لاہور: مون سون کی تازہ بارشوں نے پنجاب کے دریاؤں میں پانی کا بہاؤ بڑھا دیا ہے، جس کے باعث صوبائی ڈیزاسٹر مینجمنٹ اتھارٹی (پی ڈی ایم اے) نے متعدد مقامات پر الرٹ جاری کر دیا ہے۔ حکام کے مطابق دریائے سندھ اور چناب کے کچھ حصوں میں نشیبی درجے کے سیلاب کی صورتحال پیدا ہو گئی ہے۔
بڑے دریاؤں میں پانی کے بہاؤ کی تازہ ترین صورتحال
پی ڈی ایم اے کے اعداد و شمار کے مطابق، دریائے سندھ پر تربیلہ کے مقام سے 336,000 کیوسک پانی گزر رہا ہے جبکہ چشمہ بیراج پر یہ بہاؤ 302,000 کیوسک ریکارڈ کیا گیا۔ دوسری جانب دریائے چناب میں بھی پانی کی سطح خطرناک حد تک بڑھ گئی ہے۔
- مرالہ: 195,000 کیوس
- خکی: 262,000 کیوسک
- قادر آباد: 245,000 کیوسک
حکام نے بتایا کہ مرالہ اور قادر آباد کے مقامات پر نشیبی سیلاب کی کیفیت ہے۔
دیگر دریاؤں اور ندی نالوں کی کیفیت
دریائے ستلج اور جہلم میں پانی کی سطح معمول کے مطابق ہے۔ تاہم، دریائے راوی پر بلوکی کے مقام پر 73,000 کیوسک کا مستقل بہاؤ جاری ہے۔ جسڑ، شاہدرہ اور ہیڈ سدھنائی سمیت راوی کے دیگر پوائنٹس پر بہاؤ نارمل بتایا جا رہا ہے۔
پی ڈی ایم اے کے ڈائریکٹر جنرل نے پانی کے بڑھتے ہوئے بہاؤ کی وجہ بالائی علاقوں میں ہونے والی بارشوں کو قرار دیا ہے۔ انہوں نے مزید بتایا کہ نارووال میں بسنتر ندی میں درمیانے درجے کا سیلاب دیکھا گیا ہے، جبکہ گجرات میں نالہ بھمبر اور وزیر آباد میں نالہ پلکھو میں نشیبی سیلاب کی اطلاع ہے۔
صوبائی حکام صورتحال پر گہری نظر رکھے ہوئےیں اور ممکنہ خطرات سے نمٹنے کے لیے انتظامات کو حتمی شکل دے دی گئی ہے۔
