اٹک میں 700 ارب روپے مالیت کے سونے کے ذخائر کا دعویٰ: کیا پاکستان میں سونے کے بڑے ذخائر موجود ہیں؟
پاکستان میں مختلف ادوار میں حکومتوں کی جانب سے قیمتی دھاتوں بشمول سونے کے بڑے ذخائر کی دریافت کے دعوے سامنے آتے رہے ہیں۔ 2015 میں اس وقت کے وزیراعظم نواز شریف نے چنیوٹ میں لوہے، تانبے اور سونے کے بڑے ذخائر کی دریافت کا اعلان کرتے ہوئے کہا تھا کہ ان خزانوں سے پاکستان میں خوشحالی کا انقلاب آئے گا۔ حال ہی میں پنجاب حکومت کے وزیر معدنیات شیر علی گورچانی نے دعویٰ کیا ہے کہ ضلع اٹک میں لگ بھگ 700 ارب روپے مالیت کے سونے کے ذخائر موجود ہیں۔
مقامی میڈیا کے مطابق صوبائی وزیر کا کہنا ہے کہ اٹک میں 32 کلومیٹر کے علاقے میں 28 لاکھ تولے سونے کے ذخائر پائے گئے ہیں، جن کی مالیت 600 سے 700 ارب روپے بنتی ہے۔ اس سے قبل گذشتہ ہفتے پنجاب کے سابق نگران وزیر معدنیات ابراہیم حسن مراد نے بھی دعویٰ کیا تھا کہ اٹک میں دریائے سندھ اور دریائے کابل کے سنگم پر سونے کے ذخائر موجود ہیں۔ ان کا کہنا تھا کہ جب وہ وزیر تھے تو ایسی اطلاعات سامنے آئی تھیں کہ اٹک کے نزدیک بعض افراد دریا میں مشینوں کی مدد سے کھدائی کر رہے ہیں۔ تحقیقات کے بعد یہ بات سامنے آئی کہ لوگ یہاں سونا تلاش کر رہے ہیں، جس کے بعد علاقے میں دفعہ 144 نافذ کرکے سونے کی تلاش پر پابندی عائد کر دی گئی۔
وزارتِ پٹرولیم کی معدنیات ونگ کی جانب سے سعودی عرب میں جاری فیوچر منرلز فورم پر پیش کی گئی رپورٹ کے مطابق پاکستان میں سونے کے ذخائر بلوچستان اور خیبر پختونخوا میں پائے جاتے ہیں، جن کی تعداد اندازے کے مطابق 1.6 ارب ٹن ہے۔ رپورٹ میں بتایا گیا ہے کہ پاکستان میں ہر سال ڈیڑھ سے دو ٹن کے قریب خام سونا نکالا جاتا ہے۔ بلوچستان میں ریکوڈک منصوبے کی تکمیل کے بعد پاکستان میں خام سونے کی پیداوار اگلے دس برسوں میں سالانہ آٹھ سے دس ٹن تک پہنچ سکتی ہے۔
جیولوجیکل سروے آف پاکستان (جی ایس پی) کی سالانہ رپورٹ کے مطابق ملک میں مختلف مقامات پر معدنیات اور قیمتی دھاتوں کی تلاش کا کام جاری ہے۔ رپورٹ میں بتایا گیا ہے کہ جی ایس پی نے پنجاب کے ضلع اٹک میں دریائے سندھ اور خیبر پختونخوا کے ضلع مانسہرہ میں دربند کے علاقے میں جیو کیمیکل تکنیک کے ذریعے پلیسر گولڈ اور دیگر دھاتوں کی موجودگی کا پتا لگانے کی کوشش کی ہے۔ اسی طرح کوئٹہ کے نزدیک سپیزنڈ میں خام لوہے کے ذخائر کی تلاش کے لیے جیو فزیکل اسٹڈیز کی گئیں۔
خیبر پختونخوا میں پلیسر گولڈ کے ممکنہ زونز کی نشاندہی کے لیے کام جاری ہے، جس کے لیے چترال، سوات اور بنیر میں چھ ہزار مربع کلومیٹر کے علاقے کی جیولوجیکل میپنگ کی جائے گی۔ جی ایس پی کے ایک افسر نے نام نہ ظاہر کرنے کی شرط پر بتایا کہ سندھ کی تحصیل نگر پارکر میں بھی سونے کے ذخائر دریافت ہوئے ہیں، جن کے متعلق رپورٹ مکمل کرکے حکومت کو بھجوا دی گئی ہے۔
پاکستان میں سونے کے ذخائر کی دریافت کے حوالے سے ماہرین کا کہنا ہے کہ سونا اصل میں اگنییس اور میٹا مورفک پتھروں میں پایا جاتا ہے، جو پاکستان کے شمالی علاقہ جات میں پائے جاتے ہیں۔ ڈاکٹر احتشام اسلام کے مطابق گلگت، ہنزہ اور غزر کے علاقوں میں سونے کے ذخائر پائے جانے کے کافی امکانات ہیں۔ ان کا کہنا ہے کہ تانبے کے ساتھ اکثر ایسوسی ایٹ دھات کے طور پر سونا بھی نکلتا ہے، لیکن اس کی مقدار بہت کم ہوتی ہے۔
دریاؤں سے ملنے والے سونے کے ذرات کے بارے میں پروفیسر عدنان خان کہتے ہیں کہ جب پہاڑی علاقوں سے دریا بہہ کر آتے ہیں تو وہ اپنے ساتھ سونے کے ذرات بھی لے آتے ہیں۔ جب یہ دریا میدانی علاقوں میں داخل ہوتے ہیں تو ان کے بہاؤ کا زور ٹوٹ جاتا ہے اور دھاتوں کے ذرات دریا کی تہہ میں بیٹھ جاتے ہیں، جہاں ان کے ذخائر بن جاتے ہیں۔ ایسے پائے جانے والے سونے کو پلیسر گولڈ کہتے ہیں۔
پاکستان میں سونے کی دریافت کے حوالے سے ماہرین کا کہنا ہے کہ زیادہ تر سونے کی دریافت حادثاتی طور پر ہوتی ہیں۔ اس کی ایک وجہ ریسرچ اور انڈسٹریز کے درمیان تعاون کا فقدان ہے، جس کی وجہ سے زیادہ چیزیں سامنے نہیں آتی ہیں۔
