غزل

وحشتِ دل کے سنبھلنے کی دوا کون کرے
ہم کو اس درد و اذیت سے رہا کون کرے

کس کو معلوم کہاں زیست بسر کرتے ہیں
ہم فقیروں کا سرِ شام پتا کون کرے

لوگ اک بار تو ہاتھوں کو اٹھا ہی لیتے
ہم تو جیتے ہیں نہ مرتے ہیں دعا کون کرے

کوئی زنجیرِ عدل ہو تو ہِلا دیں ہم بھی
جبر کے شہر میں حاکم سے گِلہ کون کرے

کوئی سنتا ہو تو احوال سنائیں دِل کا
شہرِ نا پُرساں میں بے سمت صدا کون کرے

عمر بھر درد کی سُولی پہ لٹک کر ساحل
جُز تیرے قرضِ محبت بھی ادا کون کرے

GHAZAL

GHAZAL

ساحل منیر