کوئٹہ: سیکیورٹی فورسز نے آپریشن ردالفتنہ 3 کے تحت بلوچستان کے متعدد علاقوں میں انٹیلی جنس معلومات کی بنیاد پر کارروائیاں کرتے ہوئے 9 دہشت گردوں کو ہلاک کر دیا۔
سیکیورٹی ذرائع کے مطابق سب سے بڑا آپریشن ضلع زیارت اور ہرنائی کے درمیان پہاڑی علاقے میں کیا گیا۔ خفیہ اطلاع ملنے پر سیکیورٹی فورسز نے دہشت گردوں کے ٹھکانے کو گھیرے میں لے کر موثر کارروائی کی، جس کے نتیجے میں 8 شدت پسند مارے گئے۔ ذرائع کا کہنا ہے کہ آپریشن کے دوران دہشت گردوں کا ٹھکانہ بھی تباہ کر دیا گیا۔
ضلع سوراب میں ایک اور کارروائی
دوسری جانب ضلع سوراب کے علاقے حاجیکہ گاؤں میں ایک اور آپریشن کے دوران ایک دہشت گرد ہلاک کیا گیا۔ سیکیورٹی فورسز نے شدت پسندوں کی نقل و حرکت کا پتہ چلنے پر دشت کتائی اور حاجیکہ کے درمیان موثر گھیراؤ قائم کیا۔
ہلاک شدگان سے اسلحہ برآمد
سیکیورٹی ذرائع کے مطابق ہلاک ہونے والے دہشت گردوں سے گولہ بارود، میگزین، دستی بم، واکی ٹاکی، ایک موٹر سائیکل اور دیگر سامان برآمد کیا گیا ہے۔
سیکیورٹی فورسز نے اس عزم کا اعادہ کیا ہے کہ بلوچستان میں دہشت گردی کے مکمل خاتمے اور پائیدار امن کے قیام تک آپریشن بلا تعطل جاری رہیں گے۔
