پی ٹی وی کی ڈرامہ سیریل “تخت ہزارہ” کی افتتاحی تقریب

Posted on November 29, 2016 By Majid Khan سٹی نیوز, لاہور

لاہور (شوبز/کلچرل رپورٹر) پاکستان ٹیلیویژن لاہور سینٹر میں ڈرامہ سیریل “تخت ہزارہ ” کے افتتاح کے موقع پر ایک رنگا رنگ تقریب کا انعقا دکیا گیا۔ تخت ہزارہ کی مناسبت سے اس ڈرامے کی افتتاحی تقریب میں مہمانِ خصوصی کے طور پر وفاقی پارلیمانی سیکریٹری نشر و اشاعت، قومی ورثہ محسن شاہنواز رانجھا کو مدعو کیا گیا ۔محسن شاہنواز رانجھا جن کا تعلق تخت ہزارہ کی سر زمین سے ہی ہے، انہوں نے ڈرامہ سریل “تخت ہزارہ ” کے افتتاح کیلئے فیتہ کاٹ کر تقریب کا آغازکیا۔اس موقع پر خطاب کرتے ہوئے انہوں نے کہاکہ اس ڈرامے کے نام سے ہی پیار محبت کی لوک داستانوں،صوفی شعرأ اورتاریخی حقائق کا احساس ہوتا ہے۔انہوں نے امید ظاہر کی کہ اس ڈرامے میں گمنام ہیروزکو بھی رکھا جائے گا ۔تقریب میں رائیٹر آصف حنیف مہر،شوبز سے تعلق رکھنے والے افراد اور دیگر حاضرین کی موجودگی میں محسن شاہنواز رانجھانے ڈرامہ” تخت ہزارہ”کا سکرپٹ پروڈیوسرسجاد بخاری اور کو پروڈیوسر مبین ارشدکے حوالے کیا۔ پی ٹی وی کے پروگرام ڈائریکٹرآغا ذوالفقار خان نے اپنے خطاب میں کہا کہ انہیں فخر ہے کہ انہوں نے چیئرمین پی ٹی وی عطاالحق قاسمی کے سٹوڈیوز میں رونقیں بحال کرنے کے خواب کو عملی جامہ پہنایااور آج پی ٹی وی کے تمام مراکزمیں ڈراموں اور مختلف پروگرامز کی ریکارڈنگز کا کام جاری ہے اور پی ٹی وی کے پروڈیوسرز اور تکنیکی عملے کو اپنی صلاحتیں منوانے کاایک نادر موقع ملا ہے ۔ لاہور سینٹر کے جنرل منیجر بشارت خان نے کہا کہ پرائیویٹ پروڈکشن کی وجہ سے پی ٹی وی کے پروگرامز میں تنزلی آئی مگرپی ٹی وی کی پروڈکشن شروع ہونے پر اب وہ وقت دور نہیں جب،چیئرمین عطاالحق قاسمی اورایم ڈی پی ٹی وی صبا محسن کی رہنمائی میں ہم اپنا کھویاہوا مقام واپس پا لیں گے اور اس کامیابی کیلئے لاہور سینٹر ماضی کی طرح ہراول دستے کا کردار ادا کرے گا ۔لاہور سینٹر کے پروگرام منیجر چوہدری افتخار ورک نے کہا پی ٹی وی اب ترقی کی منازل کی طرف گامزن ہے اور اس قومی ادارے کو بامِ عروج پر لے جانے کیلئے ملازمین اپنی تمام تر توانیاں بروئے کار لا رہے ہیں ۔اورنگ زیب لغاری نے کہا پی ٹی وی کے ڈرامے کو بامِ عروج پر لے جانے وا لے وہ رائیٹرز اور فنکارجو کام کر سکتے ہیں ان کی خدمات حاصل کرنی چاہئیں ۔ شفقت چیمہ جو اس ڈرامہ میں اہم کردار ادا کر رہے ہیں نے کہا میں نے اس ڈرامے کا سکرپٹ دیکھا ہے اور میں اس کے ہٹ ہونے کی ضمانت دیتا ہوں ۔عینی طاہرہ اورصائمہ اختر کے گانوں نے تقریب میں ایسا سماں باندھا کہ حاضرین جھوم اُٹھے۔میزبانی کے فرائض شاہجہان اور فاریہ نے ادا کئے ۔پی ٹی وی سینٹرل ایمپلائز یونین کے مرکزی صدر جہانگیر خان ،ایگزیکٹو ایڈمن اینڈ پرسنائل منیجر امجد حسین اور شوبز سے تعلق رکھنے والے جاوید اقبال،بینش،شاہد محمود، عروج، ایمان، مزمل، حنین، صائمہ سلیم ،عذراجہاں،انعام خان،عائشہ جٹ اور دیگر فنکاروں نے بھی تقریب میں شرکت کی ۔ڈرامہ سریل “تخت ہزارہ”میں کام کرنے والے فنکاروں میں غلام محی الدین ،اسد ملک،انعام بخاری ،رز کمالی،کامران مجاہد،عمران بخاری ،شاہد نذیر،بینش،صائمہ سلیم ، قیصر بلوچ اور دیگر معروف فنکار شامل ہیں۔