لاہور (اصل میڈیا ڈیسک) کبڈی ورلڈ کپ 2020ء کے مقابلے دوسرے روز بھی جاری رہے، پنجاب اسٹیڈیم میں پیر کے روز پہلا میچ بھارت اور جرمنی کی ٹیموں کے درمیان ہوا، دلچسپ مقابلے کے بعد بھارت نے جرمنی کی ٹیم کو62-28 سے شکست دیدی۔
بھارت کے کھلاڑیوں نے خوبصورت ریڈ کرکے پوائنٹس حاصل کئے،بھارتی جاپھیوں نے جرمن کھلاڑیوں کو بے بس کردیا اور شائقین کبڈی سے بھرپور دادوصول کی، شائقین کبڈی کی بڑی تعداد نے پنجاب اسٹیڈیم میں میچ دیکھا۔
دن کے دوسرے مقابلے میں ایران نے انگلینڈ کو 57-27 سے قابو کرلیا، اس موقع پر ایران کے قونصل جنرل محمد رضا ناظری بھی پنجاب اسٹیڈیم میں موجود رہے، سیکریٹری اسپورٹس پنجاب احسان بھٹہ، ڈائریکٹر جنرل اسپورٹس پنجاب عدنان ارشداولکھ اورکبڈی فیڈریشن کے صدر چوہدری شافع حسین نے ان کا اسٹیڈیم آمد پر پرتپاک استقبال کیا، انھوں نے میچ جیتنے پر ایرانی ٹیم کو مبارکباد دی۔
تیسرے میچ میں آسٹریلیا نے سنسی خیز مقابلے کے بعد کینیڈا کی ٹیم کو48-37 سے زیرکرلیا، کبڈی میچز کی پنجابی زبان میں خوبصورت کمنٹری نے ماحول کو گرمائے رکھا، منگل کو بھی 3میچزشیڈول ہیں۔
پنجاب اسٹیڈیم میں پہلا میچ سہ پہر 3 بجکر30 منٹ پر آسٹریلیا اور آذربائیجان کے درمیان ہوگا، دوسرا میچ شام4 بجکر45 منٹ پر انگلینڈ اور جرمنی کے درمیان کھیلا جائے گا، دن کے تیسرے مقابلے میں سیرا الیون اور بھارت کی ٹیمیں مدمقابل آئیں گی۔
