بھارتی کرکٹ بورڈ کی جانب سے دیا گیا یہ اضافی بونس ٹورنامنٹ کے کل پرائز پول سے بھی زیادہ ہے
بھارتی کرکٹ کنٹرول بورڈ (بی سی سی آئی) نے ٹی 20 ورلڈ کپ 2026 جیتنے والی قومی ٹیم کو 14.24 ملین ڈالر (تقریباً 1.31 ارب بھارتی روپے) کے اضافی نقد انعام سے نوازا ہے۔ یہ رقم ٹیم کو ٹورنامنٹ جیتنے پر ملنے والے 2.34 ملین ڈالر کے پرائز منی سے چھ گنا زیادہ ہے۔
اتوار کو احمد آباد میں نیوزی لینڈ کے خلاف 96 رنز کی واضح فتح کے ساتھ بھارت نے مردوں کا ٹی 20 ورلڈ کپ تیسری بار اپنے نام کیا تھا۔
ٹورنامنٹ کے کل انعام سے زیادہ بونس
بی سی سی آئی کے مطابق، یہ اضافی انعام ٹیم کی تاریخی کامیابی کے اعتراف میں دیا گیا ہے۔ دلچسپ بات یہ ہے کہ یہ بونس تقریباً 3 ملین ڈالر کے فرق کے ساتھ پورے ٹورنامنٹ کے کل پرائز پول 11.25 ملینڈالر سے بھی زیادہ ہے۔
بی سی سی آئی کے ترجمان نے ایک بیان میں کہا، “بورڈ کھلاڑیوں، سپورٹ اسٹاف اور سلیکٹرز کو ایک بار پھر اس تاریخی کامیابی پر مبارکباد پیش کرتا ہے اور ان کی مستقبل کی کامیابیوں کی خواہش کرتا ہے۔”
گذشتہ کارناموں پر بھی مل چکے ہیں خطیر انعامات
یہ پہلا موقع نہیں جب بی سی سی آئی نے کامیاب ٹیم کو خطیر رقم سے نوازا ہے۔ گزشتہ سال چیمپئنز ٹرافی جیتنے پر بھارتی ٹیم کو 6.72 ملین ڈالر کا اضافی بونس دیا گیا تھا، جو اس وقت ٹورنامنٹ جیت پر ملنے والی 2.24 ملین ڈالر کی رقم سے تین گنا زیادہ تھا۔
