در مدح جناب پیر سید محمد فاروق شاہ صاحب

بحر ادب وِچہ پاک وجود کرکے قلم لکھداشان کمال مرشد
بول بسم اللہ، سبحان اللہ پڑہاں مدح حضور اقبال مرشد
سید محمد فاروق محبوب رب دا، میرا نور علیٰ نور جمال مرشد
سوہنے نبی دی آل کمال مرشد، لجپال مرشد،بے مثال مرشد
ماہر شرع، سردار طریقتاں دا تے حقیقتاں دا نوری لعل مرشد
شہباز بلند پرواز کامل، محرم راز ممتاز جلال مرشد
خضر بھلیاں نوں راہے پان آیا، زنجیر وحدت دال دال مرشد
کیتی بار بیکار بہار گلشن لجپال اے بوٹیاں پال مرشد
لاٹاں ماردا تاج معارفاں دا راج بخت بھریا لازوال مرشد
کردا دُور اندھیرڑا غفلتاں دا شمع فقر دی ٹھلیوں بال مرشد
متھے چمکدا نور سرداریاں دا کیتے جس کئی ولی ابدال مرشد
سیدپاک ہارون دا لعل مرشد، محرم راز سعید خصال مرشد
خواجہ خضر جیہے مرد کمال کولوں پایا فیض دا گنج اقبال مرشد
کلمہ دس رسول مقبولۖ والا دیوے غیر غرور نکال مرشد
ساقی کھولیا فیض دا مے خانہ بھربھر بخشدا جام زُلال مرشد
جاہل علم دے بحر کمال ہوئے کیتے شاہ غلام تہال مرشد
مطلوب محبوب مرغوب باری محبوب وارث بیت المال مرشد
دائم اونہاں نوں کی پرواہ دائم، ہر حال جنہاندڑے نال مرشد

Pir Muhammad Farooq Shah Sarkar

Pir Muhammad Farooq Shah Sarkar

طالب دعا: حسن اختر احسن فرزند ِدائم وجنرل سیکریٹری دائم اقبال دائم اکیڈمی واسو ضلع منڈی بہاء الدین