اسلام آباد: وزیراعظم شہباز شریف کے مشیر برائے سیاسی امور سینیٹر رانا ثناء اللہ نے کہا ہے کہ بیرسٹر افتخار گیلانی کو آزاد جموں و کشمیر کا وزیراعظم بنانے کا فیصلہ مسلم لیگ (ن) کے قائد نواز شریف نے کیا۔
ایک نجی ٹیلی ویژن پروگرام میں گفتگو کرتے ہوئے رانا ثناء اللہ کا کہنا تھا کہ افتخار گیلانی کو آزاد کشمیر کا وزیراعظم مقرر کرنے کا فیصلہ پارٹی قیادت اور نواز شریف نے کیا۔
پارٹی قیادت کے لیے مشکل فیصلہ
انہوں نے کہا کہ یہ فیصلہ پارٹی قیادت کے لیے مشکل تھا، تاہم حتمی فیصلہ افتخار گیلانی کے حق میں کیا گیا۔ رانا ثناء اللہ نے مزید کہا کہ اس فیصلے کے نتیجے میں کسی کے ساتھ ناانصافی نہیں ہوئی۔
شاہ غلام قادر اور راجہ فاروق حیدر ٹیم کا حصہ ہوں گے
رانا ثناء اللہ نے یہ بھی کہا کہ شاہ غلام قادر پارٹی کے صدر ہیں اور ہر قیمت پر پارٹی کے ساتھ رہیں گے۔ انہوں نے بتایا کہ شاہ غلام قادر اور راجہ فاروق حیدر کو ٹیم میں شامل کیا جائے گا۔
افتخار گیلانی کی انتخابی کامیابی
واضح رہے کہ مسلم لیگ (ن) کے افتخار گیلانی آزاد جموں و کشمیر کے 17ویں وزیراعظم منتخب ہوئے ہیں۔ انہوں نے 30 ووٹ حاصل کیے، جبکہ پاکستان پیپلز پارٹی کے امیدوار سردار مختار خان کو 14 ووٹ ملے۔
افتخار گیلانی پہلی بار 2011 میں آزاد جموں و کشمیر قانون ساز اسمبلی کے رکن منتخب ہوئے تھے۔ وہ آزاد کشمیر کے وزیر تعلیم کے طور پر بھی خدمات انجام دے چکے ہیں اور اس بار ٹیکنوکریٹ نشست پر اسمبلی کے لیے منتخب ہوئے ہیں۔
