قریہ، قریہ ہے راج وحشت کا

Posted on June 3, 2016 By Mohammad Waseem آپکی شاعری, شاعری

قریہ، قریہ ہے راج وحشت کا
ہم نے پایا سماج وحشت کا

ہم ہیں سلطان شہرِ ہجرت کے
سَر پہ رکھتے ہیں تاج وحشت کا

بو کے بارود اپنی دھرتی میں
کھا رہے ہیں اناج وحشت کا

اے دِلِ زار ہو نہ پائے گا
عمر ساری علاج وحشت کا

کون سمجھے گا جز تیرے ساقی
اِس جہاں میں مزاج وحشت کا

ہم غریب الدیار لوگوں سے
نام زِندہ ہے آج وحشت کا

میکدے کی فضائوں میں ساحل
دے رہے ہیں خراج وحشت کا

تحریر : ساحل منیر