تیسرا ون ڈے: آسٹریلیا نے سری لنکا کو 2 وکٹ سے شکست دیدی

 Australia vs Sri Lanka

Australia vs Sri Lanka

دمبولا (جیوڈیسک) سری لنکا کے دورے پر آئی آسٹریلوی ٹیم نے تیسرے ون ڈے میچ میں میزبان ٹیم کو شکست دے کر پانچ میچوں کی سیریز میں دو، ایک سے برتری حاصل کر لی ہے۔ سری لنکا نے پہلے کھیلتے ہوئے مقررہ پچاس اوورز میں 226 رنز بنائے تھے۔

سری لنکن اننگز کی خاص بات دنیش چندی مل کی سینچری تھی جنہوں نے سات چوکوں کی مدد سے 102 رنز کی اننگز کھیلی۔ دوسرے نمایاں بلے باز تلکرتنے دلشان تھے جنہوں نے 42 رنز بنائے۔ ان کے علاوہ کوئی اور بلے باز خاطر خواہ کارکردگی نہ دکھا سکا۔ آسٹریلیا کی جانب سے زیمپا 3 جبکہ سٹارک، ہیسٹنگز اور فولکنر نے دو، دو وکٹیں حاصل کیں۔ ہیزل ووڈ کے حصہ میں صرف ایک وکٹ آ سکی۔

آسٹریلیا نے مطلوبہ ہدف 46ویں اوور میں 8 وکٹوں کے نقصان پر پورا کیا۔ آسٹریلیا کی جانب سے جارج بیلی 70 اور میتھیو ویڈ 42 رنز بنا کر نمایاں رہے۔ سری لنکا کی جانب سے میتھوز، اپونسو، اور پریرا نے دو، دو جبکہ ڈی سلوا نے ایک کھلاڑی کو آؤٹ کیا۔