سنچورین (جیوڈیسک) جنوبی افریقا نے پاکستان کے خلاف تیسرا ون ڈے 13 رنز سے جیت لیا۔ بارش سے متاثرہ میچ کا فیصلہ ڈک ورتھ لیوئس میتھڈ کے تحت ہوا۔
پاکستان کی جانب سے دیئے گئے 318 رنز کے ہدف کے تعاقب میں جنوبی افریقا کی اننگز کا آغاز کوئنٹن ڈی کوک اور ہاشم آملہ نے کیا لیکن 25 کے انفرادی اسکور پر ہاشم آملہ حسن علی کی گیند پر بابراعظم کو آسان کیچ دے کر آؤٹ ہو گئے۔
کوئنٹن ڈی کوک کو 33 کے انفرادی اسکور پر شاداب خان نے شاندار تھرو کر کے رن آؤٹ کیا۔
جنوبی افریقا نے 33 اوورز میں دو وکٹوں کے نقصان پر 187 رنز بنائے تھے اور اسے جیت کے لیے 131 رنز درکار تھے کہ بارش کی وجہ سے میچ روکنا پڑا اور بعدازاں ڈک ورتھ لوئس میتھڈ کے تحت جنوبی افریقا کو فاتح قرار دے دیا گیا۔
اس طرح پاکستان کے امام الحق کی شاندار سنچری، بابراعظم کے 69 اور محمد حفیظ کے 52 رنز بھی کام نہ آئے۔
کپتان سرفراز احمد نے ٹاس جیت کر پہلے بیٹنگ کا فیصلہ کیا تو امام الحق اور فخر زمان نے اننگز کا آغاز کیا۔
فخر زمان ایک مرتبہ پھر امیدوں پر پورا اترنے میں ناکام رہے اور جنوبی افریقا کی جانب سے اپنے ون ڈے کیرئیر کا پہلا میچ کھیلنے والے بیرن ہینڈرکس کی گیند پر غلط شاٹ کھیلتے ہوئے 2 رنز بنا کر کیچ آؤٹ ہوئے۔
فخر زمان کے آؤٹ ہونے کے بعد بابراعظم وکٹ پر آئے اور انہوں نے امام الحق کے ساتھ محتاط انداز سے کھیلتے ہوئے ٹیم کا اسکور آگے بڑھایا، دونوں بلے بازوں کے درمیان 132 رنز کی شراکت قائم ہوئی۔
بابر اعظم 136 کے مجموعی اسکور پر 69 رنز کی اننگز کھیلنے کے بعد ڈیل اسٹین کی گیند پر ایل بی ڈبلیو ہوئے۔
محمد حفیظ نے 52 رنز کی اننگز کھیلی جب کہ امام الحق نے شاندار بلے بازی کا مظاہرہ کرتے ہوئے اپنے کیریئر کی پانچویں سنچری اسکور کی۔
امام الحق نے ون ڈے کیریئر کی 19 ویں اننگز میں ایک ہزار رنز کا ہندسہ بھی عبور کیا اور وہ 101 رنز کی اننگز کھیل کر آؤٹ ہوئے۔
امام الحق نے اپنے کیریئر کی سنچری اسکور کرنے کے بعد پویلین کی جانب دیکھتے ہوئے ہاتھوں کے اشارے سے ناقدین کو چپ رہنے کا اشارہ کیا جہاں چیف سلیکٹر پی سی بی اور ان کے ماموں انضمام الحق نے دیگر کھلاڑیوں کے ہمراہ کھڑے ہو کر انہیں شاباش دی۔
شعیب ملک 31 رنز بنا کر آؤٹ ہوئے جب کہ عماد وسیم نے 23 گیندوں پر 43 رنز کی جارحانہ اننگز کھیلی اور ناٹ آؤٹ رہے۔
جنوبی افریقا کی جانب سے ڈیل اسٹین اور کگیسو ربادا نے 2،2 جب کہ تبریز شمسی اور بیرن ہینڈرکس نے ایک ایک وکٹ حاصل کی۔
یاد رہے کہ پانچ میچوں کی سیریز میں جنوبی افریقا کو 1-2 کی برتری حاصل ہو گئی ہے۔
