جنیوا: اقوام متحدہ میں اسرائیل کے سفیر نے انکشاف کیا ہے کہ ان کے ملک کو حماس کے ساتھ جنگی علاقوں میں جنسی تشدد کی بلیک لسٹ میں شامل کر لیا گیا ہے۔ اسرائیلی سفیر ڈینی ڈینن نے اس اقدام کو ‘سیاسی فیصلہ’ قرار دیتے ہوئے اسے حقائق سے عاری بتایا۔
ڈینن نے سماجی رابطے کی ویب سائٹ ایکس پر اپنی پوسٹ میں کہا، “یہ ایک سیاسی فیصلہ ہے! حقائق اور حقیقت سے مکمل طور پر منقطع۔” انہیں اس فیصلے کے بارے میں اقوام متحدہ کے سیکرٹری جنرل انتونیو گوتریس کے ساتھ ایک ٹیلی فون کال کے دوران مطلع کیا گیا، جس کی تصدیق اقوام متحدہ میں اسرائیلی مشن کی جانب سے بھی کی گئی۔
اسرائیل کا سخت ردعمل: گوتریس سے تمام تعلقات منقطع
اس فیصلے کے ردعمل میں اسرائیلی وزارت خارجہ نے جمعرات کی رات دیر گئے اعلان کیا کہ وہ سیکرٹری جنرل انتونیو گوتریس سے تمام تعلقات منقطع کر رہی ہے۔ وزارت نے اپنے بیان میں کہا، “چونکہ انتونیو گوتریس نے دیانتداری، سالمیت اور پیشہ ورانہ مہارت کے ہر معیار کی خلاف ورزی کا انتخاب کیا ہے، اسرائیل نے سیکرٹری جنل کے دفتر سے تمام تعلقات منقطع کرنے کا فیصلہ کیا ہے اور وہ اقوام متحدہ کے نئے سیکرٹری جنرل کی تقرری تک انتظار کرے گ۔”
تاہم، اقوام متحدہ کے ترجمان سٹیفن ڈوجارک نے اس پر ردعمل دیتے ہوئے کہا کہ سیکرٹری جنرل کا دروازہ اسرائیلی نمائندوں کے لیے بدستور کھلا ہے، جیسا کہ دیگر 192 رکن ممالک اور دو مبصر ریاستوں کے لیے ہے۔
حماس کو بھی پہلے ہی بلیک لسٹ کیا جا چکا ہے
اقوام متحدہ کے سیکرٹری جنرل نے گزشتہ سال اگست میں سلامتی کونسل کو پیش کی جانے والی اپنی سالانہ رپورٹ میں اسرائیل اور روس کو “مطلع” کیا تھا کہ انہیں اس سال ان فریقین کی فہرست میں شامل کیا جا سکتا ہے جن پر “عصمت دری یا جنسی تشدد کی دیگر اقسام کے نمونوں کا ارتکاب کرنے یا ان کے ذمہ دار ہونے کا معتبر طور پر شبہ ہے۔” اس رپورٹ میں حماس کو پہلے ہی مسلح تصادم میں جنسی تشدد کے مرتکب ہونے کے شبے میں اس فہرست کا حصہ بنا دیا گیا تھا، جس کی حماس نے واضح الفاظ میں تردید کی ہے۔
ڈینن نے حماس کے ساتھ اسرائیل کو مساوی قرار دینے کو ایک “نئی پستی” قرار دیا۔ انہوں نے مزید کہا کہ اسرائیل نے ہر الزام کا تفصیلی جواب دیا ہے اور اقوام متحدہ کے نمائندوں کو صورتحال کا دورہ کرنے اور جانچنے کی دعوت دی تھی، لیکن انہوں نے ایسا نہ کرنے کا انتخاب کیا۔
گوتریس کی فلسطینی قیدیوں کے حوالے سے تشویش
سیکرٹری جنرل گوتریس نے اسرائیل کو اپنے انتباہ میں کہا تھا کہ وہ فلسطینیوں کے خلاف متعدد جیلوں، ایک حراستی مرکز اور ایک فوجی اڈے میں اسرائیلی مسلح اور سیکیورٹی فورسز کی جانب سے خلاف ورزیوں کی معتبر معلومات پر “شدید تشویش” میں مبتلا ہیں۔ ان کی یہ تشویش اقوام متحدہ کی جانب سے مسلسل دستاویزی شکل میں پیش کی جانے والی جنسی تشدد کی مخصوص اقسام کے نمونوں کے حوالے سے اہم خدشات کا نتیجہ تھی، جسے اسرائیلی سفیر نے اس وقت بھی بے بنیاد قرار دے کر مسترد کر دیا تھا۔