بالی وڈ اداکار سیف علی خان کے گھر میں ڈکیتی کی کوشش کے دوران پیش آنے والے واقعے کے بعد ان کی اہلیہ کرینہ کپور کی ٹیم نے تفصیلات جاری کردی ہیں۔ بھارتی میڈیا رپورٹس کے مطابق، بدھ اور جمعرات کی درمیانی شب تقریباً 3 بجے کے قریب سیف کے ممبئی کے علاقے باندرا میں واقع گھر میں ڈکیتی کی کوشش کی گئی، جسے اداکار نے مزاحمت کرکے ناکام بنادیا۔
مزاحمت کے دوران سیف علی خان پر چاقو سے حملہ کیا گیا، جس سے انہیں 6 زخم آئے۔ ان میں سے 2 زخم کافی گہرے تھے، جب کہ ایک زخم ریڑھ کی ہڈی کے قریب لگا۔ اس حوالے سے لیلا وتی اسپتال کے سی او او ڈاکٹر نیرج اتمانی نے بھی تصدیق کی ہے کہ سیف کو چاقو کے وار سے چھ زخم آئے ہیں، جن میں سے دو کافی گہرے ہیں۔
کرینہ کپور کی ٹیم نے جاری کردہ بیان میں کہا کہ ’سیف علی خان اور کرینہ کپور کے گھر میں گزشتہ رات ڈکیتی کی واردات کی کوشش کی گئی، جو ناکام ہوگئی۔ سیف کو بازو پر شدید چوٹیں آئی ہیں۔‘ بیان میں مزید کہا گیا کہ ’اداکار اس وقت اسپتال میں زیرِ علاج ہیں، جب کہ ان کی اہلیہ اور دونوں بچے محفوظ ہیں۔‘
کرینہ اور سیف کی ٹیم کی جانب سے مداحوں سے درخواست کی گئی ہے کہ وہ پرسکون رہیں اور کسی قسم کی جعلی خبروں پر یقین کرنے سے گریز کریں۔ انہوں نے کہا کہ صرف پولیس یا ہماری ٹیم کی جانب سے جاری کردہ بیانات کو ہی سچ مانیں۔
دوسری جانب، اداکار سیف علی خان نے بھی ایک آفیشل بیان جاری کیا ہے، جس میں انہوں نے کہا کہ ’مداحوں سے میری درخواست ہے کہ اطمینان رکھیں۔‘ سیف نے اپنے بیان میں مزید کہا کہ وہ بہتر ہیں اور جلد ہی صحت یاب ہو جائیں گے۔
واضح رہے کہ اس واقعے کے بعد پولیس نے تحقیقات کا آغاز کر دیا ہے اور ملزمان کو گرفتار کرنے کی کوششیں جاری ہیں۔ سیف علی خان کے مداحوں نے سوشل میڈیا پر ان کے جلد صحت یاب ہونے کی دعائیں مانگتے ہوئے انہیں حوصلہ دیا ہے۔
