ہنگری کی خاتون صحافی کو تارکین وطن سے بدتمیزی مہنگی پڑ گئی

Seriya

Seriya

بڈاپسٹ (جیوڈیسک) ہنگری میں ایک خاتون صحافی کو پناہ گزینوں کے ساتھ بدتمیزی کرنے پر ملازمت سے فارغ کردیا گیا جب کہ سوشل میڈیا سمیت دنیا بھر کے ذرائع ابلاغ میں خاتون کے طرز عمل کو سخت تنقید کا نشانہ بنایا جارہا ہے۔

ہنگری کے مقامی نیوز چینل کی ایک صحافی پیٹرا لاسزلو سربیا کی سرحد پر واقع پناہ گزینوں کے کیمپ میں دیگر صحافیوں کے ساتھ موجود تھی کہ اس دوران پناہ گزین بارڈر پولیس کا حصار توڑ کر ہنگری میں داخل ہونے لگے جب کہ پولیس انہیں روکنے کی کوشش کررہی تھی اس دوران پیٹرا نے اپنی پیشہ وارانہ ذمہ داریاں نبھانے کے بجائے پناہ گزینوں سے انتہائی تضحیک آمیز سلوک کیا۔

انٹرنیٹ پر چلنے والی ویڈیو میں دیکھا جاسکتا ہے کہ پیٹرا نے ایک پناہ گزین جو اپنے بچے کو اٹھا کر بھاگ رہا تھا اسے جان بوجھ کر ٹانگ اڑا کر گرادیا اور اسے پولیس نے پکڑلیا جب کہ ایک اور جگہ اس نے ایک چھوٹی بچی کو بھاگتے ہوئے زور دار لات ماری جس کی وجہ سے بری طرح لڑکھڑا گئی۔