہم کے طلباء نے کلاس دہم کے طلباء کو خراج تحسین پیش کیا اور اساتذہ کی کاوشوں کو سراہا۔ اس موقع پر خطاب کرتے ہوئے ڈائریکٹر دی ایجوکیٹرز شہزاد شفیق نے کہا کہ آج کا پروگرام دیکھ کر مجھے اپنے بچپن کی یادآگئی ہے کہ ہم کس طرح اپنے اساتذہ کے احترام کا خیال کرتے ہیں ۔ انہوں نے کہا کہ بیٹے اور بیٹی میں بہت فرق ہوتا ہے۔ بیٹے گھر کا سربراہ ہوتے ہیں اور بیٹیاں پرائی امانت ہوتی ہیں۔ آج میں اپنے بیٹوں کو اس دعا کے ساتھ رخصت کر رہا ہوں کہ وہ مستقبل کے تمام چیلنجز کا مقابلہ کر سکیں گے اور ملک وقوم کی ترقی میں اپنا کردار ادا کر سکیں گے۔ انہوں نے کہا کہ نوجوان نسل کی بہترین تربیت ہماری اولین ترجیح ہے اور ہم اپنے اساتذہ کو اس طرح کی ٹریننگ دیتے ہیں کہ وہ نوجوان نسل کو بہترین تربیت دیں۔ اس موقع پر طلباء نے بھی اپنے خیالات کا اظہار کیا اور مہمانوں کو تحائف پیش کئے گئے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی)آمنہ انجم رفیق فیملی (رائل فین)اورڈیسنٹ ویلفئرسوسائٹی گجرات کے تعاون سے بریسٹ کینسر کلینک کا افتتاح آج 27 فروری بروزہفتہ 11 بجے دن کلیفٹ ہسپتال جی ٹی روڈ گجرات میں ہو گا UHS کے تعاون سے بریسٹ کینسر علاج ٹریننگ ورکشاپ اور فری کیمپ کا ا ہتمام کیا جارہا ہے عورتوں کا معائنہ 11 بجے سے 4 بجے تک فری کیا جائے گا فری معائنہ ، فری میمو گرافی ، فری بریسٹ الڑاسائونڈ جس میں بریسٹ سرجن لیڈی ڈاکٹر پینلوپ میکمینس(Dr.PenlopeMcMANUS) بریسٹ سرجن UK پروفیسر ڈاکٹر عارف رشید خواجہ، بریسٹ سرجن پروفیسر آف سرجری گوجرانوالہ میڈیکل کالج ، ڈاکٹر حمزہ عارف خواجہ بریسٹ ریڈیالوجسٹ اتفاق ہسپتال لاہور شریک ہورہے ہیں ڈاکٹر اعجازبشیر صدر ڈیسینٹ ویلفیئر سوسائٹیپروگرام کی نگرانی کررہے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی)جمعیت علماء اسلام ضلع گجرات کے امیر اور وفاق المدارس العربیہ پاکستان گجرات منڈی بہا ئوالدین کے مسئول مولانا الیاس احمد نے کہا کہ پنجاب اسمبلی کی طرف سے خواتین پر تشدد کے خلاف منظور ہونے والا بل اسلامی اور مشرقی روایات کے منافی ہے یہبل ہمارے اسلامی اور مشرقی کلچر کے خلاف گھنائو نی سازش ہے اس خاندان کے باہمی اعتماد اوروقارکو ٹھیس پہنچے گی اسلام نے خواتین سمیت تما م انسانی طبقات اورجانوروں کے حقوق متعین کئے ہیں خواتین سے خیر خواہی کے دعویداراسلام کے نظام حقوق کا مطالعہ کریں اس گندے قانون کی ہمارے صوبے اور ملک کو ضرورت نہیں ہے اس خاوند کی گھر پر حکمرانی اورگرفت کمزور کر کے مرد کی توہین کی جارہی ہے مولانا الیاس احمد نے کہاکہ بل پاس کرنے والے اراکین پالیمنٹ ربڑ اسٹنمپ بننے کی بجائے اسلامی اور ملکی آئین کو مدنظر رکھتے ہوئے قانون سازی کریں حکومت اگر بنیادی انسانی حقوق کے قانون پر عمل درآمد یقینی بنا لے تو ایسے متنازعہ قانون کی ضرورت باقی نہ رہے علماء کرام اس قانون کے خلاف آواز بلند کریں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی)جمعیت اشاعت توحیدوسنت لالہ موسیٰ کے زیراہتمام شیخ التفسیر علامہ عطا ء اللہ بندیالوی جامع مسجد اشاعت توحید وسنت قصبہ محلہ سرکلرروڈ لالہ موسیٰ میں 43ماہانہ محفل درس قرآن میںآیت الکرسی کے موضوع پربیان فرمائیں گے خواتین کے لئے پردہ کاانتظام کیا گیا ہے پروفیسر مولانا محمد افضل ضیاء کی زیر نگرانی پروگرام کے انتظامات مکمل کرلئے گئے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی)ڈسٹرکٹ بار ایسوسی ایشن گجرات کے ترجمان خالد مسعود ملک ایڈووکیٹ کے مطابق لاہور ہائی کورٹ بار ایسوسی ایشن کے سالانہ انتخابات برائے سال 2016 ء کیلئے گجرات بار ایسوسی ایشن کے 402 ووٹرز اپنا حق رائے دہی استعمال کریں گے۔ ووٹرز اپنا شناختی کارڈ، لائسنس ہمراہ لائیں۔ ووٹرز کیلئے بائیو میٹرک تصدیق ضروری ہو گی۔ گجرات بار سے آج 27 فروری بروز ہفتہ 10 بجے قافلہ روانہ ہو گا۔ ووٹرز حضرات سے التماس ہے کہ وہ بروقت تشریف لائیں تاکہ وقت مقررہ پر قافلہ روانہ ہو کر اپنا ووٹ استعمال کر سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی)محلہ ڈھکی بازار اندرون کابلی گیٹ محلہ قلعہ شمالی و جنوبی اور دیگر ملحقہ علاقے گندہ پانی پینے پر مجبور۔ ڈھکی بازار میں بور بیٹھ جانے سے لوگ گندہ پانی پینے پر مجبور ہو چکے ہیں جبکہ ٹی ایم اے کی طرف سے کسی قسم کا کوئی ایکشن نہیں لیا گیا۔ گجرات کے سیاسی، سماجی حلقوں نے تشویش کا اظہار کیا ہے اورڈی سی او گجرات لیاقت علی چٹھہ، ایڈمنسٹریٹر اے ڈی سی جی عرفان کاٹھیا اور حکومتی عہدیداران سے اپیل کی ہے کہ ڈھکی بازار میں پینے کے پانی کا بندوبست کرایا جائے۔ بلدیاتی انتخابات میں بڑے بڑے دعوے کرنے والے حکمرانوں نے نئے بور کرانے ، واٹر فلٹر پلانٹ لگانے کے لئے ووٹر حاصل کئے مگر ابھی تک یہاں کے رہائشیوں کو صاف پانی نہیں مل سکا۔ محلہ کابلی گیٹ کے رہائشیوں کا کہنا ہے کہ ہر بار حکومتی عہدیدار واٹر فلٹر پلانٹ لگانے اور لالی پاپ دینے کے بعد واپس نہیں آتے۔ ڈی سی او لیاقت علی چٹھہ ، اے ڈی سی جی عرفان کاٹھیا علاقہ کے عوام کا دیرینہ مسئلہ حل کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی)چیئرمین ہلال احمر پاکستان ڈاکٹر سعید الہی نے کہا ہے کہ اہل گجرات نے فلاحی منصوبوں کیلئے عملی کردار ادا کرکے حق ادا کردیا ، شہریوں کے بہتری کے لئے اس مشن میں ہلال احمر انکے شانہ بشانہ ہوگا۔ ان خیالات کا اظہار انہوں نے ہلا ل احمر گجرات کے اجلاس سے خطاب کرتے ہوئے کیا، ڈی سی او لیاقت علی چٹھہ، ایم این اے چوہدری عابد رضا، ایم پی ایز حاجی عمران ظفر، میجر (ر) معین نواز، چوہدری شبیر احمد، صدر چیمبر آف کامرس میاں اعجاز احمد، ڈاکٹر اعجاز بشیر نے بھی اظہار خیال کیا ، اے سی گجرات نورالعین، ای ڈی او ایجوکیشن طاہر کاشف ای ڈی او ہیلتھ ڈاکٹر طاہر بشیر، سمیت مختلف سرکاری محکموں کے افسران بھی موجود تھے۔ ڈی سی او لیاقت علی چٹھہ نے چیئرمین ہلال احمر پاکستان کو کڈنی سنٹر، سنت پورہ کھاریاں اور خوجیانوالی میں ہلال احمر ڈسپنسریوں اور دیگر منصوبہ جات کے حوالے سے آگاہ کیا۔ ڈی سی او لیاقت علی چٹھہ نے بتایا کہ گجرات میں کسی بھی ہنگامی صورتحال کے لئے مناسب مقدار میں امدادی سامان موجود ہے اور تجویز دی کہ گجرات میں ہلال احمر وئیر ہائوس قائم کیا جائے۔ڈی سی او لیاقت علی چٹھہ نے کہا کہ ہلال احمر گجرات فلاحی منصوبوں کے لئے بھرپور کام کررہی ہے ،ان سرگرمیوں کا دائرہ کار بڑھا کر لاہور اور دیگر بڑے شہروں کی طرز پر منصوبہ جات شروع کئے جانے کی ضرورت ہے۔ چیئرمین ہلال احمر پاکستان نے اجلاس سے خطاب کرتے ہوئے کہا کہ ہلال احمر پاکستان ڈسپنسریوں میں ادویات کی فراہمی کے منصوبہ پر کام کر رہا ہے اور یقین دلایا کہ ضلع گجرات کی ڈسپنسریوں کو بھی اس منصوبہ میں شامل کیا جائے گا۔ انہوںنے ہلال احمر پاکستان کی طرف سے کڈنی سنٹر گجرات کو چار ڈائیلسز مشینیں عطیہ کرنے کا بھی اعلان کیا اور یقین دلایاکہ جلالپور جٹاں میں ایڈز کے مریضوں کو سہولیات کی فراہمی کے لئے فوری اقدامات کئے جائیں گے ۔ انہوںنے کہا کہ دوست ممالک نے ہلال احمر کے زیر اہتمام مختلف شہروں میں 50پچاس بیڈ کے ہسپتال بنانے کی آفر کی ہے اس منصوبے میں گجرات کو بھی شامل کیا جائے گا۔ ڈاکٹر سعید الہی نے کہا کہ سکولوں کے طلبہ، وکلا ، ججز،صحافیوں اور دیگر شعبہ ہائے زندگی کے افراد کو ابتدائی طبی امداد کے حوالے سے تربیت دی جائے گی نیز رضا کاروں کی تربیت کے لئے ماسٹر ٹرینرز فراہم کئے جائیں گے اور دو ماہ میں تربیتی سنٹر بھی بنایا جائے گا۔ انہوںنے ارکان اسمبلی سے کہا کہ وہ ہر یونین کونسل سے پچاس پچاس رضا کار فراہم کریں ہلال احمر انکی تربیت کرے گا۔ انہوںنے فلاحی کاموں کے لئے بھرپو ر اقدامات پر ڈی سی او لیاقت علی چٹھہ، عوامی نمائندگان اور مخیر حضرات کو زبردست خراج تحسین پیش کیا۔ چیئرمین ہلال احمر ڈاکٹر سعید الہی نے ملکی سطح پر ادارے کے منصوبہ جات کا ذکر کرتے ہوئے بتایا کہ ملک کی پہلی ڈیسزاسٹر مینجمنٹ یونیورسٹی کے قیام کے لئے اقدامات جاری ہے اس کے ساتھ ملک کا پہلا ایمبولینس کالج بنایا گیا ہے جہاں 100افراد کو تربیت دی جارہی ہے۔ انہوںنے کہا کہ ہلال احمر کے رضا کاروںکی تعداد دو سال میں 8ہزار سے بڑھ کر 17لاکھ تک پہنچ چکی ہے جبکہ رجسٹریشن کے لئے جدید سافٹ وئیر متعارف کرایا گیا ہے۔ انہوںنے کہا کہ ہلال احمر پاکستان روڈ سیفٹی اور سکول سیفٹی کا بھی پروگرام شروع کرنے کی منصوبہ بندی کر رہا ہے ، کالجز اور سکولوں میں این سی سی کی جگہ ریڈ کریسنٹ کورس متعارف کرایا جارہا ہے جس میں شرکت کرینوالوں کو اضافی نمبر دیے جائیں گے ان تمام منصوبہ جات کی نگرانی کے لئے اضلاع میں ڈسٹرکٹ آفیسر ہلال احمر تعینات کیا جائے گا۔ ڈاکٹر سعید الہی نے کہا کہ تنظیم اتحاد المدارس سے میثاق انسانیت کیا گیا ہے گیا ہے جس کے تحت دینی مدارس کے طلبہ بھی ہلال احمر کے رضا کار ہوں گے ہمارا عزم ہے کہ ہر گھر میں کم از کم ایک فرد ابتدائی طبی امداد کے لئے تربیت یافتہ ہو ۔ انہوں نے کہا کہ لاسٹ ہیلپ لائن متعارف کرائی گئی ہے جس کے تحت گمشدہ اور مسائل میں گھر ے افراد کو امداد فراہم کی جا سکے گی اس مقصد کے لئے کمیٹی میں تمام شعبہ ہائے زندگی کے افراد کو شامل کیا جائے گا۔ انہوںنے بتایا کہ ہلال احمر پاکستان کے پاس ہنگامی صورتحال میں فراہمی کے لئے 36ہزار خاندانوں کو فراہم کرنے کے لئے راشن موجود ہے جسے ملک میں مختلف مقامات پر سٹور کیا جانے کا منصوبہ ہے تاکہ کسی قدرتی آفت کی صورت میں فوری سپلائی کی جا سکے۔ا یم این اے چوہدری عابد رضا، ایم پی ایز حاجی عمران ظفر، میجر (ر) معین نواز، چوہدری شبیر احمد، صدر چیمبر آف کامرس میاں اعجاز احمد، ڈاکٹر اعجاز بشیر نے چیئرمین ہلال احمر کو تجویز دی کہ ضلع میں طلبہ و طالبات کی ہنگامی صورتحال سے نمنٹے کے لئے ٹریننگ کرائی جائے، رضا کاروں کی تعداد میں اضافہ، بلڈ بنک کے قیام، خون کے عطیات کی وصولی کے لئے اقدامات کئے جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات( جی پی آئی) ڈسٹرکٹ اینڈ سیشن جج سید خورشید انور رضوی نے ڈسٹرکٹ جیل کا دورہ کیا اور معمولی نوعیت کے جرائم میں ملوث 22ملزمان کو ذاتی مچلکوں پر رہا کرنے کا حکم دیا، مجسٹریٹ دفعہ تیس محمد مسعود اصغر، جیل سپرنٹنڈنٹ منصور اکبر اور دیگر افسران بھی انکے ہمراہ تھے۔ ڈسٹرکٹ ایند سیشن جج نے جیل ہسپتال ، لیڈیز بارک، نوعمر قیدیوں کی بارک، کچن کا بھی دورہ کیا اور قیدیوں سے انکے مسائل دریافت کئے ۔ انہوںنے جیل میں قیدیوں کی بہتری کے لئے اقدامات کو بھی سراہا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کھاریاں( جی پی آئی)ممتاز اوورسیز پاکستانی راہنما چوہدری تجمل حسین پیارا ہالینڈ سے نجی دورہ پر گذشتہ روز پاکستان پہنچ گئے اور نجی مصروفیات شروع کردیں اس دورے کے دورن وہ مختلف تقریبات میںشرکت کریں گے اور نجی معاملات بھی حل کریں گے یادرہے کہ چوہدری تجمل حسین پیارا کاشمار ہردلعزیز اووسیز پاکستانی شخصیات کی صف اول میںہوتا ہے جو کہ ملک اور بیرون ملک عوامی خدمت میںمعروف راہنما ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کھاریاں( جی پی آئی)دارالسلام ہائی سکول کھاریاںکے دسویں کلاس کے فارغ ہونیوالے طلباء کے اعزاز میںالوداعی پارٹی کا اہتمام خان محل شادی ہال جی ٹی روڈ کھاریاں میںکی گئی مہمان خصوصی نائب صدر الخدمت فائونڈیشن پنجاب سیدضیاء اللہ شاہ ایڈووکیٹ تھے طلباء نے رنگ برنگے ٹیبلو بھی پیش کیے جنہیں بے حد پسند کیا گیا میزبانی کے فرائض پرنسپل ڈاکٹر ذکاء اللہ صدیق نے سرانجام دیے صدارت ڈائریکٹر ادارہ چوہدری محمدغیاث نے کی اس موقع پر سید فیاض شبیر شاہ ڈائریکٹر اورئنٹیل ٹیکنکل انسیٹیوٹ کھاریاں،شہزاد غنی پرنسپل نساء کالج،سینئرصحافی سیدتنویرنقوی،سینئرصحافی زمان احسن،صحافی ایم عمر اورصحافی کاشان مجید نے خصوصی شرکت کی طلباء میں انعامات تقسیم کیے گئے جبکہ مہمانوں کا کتابو ں کی صورت تحائف بھی دیئے گئے مہمانوں کا شکریہ پرنسل صحافی ڈاکٹر ذکاء اللہ صدیق نے کیا مہمان خصوصی سید ضیاء اللہ شاہ ایڈووکیٹ نے شرکاء سے خطاب کرتے ہوئے کہا کہ تعلیم انسان کو شعور دیتی ہے کہ وہ برے بھلے میں تمیز کر سکے اور اپنے ساتھ ساتھ ملک وقوم کی بہتری اور تعمیروترقی کیلئے خدمات سرانجام دے سکے تعلیم کے سبب ہی قوموں نے ترقی کی ہے اور ہماری ترقی بھی تعلیم بلکہ جدید ترین تعلیم ہے انہوں نے کہا کہ طلباء سے کہا کہ سچ اور ایماندار ی کو اپنا شعار بنائیں اور کامیابیاں حاصل کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کھاریاں( جی پی آئی)یونین کونسل گلیانہ کی تعمیر وترقی کے لئے تمام وسائل بروئے کا لائیں گے اور تعمیر وترقی کے ساتھ ساتھ عوام کا معیار زندگی بھی بہتر بنائیں گے قائدین کوٹلہ برادران ایم این اے چوہدری عابدرضاکوٹلہ اور ایم پی اے چوہدری شبیر احمدکوٹلہ کی قیادت میں اپنی صلاحیتوں کو بروئے کار لاتے ہوئے تاریخ ساز خدمات سرانجام دیں گے ان خیالات کا اظہار چیئرمین یوسی گلیانہ ڈاکٹر محمدعباس چوہدری نے کیا انہوں نے کہا کہ نصیرہ تا جلالپورجٹاں کار پٹ سٹرک براستہ گلیانہ،گلیانہ تا کوٹلہ،گلیانہ تا چوک پاکستا ن گوٹریالہ اور گلیانہ تالالہ موسیٰ+جی ٹی روڈ کھاریاں کی سٹرکوں کی تعمیر وترقی بھی کوٹلہ برادران کی خدمت کا منہ بولتا ثبوت ہے یوسی گلیانہ کے ہرگائوں کے لئے فنڈز آئیں گے کچھ دیہاتوں میںکام جاری ہے انشاء اللہ آئندہ وقت میں حلقہNA107کی کام یونین کونسلیں مثالی ہونگے ہم یوسی گلیانہ کو قائدین کی قیادت اور خصوصی شفقت سے نمایاں اور منفرد بنائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کھاریاں( جی پی آئی)کوئی غلط فہمی میںہر گزنہ رہے کھاریاںشہر کی وارڈ نمبر3میںPTIکا ہی امیدوار کامیاب ہوگا عوام چوہدری ناصر احمدچھپر کی خدمت کے پیش نظر انہی کے نامزد امیدوار کو کامیاب بنائیں گے ان خیالات کا اظہار راہنماPTIسابق نائب صدر کھاریاں چوہدری فرحان احمد نے کیا۔انہوں نے کہا کہ وارڈ 3کے عوام نے امیدوار کی نامزدگی کا اختیار چوہدری ناصر چھپر کو دیدیا ہے مگر فیصلہ مشاورت کے بعد ہی کیا جائے گاوارڈ نمبر3پی ٹی آئی کا مضبوط ترین قلعہ ہے جسکو کوئی بھی فتح نہیںکرسکتا انشاء اللہPTIپہلے سے بڑھ کر لیڈ سے کامیابی حاصل کریگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کھاریاں( جی پی آئی)سینئرصحافی میاں محمدصفدر( انچارج اوورسیز گلوبل ٹی وی )نے کہا ہے کہ الیکٹرانک میڈیا ایسوسی ایشن کھاریاںکے پلیٹ فارم پر عوام کے اجتماعی مسائل کو اجاگر کیا جائے گا کافی عرصے سے کھاریاں میں مختلف ٹی وی چینلز کے نمائندے اپنی خدمات عملی طور پر سرانجام دے رہے ہیں مگر کوئی بھی تنظیم نہ ہونے سے صحافی متحد ہوکر کام کرنے سے قاصر تھے ان حالات کو مدنظر رکھتے ہوئے الیکٹرانک میڈیاایسوسی ایشن کاقیام عمل لایا جارہا ہے ہم اس سلسلہ میںسید تنویرنقوی “دن نیوز”کے شانہ بشانہ ہیں اور ایسوسی ایشن کی کامیابی کے لئے اپنا بھر پورکردارادا کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کھاریاں( جی پی آئی)الیکٹرانک ایسوسی ایشن کھاریاںکا قیام خوش آئند ہے ہم اس تنظیم کی مکمل حمایت کا اعلان کرتے ہیں ان خیالات کا اظہارسینئرصحافی چوہدری یوسف سونو نے کیا انہوں نے کہا کہ کھاریاںمیں الیکٹرانک میڈیا کے صحافی اپنا بھرپورکردارادا کررہے ہیںاب ایسوسی ایشن کے پلیٹ فارم پر متحد ہوکر اپنے کیمروں کے ذریعے عوامی مسائل اجاگر کریں گے ہم الیکٹرانک میڈیا ایسوسی ایشن کے ساتھ مکمل تعاون بھی کریںگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیرآباد(جی پی آئی)بھٹہ خشت ایسوسی ایشن کے مطالبے نہ ماننے پر26فروری سے 4مارچ2016تک اینٹوںکی سیل بندکردی گئی ہے اور5پانچ مارچ سے 18مارچ 2016تک لیبرہڑتال کرے گی۔ان خیالات کا اظہارصدر بھٹہ خشت ایسوسی ایشن حاجی سرفرازاحمدچیمہ،جنرل سیکرٹری محمدجاوید بھٹہ،حاجی عبد الرزاق چیمہ،محمداقبا ل وڑائچ نے مرکزی صدرشعیب اللہ خان نیازی سے ملاقات کے موقع پر کیا۔انہوںنے کہا کہ ہم حکومتی پالیسیوںکے مطابق بھٹی خشت کے لیبرکے بچوںکوتعلیمی سہولیات کے ساتھ سکول بھیجنے کی اسکیم پرعمل کررہے ہیںان کوکتابیں،یونیفارم اوردیگرسہولتیںفراہم کررہے ہیں۔اس کے باوجودبلا جوازبھٹہ خشت مالکان کوتنگ کیا جارہا ہے ۔شعیب اللہ خان نیازی نے کہا کہ پنجاب بھرکے بھٹہ خشت مالکان اورلیبر پنجاب اسمبلی کے سامنے 18مارچ کو احتجاجی مظاہرہ کرینگے۔اگرپھر بھی مطالبات تسلیم نہ ہوئے توبھٹہ خشت بند کردیئے جائینگے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور(جی پی آئی)نامور صحافی اور ممتاز دانشور احمد بشیر کے بارے میںان کی بیگم محمودہ احمد بشیر کی یادداشتوں پر مشتمل پہلی کتاب ”دو تحریریں” شائع ہوگئی ہے۔ کتاب کو سنگ میل پبلیکیشنز نے شائع کیا ہے اور اس میں احمد بشیر کی پاکستان کے مشاہیر کے ساتھ نادر تصاویر شامل ہیں۔ اس کتاب میں احمد بشیر کا تقسیم ہند پر لکھا ہوا شہرۂ آفاق مضمون ”خون کی لکیر” بھی شامل ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
برمنگھم(جی پی آئی)ملت اسلامیہ کے لئے اسوۂ رسول ۖ ہی مشعل راہ ہے ۔ ملک و قوم سیرت النبی ۖ سے ہر سطح اور ہر شعبہ میں راہنمائی حاصل کر سکتے ہیں ۔رسول اعظم ۖ کی سیرتِ طیبہ میں ہی کامیابی اور سنتِ رسول ۖ پر عمل پیرا ہو کر ہی ہم دنیا کو مسخر کر سکتے ہیں ۔نبی کریم ۖ نے ہر رشتے ، طبقے اور فرد کے حقوق و فرائض متعین کئیے ۔ عورتوں کو عزت عطا فرمائی، غلام و آقا کا تصور ختم کیا ۔خود انحصاری اور اعتماد کی فضا قائم کر کے عرب کے بدو افراد کو قوموںکی امامت کے قابل بنایا ۔آج پھر اُسی اسلامی تشخص کو اجاگر کر کے پوری قوم کو سنتِ نبوی ۖ کا پیکر بنا کر ترقی کی منازل کی طرف گامزن ہونے کی ضرورت ہے ۔باہمی انتشار ، عرب و عجم کا تصور اور قوم و قبیلوں کا تفاخر ہماری پستی کی علامت ہے ۔ ان خیالات کا اظہار قائد تحریک اویسیہ پاکستان علامہ پیر محمد تبسم بشیر اویسی جامع مسجد مہر الملت برمنگھم میں جمعة المبارک کے اجتماع سے خطاب کرتے ہوئے کیا ۔ انہوں نے کہا کہ ملتِ اسلامیہ کا ایک خدا ،ایک رسول ،ایک قرآن اور ایک دستور حیات ہے ۔آج قوم کو بھی ایک پلیٹ فارم پر متحد ہونے کی ضرورت ہے ۔رسول اعظم ۖ نے افراد ملت کی تربیت کر کے عظیم قوم بنایا ۔ اسوۂ رسول ۖ کسی طبقہ ،قوم یا قبیلہ کے لئے نہیں بلکہ کائنات ارضی کے لئے نمونہ ہے ۔اسی پاکیزہ سیرت سے راہنمائی حاصل کر کے عرب کے بدودنیا کے رہبر بن گئے ۔ جھگڑنے والے محبتوں کے سفیر اور دولت پہ مغرور ،در رسول ۖ کے فقیر بن گئے ۔حضور اکرم ۖ نے فرد سے لے کر قوم و ملت کی تربیت و اصلاح کا جامع پلان عطا فرمایا ۔موجودہ دور میں اصلاح معاشرہ کی اشد ضرورت ہے ۔معاشرے میں بگاڑ سے ہی دہشت گردی، لاقانونیت، فرقہ بندی اور چور بازاری جنم لیتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور (جی پی آئی)جمعیت علما پاکستان (نیازی )کے سربراہ قائد اہل سنت پیر محمد معصوم حسین نقوی نے کہاہے کہ جمہوریت کے لئے متحدہ اپوزیشن کا اتحاد اور میڈیا کا آزادہونا بہت ضروری ہے۔ ورنہ عوامی حقوق کا تحفظ ممکن نہیں۔ حکومت دو تہائی کے نشے میں جمہوری اور اخلاقی اقدار بھول گئی ہے۔ کم سے کم ایجنڈے پر اپوزیشن کو متحدکرنے کی ضرورت ہے۔جے یو پی سیکرٹریٹ میں مختلف سیاسی جماعتوںکے وفود سے گفتگو کرتے ہوئے پیر معصوم نقوی نے کہا کہ پاکستان جمہوری انداز سے نفاذاسلام کے لئے بنا، لیکن قائد اعظم محمد علی جناح رحمتہ اللہ علیہ کی رحلت کے بعد کبھی بنیادی جمہوریت اور صدارتی نظام کے ایسے تجربات کئے گئے اور مارشل لاوں نے آئین کو نقصان پہنچایا،پھر انتخابات میں دھاندلی نے سیاست اور سیاسی جماعتوں پر عوام کے اعتماد کو ٹھیس پہنچائی۔ سیاست میں پیسے کے استعمال نے بھی سیاست کو گندا کیا۔ انہوںنے کہا کہ دولت مند اور کرپٹ عناصر پارلیمنٹ میںپہنچ جاتے ہیں۔شریف النفس کو کوئی ووٹ دیتا ہے اور نہ ہی جاگیرداروں اور رسہ گیروں کے مقابلے میں پارٹی ٹکٹ اسے ملتا ہے۔ اس سے اندازہ کیا جاسکتا ہے کہ ہمار ا نظام کسے تحفظ فراہم کر رہا ہے۔پارلیمنٹ بھی آزادانہ کام نہیں کررہی ہے۔ قانون سازی کا ہدف صنعتکاروں اور سرمایہ کاروں کا تحفظ ہے۔ جاگیر دار اور وڈیرے صرف اپنے لئے قانون بناتے ہیں۔ عوامی مسائل کا حل کہیں نظر نہیں آرہا۔ انہیں عوام اور ملک کے بجائے اپنا مفاد عزیز ہوتا ہے۔ یہی وجہ ہے کہ پاکستان ترقی نہیں کرسکا جبکہ انڈیا ہمارے ساتھ ہی آزاد ہوا وہاں نظام مضبوط ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور (جی پی آئی) شیعہ علما کونسل پنجاب کے صدر علامہ سید سبطین حیدر سبزواری نے چوتھے تاجدار امامت حضرت امام زین العابدین علیہ السلام کے یوم ولادت پر عالم اسلام کو مبارکباد پیش کرتے ہوئے کہا ہے کہ امام کی زندگی متقیوں ، عبادت گذاروں اور اللہ تعالیٰ سے دعا کے ذریعے مانگنے والوںکے لئے نمونہ عمل ہے۔ ہم ان کی اتباع کرکے خداوند قدوس کے سامنے سرخرو ہوسکتے اور قرب باری تعالیٰ حاصل کرسکتے ہیں۔جنت البقیع مدینہ میں مدفن حضرت امام علی ابن الحسین علیہ السلام کے جشن ولادت کی تقریب سے خطاب میں علامہ سبطین سبزواری نے کہا کہ پیغمبر اکرم صلی اللہ علیہپ وآلہٰ وسلم کے چوتھے جانشین حضرت امام سجاد علیہ السلام کربلا کی سختیوں سے گذر کر اللہ تعالیٰ کی بارگاہ میں سجدہ بجالانے والوں کے سردار، سید الساجدین اور عبادت گذاروں کے لئے زینت ،زین العابدین بنے۔ ان کی دعاوں کا مجموعہ صحیفہ سجادیہ جسے عام طور پر صحیفہ کاملہ بھی کہا جاتا ہے، زبو ر آل محمد کہلاتی ہے۔اس حوالے سے اکثر بزرگ علما کا فرماتے ہیں کہ حضرت امام علی علیہ السلام کے فرامین پر مشتمل کتاب نہج البلاغہ پڑھوتو خدا کی سمجھ آتی ہے جبکہ صحیفہ سجادیہ پڑھو تو اللہ تبارک وتعالیٰ سے مانگنے کا طریقہ آتا ہے کہ کس طریقے سے بندہ اپنے خالق سے دن کی تنہائیوں اور رات کی تاریکیوں میں نماز تہجد کے بعد دعائیں مانگے اور وہ ذات باری تعالیٰ قبول فرمائے۔ انہوں نے کہا کہ امام زین العابدین نے 57 سال عمر پائی جن میں سے34سال تک منصب امامت پر فائز رہے۔وہ اتنے عبادت گزار تھے کہ ان کے فرزند پانچویں حضرت امام محمد باقرعلیہ السلام سے روایت ہے کہ ان کے باغ میں کھجور کے پانچ سو درخت تھے اور حضرت امام زین العابدین ہر درخت کے نیچے روزانہ دور رکعت نماز ادا کیا کرتے تھے۔ ان کی زوجہ محترمہ جو پہلے ان کی کنیز تھیں مگر انہیں آزاد کرنے کے بعد ان سے شادی کی، وہ امام کی عبادت گذاری اور تقویٰ سے متعلق فرماتی ہیں کہ سید الساجدین کے لئے انہوں نے اپنی 30سالہ رفاقت میں کبھی ناشتہ بنایا اور نہ بستر بچھایا کیونکہ وہ دن کے وقت روزے سے ہوتے اور رات مصلح عبادت پر کھڑے گذار دیتے ۔علامہ سبطین سبزواری نے کہا کہ امام سجاد اللہ تعالیٰ سے گڑ گڑا کر دعائیں مانگتے ہوئے فرماتے اے اللہ! میں ہر مصیبت برداشت کرلوں گا لیکن یہ میرے لئے قابل برداشت نہیں کہ تیرے دین مبین اسلام کی پیروی اور تیری عبادت میں رکاوٹ پید اہو۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور(جی پی آئی)پنجاب اسمبلی سے خواتین کے حقوق پر پاس کروایا جانے والا بل خاندانی نظام کو مکمل تباہ کر کے رکھ دے گا۔خواتین پر تشدد اور غیرت کے نام پر قتل کی اسلام نے شدید مذمت کی ہے لیکن خواتین کے حقوق کے نام پر ایسے قوانین مسلط کرنا جس سے انسانیت کی تذلیل ہو کسی بھی صورت درست نہیں ہے ۔ یہ بات پاکستان علماء کونسل کے چیئرمین اور وفاق المساجد پاکستان (رجسٹرڈ) کے صدر حافظ محمد طاہر محمود اشرفی نے اپنے ایک بیان میں کہی ۔ انہوں نے کہا کہ اسلام نے عورت اور مرد کو جو حقوق دئیے ہیں وہ کوئی اور مذہب اور قانون نہیں دے سکتا ۔ پنجاب اسمبلی سے پاس کیے جانے والے قانون میں مرد کو تضحیک اور مذاق بنا دیا گیا ہے ۔ انہوں نے کہا کہ خاندانی معاملات باہمی گفت و شنید اور محبت اور پیار سے چلتے ہیں ۔ جبر کی بنیاد پر چلایا جانے والا نظام خاندانی اور معاشرتی اقدار کو تباہ کر کے رکھ دے گا ۔ انہوں نے کہا کہ پاکستانی معاشرے میں عورت پر تشدد کے واقعات انتہائی کم ہیں لیکن کوئی بھی صاحب عقل عورت پر تشدد کی اجازت نہیں دے سکتا۔پنجاب اسمبلی سے پاس کیے جانے والے قانون سے خاندانوں کے اندر چپقلش اور تصادم بڑھے گا اور صلح کے راستے بند ہوں گے ۔ا نہوں نے کہا کہ وہ وزیر اعظم پاکستان میاں محمد نواز شریف اور وزیر اعلیٰ پنجاب میاں شہباز شریف سے کہنا چاہتے ہیں کہ وہ پاکستان مسلم لیگ (ن) کے اراکین سے باز پرس کریں اور اس قانون کو اعتدال کے دائرہ میں لایا جائے ۔ خواتین کے حقوق کے نام پر لایا جانے والا قانون ایک انتہاء ہے جس سے معاشرہ عدم توازن کا شکار ہوگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور (جی پی آئی)پنجابی زبان اور کلچر کو فروغ دینے کیلئے لاہور میں پنجابی گھر کے نام سے ایک مرکز کا قیام عمل میں لایا گیا جس کا افتتاح سابق نائب وزیراعظم چودھری پرویزالٰہی کے میڈیا کوآرڈی نیٹر محمد اقبال چودھری نے کیا۔ پنجابی گھر کی افتتاحی تقریب سے خطاب کرتے ہوئے انہوں نے کہا کہ پنجابی زبان اور کلچر کو فروغ دینے کیلئے ہماری ذمہ داری ہے کہ ہم اس شعبہ سے منسلک شخصیات کے ساتھ ہر طرح کا تعاون کریں، ادیبوں، شاعروں، قلم کاروں کی حوصلہ افزائی کرنی چاہئے، حکومت اور سوسائٹی کی ذمہ داری ہے کہ پنجابی زبان اور کلچر کے فروغ کیلئے کام کریں، ہمارے نوجوانوں کو روزگار فراہم کیا جائے، معاشرے کی صحت کیلئے ضروری ہے کہ بنیادی کھیلوں کو فروغ دیا جائے تاکہ معاشرے میں صحت مندانہ سرگرمیاں فروغ پائیں، اس سارے کام میں خواتین کو بھی شانہ بشانہ کام کرنا ہو گا۔ اس موقع پر صوفی محمد انور، بابا نجمی، بخت گیر چودھری اور مقصود لغاری نے بھی خطاب کیا جبکہ تقریب میں مرزا ظفر بیگ، نقاش شبیری، سبطین علی، امتیاز احمد، ندیم بیگ سمیت ادب و ثاقفت سے تعلق رکھنے والی دیگر شخصیات بھی موجود تھیں۔#
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عمرکوٹ(جی پی آئی)پی ٹی آئی کی رکنیت سازی عمرکوٹ ،کھپرو،سانگھڑاور جھول کی عوام نے چیئرمین عمران خان کے حق میں فیصلہ سنادیا ،عمر کوٹ شہر میں کاروان انصاف کے استقبال کے لیے موٹر سائیکلوں ،چنگ چی رکشہ گاڑیوں پر مشتمل شاندار ریلی میں مقامی لوگوں کی بھرپور انداز میں شرکت ،ریلی جب عمر کوٹ میں موجود اللہ والا چوک پہنچی تو وہ جلسے میں تبدیل ہوگئی ۔ جبکہ کھپرو کا مین چوک ،سانگھڑ میں میرپورخاص چوک میںقائم پی ٹی آئی کے کیمپوں پر عوام کا بے پناہ رش دیکھنے میں آیا ،بھوک ،پیاس اور غربت کے ستائے ہوئے لوگوں نے عمران خان زندہ باد کے نعرے لگاتے ہوئے پی ٹی آئی کی ممبر سازی مہم میں بڑھ چڑھ کر حصہ لیا۔ان تمام اضلاع میںشاندار انداز میں عوام کو گھروں سے لانے اور قائدعمران خان کا پیغام پہنچانے والے پی ٹی آئی کے ساتھی پیر تاج حسین شاہ جیلانی ،مشتاق جونیجو،حاجی اصغر پلہی،لکھراج مالی،محمد خالد،ابراہیم کیریو اورڈاکٹر شگفتہ سمیت دیگر پی ٹی آئی کے سرگرم رہنمائوں کا شکریہ ادا کرتے ہوئے حلیم عادل شیخ نے عوام اور میڈیا سے خطاب میں کہا کہ سندھ کی عوام اب ان لوگوں سے تنگ آچکی ہے جن لوگوں نے ان کے منہ سے آخری نوالہ تک چھیننے کی ٹھان رکھی ہے ۔حلیم عادل شیخ نے کہا کہ ہم نے اپنے قائد عمران خان کا پیغام سندھ کے کونے کونے میں بھجوانے کا عزم کیا ہے جس کے لیے ہم سندھ کی عوام کے بے حد شکرگزار ہیں کہ ہم جہاں بھی جاتے ہیں لوگ عمران خان زندہ باد کے نعرے لگاتے ہوئے اپنے گھروں سے نکل آتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوات(جی پی آئی)جمیعت طلباء اسلام کے سابق مرکزی صدر حافظ محمد ادریس نے کہاہے کہ جمیعت علماء اسلام نظریاتی کا جے یوائی ف میں ضم ہونا خوش ائند ہے ،ملک میںجتنی بھی پارٹیاں مذہب کے اساس پر سیاست کرتے ہیں ان سب کیلئے ہمارے دروازے کھلے ہیں ملک میں مذہبی اساس کی حفاظت جمیعت علماء اسلام کی پلیٹ فارم سے ہوئی ،قادیانی کو اسلام سے خارج قرار دینے میں ہمارے علماء کرام کے کوششیں اور کاوشیں سب کے سامنے ہیں ان خیالات کا اظہار انہوںنے گزشتہ روز اخباری نمائندوں سے بات چیت کرتے ہوئے کیا اس موقع پر جے ٹی ائی ضلع سوات کے سابق صدر حافظ بختی روان لودہی بھی انکے ہمراہ تھے ،اخباری نمائندوں سے بات چیت کرتے ہوئے انہوںنے کہاکہ جمیعت علماء اسلام کا مقصد اللہ کی زمین پر اللہ کے نظام کا نفاذ ہے اور اس سلسلے میں پاکستان کی دیگر تمام مذہبی جماعتوں کو ہم دعوت دیتے ہیں کہ وہ ملک میں اسلامی نظام کے نفاذ کیلئے جے یوائی کا ساتھ دیں انہوںنے کہاکہ جمیعت علمائے اسلام نے ہمیشہ دین کی سربلندی کیلئے جدوجہد کی ہے اور اب وقت کا تقاضہ ہے کہ تمام مذہبی جماعتیں جے یوائی کے جھنڈے تلے جمع ہوجائے تاکہ ملک کی نظریاتی اساس کا تحفظ یقینی بنایا جاسکے انہوںنے کہاکہ ہم جمیعت علماء اسلام نظریاتی بلوچستان کے سربراہ مولانا عصمت اللہ کے جانب سے جمیعت علماء اسلام میں ضم ہونے کے فیصلے کا خیرمقدم کرتے ہیں اور انہیں مبارکباد پیش کرتے ہیں۔
غم دل بہ دوست گفتن چہ خوش ست شہریارا
گجرات کی خبروں کی تصویری جھلکیاں