ممبئی: بالی ووڈ کی معروف اداکارہ کرینہ کپور خان اپنی فلموں اور فیشن کے انتخاب کی وجہ سے ہمیشہ شہ سرخیوں میں رہتی ہیں۔ تاہم اس بار وہ اپنی آنے والی فلم “دائرہ” کی وجہ سے نہیں بلکہ اپنی نجی زندگی کے ایک ایسے پہلو پر کھل کر بات کر رہی ہیں جس کا انہیں آج بھی قلق ہے۔
ایک حالیہ انٹرویو میں کرینہ کپور نے اعتراف کیا کہ فلمی کیریئر کو منتخب کرنے کے لیے انہوں نے اپنی تعلیم ادھوری چھوڑ دی تھی اور یہ بات انہیں آج بھی اندر سے کچوکے دیتی ہے۔ انہوں نے یہ بھی انکشاف کیا کہ ان کے اس ذاتی تجربے نے ان کے دونوں بیٹوں تیمور اور جہانگیر کی پرورش کے انداز پر گہرا اثر ڈالا ہے۔
کلاس گیارہ کے بعد تعلیم کا سلسلہ منقطع
ہنومان داس کے ساتھ گفتگو کے دوران کرینہ کپور نے کم عمری میں تعلیم کو خیرباد کہنے کے اپنے فیصلے پر بے تکلفی سے روشنی ڈالی۔
اداکارہ نے کہا، “تعلیم مکمل نہ کر پانا ایک ایسی چیز ہے جس کا مجھے یقیناً افسوس ہے۔ میں نے اپنی تعلیم کبھی مکمل نہیں کی، اور یہ احساس ہمیشہ میرے ساتھ رہا۔ اگرچہ میرے پاس موقع تھا، لیکن میں فلموں میں آگئی اور گیارہویں جماعت کے بعد آگے نہیں پڑھ سکی۔”
تنقید کے باوجود اپنے دل کی سنی
کرینہ نے مزید کہا کہ اگرچہ لوگ ان کے اس فیصلے کا مذاق اڑا سکتے ہیں یا کچھ بھی کہہ سکتے ہیں، لیکن اداکاری ان کا حقیقی شوق تھا۔
انہوں نے کہا، “میں جانتی ہوں کہ بہت سے لوگ اس کا مذاق اڑا سکتے ہیں یا جو چاہیں کہہ سکتے ہیں، لیکن میں ایک اداکارہ کے طور پر خود کو منوانا چاہتی تھی۔ یہ وہ چیز تھی جو میں کرنا چاہتی تھی، میں نے اپنے دل کی بات مانی۔”
والدین کے طور پر کرینہ کا نقطہ نظر
اپنے تجربے کی روشنی میں کرینہ کپور نے اپنے بچوں کے مستقبل کے حوالے سے اپنی سوچ بھی واضح کی۔ ان کا ماننا ہے کہ تعلیم کو اولین ترجیح دینا ضروری ہے، اور وہ نہیں چاہتیں کہ ان کے بیٹے بھی وہی غلطی دہرائیں جو انہوں نے جوانی میں کی تھی۔
یاد رہے کہ کرینہ کپور خان جلد ہی فلم “دائرہ” میں نظر آنے والی ہیں، جس کے لیے وہ اس وقت بھرپور تشہیری مہم میں مصروف ہیں۔
