اسلام آباد (اصل میڈیا ڈیسک) پاکستان دنیا میں فری لانس مارکیٹ میں تیزی سے ترقی کرنے والا چوتھا ملک بن گیا۔
امریکی جریدے فوربز میں شائع گلوبل پیمنٹ پلیٹ فارم کی پایونیر گلوبل گگ اکانومی فہرست کے مطابق پاکستان فری لانس مارکیٹ میں بھارت، بنگلا دیش اور روس کے مقابلے میں آگے ہے۔
رپورٹ کے مطابق فری لانس مارکیٹ میں پاکستان نے گزشتہ برس کی دوسری سہ ماہی کے مقابلے میں رواں برس 47 فیصد ترقی کی ہے۔
شائع ہونے والی فہرست کی تحقیق 3 لاکھ سے زائد فری لانسرز کے ریکارڈ پر مبنی تھی جو پایونیر نیٹ ورک سے منسلک ہیں۔
رپورٹ کے مطابق دنیا بھر سے فری لانس مارکیٹ میں تیزی سے ترقی کرنے والے ممالک میں امریکا 78 فیصد ترقی کے ساتھ سرفہرست ہے جب کہ برطانیہ 59 فیصد کے ساتھ دوسرے، برازیل 48 فیصد کے ساتھ تیسرے اور پاکستان 47 فیصد کے ساتھ چوتھے نمبر ہے۔
اس کے علاوہ یوکرین 36 فیصد کے ساتھ پانچویں، بھارت 29 فیصد کے ساتھ چھٹے، بنگلا دیش 27 فیصد کے ساتھ ساتویں، روس 20 فیصد کے ساتھ آٹھویں اور سربیا 19 فیصد کے ساتھ آخری نمبر پر ہے۔
رپورٹ کے مطابق تحقیق سے معلوم ہوا کہ معیشت کو فروغ دینے میں متعدد فری لانسرز وہ ہیں جو اپنے کرئیر کو مضبوط بنانے کے لیے کام کر رہے ہیں۔
پایونیر کی جنرل مینیجر ایال مولڈووین کا پاکستانی فری لانسرز کے حوالے سے کہنا ہے کہ پاکستان میں نوجوان نسل زیادہ سے زیادہ مواقع حاصل کر رہی ہے، وہاں کے متعدد فری لانسرز کی عمر 30 برس کے اندر ہے جو کہ ایک زبردست مثال ہے۔
ایال مولڈووین کا کہنا تھا کہ ماضی میں دیکھا جائے تو صرف امریکا اور برطانیہ سے ہی بیرونی کام لے کر ترقی پزیر ممالک کے لیے کیا جاتا تھا لیکن اب ایشیا بھی اس میں تیزی سے ابھر کر سامنے آ رہا ہے۔
انہوں نے مزید کہا کہ ہم اب ایشیا کے ایسے بہت سے ممالک دیکھ رہے ہیں جو ایک دوسرے سےآؤٹ سورسنگ یعنی کام کا لین دین کر رہے ہیں، تاہم قوموں کے درمیان کسی بھی اشیاء کی خریدای اور سہولت کا طریقہ کار تبدیل ہو رہا ہے۔
